ଖୋର୍ଦ୍ଧା: ଗଞ୍ଜେଇ ଚୋରା ଚାଲାଣକୁ ଭଣ୍ଡୁର କରିଛି ଦୁର୍ଘଟଣା । ଖୋର୍ଦ୍ଧା ଜିଲ୍ଲା ପିଏନ୍ କଲେଜ ଛକ ନିକଟରେ ଏକ କାର ଦୁର୍ଘଟଣା ଗ୍ରସ୍ତ ହୋଇଛି । କାରରୁ ବିପୁଳ ପରିମାଣରେ ଗଞ୍ଜେଇ ଜବତ କରିଛି ପୋଲିସ । 

ଖୋର୍ଦ୍ଧା ପିଏନ କଲେଜ ଦେଇ ଯାଇଥିବା ୧୬ ନମ୍ବର ଜାତୀୟ ରାଜପଥ ଉପରେ ଏକ ମାରୁତି ସୁଇଫ୍ଟ ଡିଜାଏର୍ ( ODO2CT7521) ଦୁର୍ଘଟଣା ଗ୍ରସ୍ତ ହୋଇଛି । ଖବର ପାଇ ପୋଲିସ ଦୁର୍ଘଟଣା ସ୍ଥଳରେ ପହଁଚିଥିଲା । ତେବେ କାରକୁ ଦେଖିବା ପରେ ପୋଲିସ ତାଜୁବ ହୋଇଥିଲା । ଦୁର୍ଘଟଣାରେ କେହି ମୃତାହତ ହୋଇ ନ ଥିବାବେଳେ କାରରୁ ବିପୁଳ ପରିମାଣରେ ଗଞ୍ଜେଇ ଦେଖିବାକୁ ପାଇଥିଲା । କାର ପଛ ସିଟକୁ ଖୋଲାଯାଇ ସେଥିରେ ଗଞ୍ଜେଇ ରଖାଯାଇଛି । ପୋଲିସ ଅବକାରୀ ବିଭାଗକୁ ଖବର ଦେବା ପରେ ଅବକାରୀ ବିଭାଗ ଗଞ୍ଜେଇ ଜବତ କରିଛି । 

ଅନ୍ୟପକ୍ଷରେ ଦୁର୍ଘଟଣା ପରେ କାରରେ ଥିବା ଚାଳକ ଫେରାର ହୋଇଯାଇଛନ୍ତି । କାରଟି ଖୋର୍ଦ୍ଧାରୁ ବ୍ରହ୍ମପୁର ଅଭିମୁଖେ ଯାଉଥିବା ଅନୁମାନ କରାଯାଉଛି । ତେବେ ପୋଲିସ କାରକୁ ଜବତ କରିଛି । କାରଟି କାହାର ଏବଂ କେଉଁ ଆଡ଼କୁ ଯାଉଥିଲା, ଏହି ଚୋରା ଚାଲାଣରେ କେଉଁମାନେ ସମ୍ପୃକ୍ତ ଅଛନ୍ତି ସେ ନେଇ ତଦନ୍ତ ଆରମ୍ଭ ହୋଇଛି ।