କେନ୍ଦୁଝର: ସେଲଫି ନିଶା ପୁଣି ଜଣଙ୍କ ଜୀବନ ନେଇଛି । ଚଳନ୍ତା ଟ୍ରେନରେ ବିପଦଜନକଭାବେ ସେଲଫି ନେବା କାଳ ହୋଇଛି । ସେଲଫି ନେବାବେଳେ ଜଣେ କଲେଜ ଛାତ୍ରୀ ଟ୍ରେନ୍ ଖସି ପ୍ରାଣ ହରାଇଛନ୍ତି । ମୃତ ଛାତ୍ରୀ ଜଣକ ହେଲେ କେନ୍ଦୁଝର ଜିଲ୍ଲା ତୁରୁମୁଙ୍ଗା ଥାନା ଅନ୍ତର୍ଗତ ଡଳଙ୍ଗ ଗ୍ରାମର ନମ୍ରତା ବେହେରା । ସେ ଭୁବନେଶ୍ୱରରେ ଏକ ଘରୋଇ କଲେଜରେ ପାଠ ପଢ଼ନ୍ତି । ପୁରୀ-ବଡ଼ବିଲ ଏକ୍ସପ୍ରେସରେ ଭୁବନେଶ୍ୱରରୁ ଘରକୁ ଫେରୁଥିବାବେଳେ ଟ୍ରେନରୁ ଖସିପଡ଼ି ତାଙ୍କର ମୃତ୍ୟୁ ହୋଇଛି । ଟାଙ୍ଗିରିଆପାଳ-ଶଗଡ଼ପଟା ଷ୍ଟେସନ ନିକଟରେ ଏହି ଅଘଟଣ ଘଟିଛି । ସେ ତାଙ୍କ ସାଙ୍ଗ ସହିତ ସେଲଫି ନେଉଥିଲେ ବୋଲି ଜଣାପଡ଼ିଛି । ତେବେ ପୋଲିସ ମୃତ ଦେହକୁ ଜବତ କରି ଯାଞ୍ଚ କରୁଛି ।