ଦନ୍ତା ହାତୀ ଆକ୍ରମଣରେ ଜଣେ ମୃତ । ଏଭଳି ଏକ ଅଭାବନୀୟ ଘଟଣା କେନ୍ଦୁଝର ଜିଲ୍ଲା ତେଲକୋଇ ବନାଞ୍ଚଳ ଅଧୀନ ପୁରୁଷୋତ୍ତମପୁର ଗାଁ ପାଖ ବନ୍ଧନଝରି ରିଜର୍ଭ ଫରେଷ୍ଟ ନିକଟସ୍ଥ ଚାରିକଣିଆ ଠାରେ ଘଟିଛି । ମୃତକ ଜଣକ ହେଲେ ତେଲକୋଇ ଥାନା ମଲାଣ୍ଡା ଗ୍ରାମର ମଦନ ନାୟକ ।
ଆଜି ସକାଳେ ମଦନ ନିଜ ଶ୍ୱଶୁର ଘର ପୁରୁଷୋତ୍ତମପୁରରୁ ନିଜ ଘରକୁ ଫେରୁଥିଲେ । ତାଙ୍କ ସହିତ ବାଇକ୍ରେ ଅନ୍ୟ ୨ଜଣ ଶ୍ରମିକ ମଧ୍ୟ ଯାଉଥିଲେ । ହଠାତ ନିକଟ ଜଙ୍ଗଲରୁ ଏକ ଦନ୍ତା ହାତୀଟି ତାଙ୍କୁ ଆକ୍ରମଣ କରିଥିଲା । ମଦନ ବାଇକ୍ରେ ପଛରେ ବସିଥିବା ବେଳେ ଦନ୍ତା ହାତୀଟି ତାଙ୍କୁ ଶୁଣ୍ଢରେ ଟାଣି ନେଇ କଚାଡି ଦେଇଥିଲା । ଫଳରେ ଘଟଣାସ୍ଥଳରେ ହିଁ ମଦନଙ୍କର ମୃତ୍ୟୁ ହୋଇଥିଲା । ସେହି ବାଇକରେ ଯାଉଥିବା ଅନ୍ୟ ଦୁଇଜଣ ଶ୍ରମିକ ନିଜ ଜୀବନ ବଞ୍ଚେଇବାକୁ ଯାଇ ସେଠୁ ଖସି ପଳାଇଥିଲେ । ଖବର ପାଇ ଗ୍ରାମବାସୀ ଓ ବନ ବିଭାଗ କର୍ମଚାରୀ ଘଟଣାସ୍ଥଳରେ ପହଞ୍ଚିଥିଲେ । ସେତେବେଳକୁ ମଦନଙ୍କର ମୃତ୍ୟୁ ହୋଇସାରିଥିଲା । ଏହି ଘଟଣାକୁ ନେଇ ସ୍ଥାନୀୟ ଲୋକେ ଉତ୍ତ୍ୟକ୍ତ ହୋଇ ବନ ବିଭାଗ କର୍ମଚାରୀମାନଙ୍କୁ ଘେରଉ କରିଛନ୍ତି । ପୋଲିସ ଉତ୍ୟକ୍ତ ଲୋକଙ୍କୁ କାବୁ କରି ମୃତଦେହକୁ ବ୍ୟବଚ୍ଛେଦ ପାଇଁ ପଠାଇଛି । ଏବେ ବନବିଭାଗ ଏହି ଘଟଣାର ଅଧିକ ତଦନ୍ତ କରୁଛି ।
ଆଗକୁ ପଢନ୍ତୁ :- ଭାରତର ପରାଜୟ ସହିନପାରି ଦୁଃଖରେ ଜୀବନ ହାରିଛନ୍ତି ଯୁବକ