ମୟୁରଭଞ୍ଜ: ମୟୁରଭଞ୍ଜ ଜିଲ୍ଲା ରାଇରଙ୍ଗପୁର ରେ ଘଟି ଯାଇଛି ମର୍ମନ୍ତୁଦ ସଡକ ଦୁର୍ଘଟଣା। ପିକଅପ ଓ ବାଇକର ମୁହାଁମୁହିଁ ଧକ୍କା ଫଳରେ ଦୁଇ ଜଣଙ୍କର ମୃତ୍ୟୁ ହୋଇଛି । ଏହି ଦୁର୍ଘଟଣାରେ  ବାଇକ ଟି ସମ୍ପୂର୍ଣ୍ଣ ଜଳି ଯାଇଥିବା ବେଳେ ପିକଅପଟି ମଧ୍ୟ ସାମାନ୍ୟ ଜଳି ଯାଇଛି। ମୃତକ ଦୁଇ ଜଣ ହେଉଛନ୍ତି  ତିରିଂ ଥାନା ଜିରାଇ ଗ୍ରାମର ଆକାଶ ମୁର୍ମୁ ଓ ବିଶ୍ବନାଥ ସୋରେନ ।

ସୂଚନା ଅନୁସାରେ, ଆକାଶ ମୁର୍ମୁ ଓ ବିଶ୍ବନାଥ ସୋରେନ ବାଇକରେ ଘରକୁ ଫେରୁଥିବା ସମୟରେ ସେମାନଙ୍କୁ ଏକ ପିକଅପ ଧକ୍କା ଦେଇଥିଲା । ଦୁର୍ଘଟଣାରେ ବାଇକ୍‌ ଓ ପିକ୍‌ଅପ୍‌ ଭ୍ୟାନ୍‌ରେ ନିଆଁ ଲାଗି ଯାଇଥିଲା। ନିଆଁରେ ବାଇକଟି ସମ୍ପୂର୍ଣ୍ଣ ଜଳିପୋଡ଼ି ନଷ୍ଟ ହୋଇଯାଇଛି । ପିକ୍‌ଅପ୍‌ ଭ୍ୟାନ୍‌ ଟି ଅଳ୍ପ ଜଳି ଯାଇଛି।

ସ୍ଥାନୀୟ ଲୋକ, ତୁରନ୍ତ ଅଗ୍ନିଶମ ବାହିନୀ ଓ ରାଇରଙ୍ଗପୁର ଟାଉନ ଥାନା ପୋଲିସକୁ ଖବର ଦେଇଥିଲେ । ଖବର ପାଇ, ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲେ । ସେପଟେ ରାଇରଙ୍ଗପୁର ଟାଉନ ଥାନା ପୋଲିସ ମଧ୍ୟ ଘଟଣାସ୍ଥଳରେ ପହଞ୍ଚି ଦୁର୍ଘଟଣା ର ତଦନ୍ତ କରିବା ସହିତ ବାଇକ ଓ ପିକଅପ କୁ ଜବତ କରିଛି।  ଦୁଇ ମୃତଦେହ ର ବ୍ୟବଚ୍ଛେଦ ପରେ ସେମାନଙ୍କ ପରିବାର ଲୋକଙ୍କୁ ଶବ ହସ୍ତାନ୍ତର କରାଯିବ ବୋଲି ଜଣାପଡିଛି।