ଭୁବନେଶ୍ୱର : ଶିକ୍ଷା ଓ ଅନୁସନ୍ଧାନ (ସୋଆ) ବିଶ୍ୱବିଦ୍ୟାଳୟରେ ନିକଟରେ ଇଣ୍ଡିଆନ୍ ସୋସାଇଟି ଅଫ୍ ପେଡୋଡଂଟିକ୍ସ ଆଣ୍ଡ ପ୍ରିଭେନ୍ଟିଭ ଡେଂଟିଷ୍ଟ୍ରି (ଆଇଏସ୍ପିପିଡି) ୩-ଦିନିଆ ଜାତୀୟ ସମ୍ମିଳନୀ ଆୟୋଜିତ ହୋଇଯାଇଥିବା ବେଳେ ଶିଶୁଙ୍କ ମୁଖ ସ୍ୱାସ୍ଥ୍ୟ, ଦନ୍ତ ଚିକିତ୍ସା, ମିନିମାଲି ଇନ୍ଭାସିଭ୍ ଟେକ୍ନିକ୍ସ ଏବଂ ଦନ୍ତର ଯତ୍ନ ଉପରେ ଗୁରୁତ୍ୱାରୋପ କରାଯାଇଥିଲା ।
ସମ୍ମିଳନୀରେ ଶିଶୁ ଦନ୍ତ ଚିକିତ୍ସାର ଅତ୍ୟାଧୁନିକ ପ୍ରକ୍ରିୟା ସମ୍ପର୍କରେ ଆଲୋଚନା କରାଯାଇଥିଲା । ସମ୍ମିଳନୀରେ ପ୍ରାୟ ୧୬୫୦ ଜଣ ପ୍ରତିନିଧି ଯୋଗ ଦେଇଥିବା ବେଳେ ବୈଜ୍ଞାନିକ ସେସନ୍ ଗୁଡ଼ିକରେ ୮୪୦ ସନ୍ଦର୍ଭ ଏବଂ ପ୍ରାୟ ୪୦୦ଟି ପୋଷ୍ଟର ପ୍ରଦର୍ଶନ କରାଯାଇଥିଲା ।
ୟୁକେ, ଅଷ୍ଟ୍ରିଆ, ମାଲେସିଆ ଏବଂ ୟୁଏଇର ବିଶିଷ୍ଟ ଆନ୍ତର୍ଜାତିକ ବକ୍ତା ଏହି ସମ୍ମିଳନୀରେ ଯୋଗ ଦେଇଥିବା ପ୍ରତିନିଧିମାନଙ୍କୁ ସମ୍ବୋଧିତ କରିଥିବା ବେଳେ ଏମ୍ସ, ଇଣ୍ଡିଆନ୍ କାଉନସିଲ୍ ଫର ମେଡିକାଲ୍ ରିସର୍ଚ୍ଚ (ଆଇସିଏମ୍ଆର୍), ପିଜିଆଇ ଚଣ୍ଡିଗଡ଼ର ବିଶେଷଜ୍ଞମାନେ ବକ୍ତବ୍ୟ ପ୍ରଦାନ କରିଥିଲେ । ସମ୍ମିଳନୀ ପୂର୍ବରୁ ୧୫ଟି କର୍ମଶାଳାର ଆୟୋଜନ କରାଯାଇଥିଲା ।
ଉଦ୍ଘାଟନୀ କାର୍ଯ୍ୟକ୍ରମରେ ଆଇଏସ୍ପିପିଡିର ଅଧ୍ୟକ୍ଷ ଡକ୍ଟର ଏନ୍.ଡି ଶଶିିକିରଣ, ସଚିବ ଡକ୍ଟର ବରୀନ୍ଦର ଗୋୟାଲ ଏବଂ ସୋଆର କୁଳପତି ପ୍ରଫେସର ପ୍ରଦୀପ୍ତ କୁମାର ନନ୍ଦ ଯୋଗ ଦେଇଥିଲେ । ବିଶିଷ୍ଟ ଶିଶୁ ଦନ୍ତରୋଗ ବିଶେଷଜ୍ଞ ତଥା ଗ୍ଲୋବାଲ୍ ଓରାଲ ରିସର୍ଚ୍ଚ ଏକାଡେମୀର ନିର୍ଦ୍ଦେଶକ, ଡକ୍ଟର ଏସ୍.ଜି ଡାମ୍ଲେ, ଡକ୍ଟର ଅସୀମା ଗୋୟାଲ ଏବଂ ଡକ୍ଟର ରାହୁଲ ହେଗଡେ ବିଭିନ୍ନ ଅଧିବେଶନଗୁଡ଼ିକରେ ବକ୍ତବ୍ୟ ରଖିଥିଲେ । ବିଶିଷ୍ଟ ସ୍ନାୟୁଶଲ୍ୟ ବିଶେଷଜ୍ଞ ତଥା ସୋଆର ପ୍ର୍ରମୁଖ ଉପଦେଷ୍ଟା (ସ୍ୱାସ୍ଥ୍ୟ ବିଜ୍ଞାନ) ପ୍ରଫେସର (ଡାକ୍ତର) ଅଶୋକ କୁମାର ମହାପାତ୍ର ମଧ୍ୟ କାର୍ଯ୍ୟକ୍ରମରେ ଯୋଗ ଦେଇଥିଲେ ।
ଶିଶୁ ଦନ୍ତ ଚିକିତ୍ସକଙ୍କ ନିମନ୍ତେ ବିଭିନ୍ନ ଦନ୍ତ ସମ୍ବନ୍ଧୀୟ ପ୍ରଦର୍ଶନୀର ମଧ୍ୟ ଆୟୋଜନ କରାଯାଇଥିଲା ।
ଏହି ସମ୍ମିଳନୀର ପରିଚାଳନା ଟିମ୍ରେ ଅର୍ଗାନାଇଜିଂ ଚେୟାରମ୍ୟାନ୍ ପ୍ରଫେସର (ଡାକ୍ତର) ସୁଶାନ୍ତ ମହାନ୍ତି, ଅର୍ଗାନାଇଜିଂ ସେକ୍ରେଟାରୀ ଡାକ୍ତର ପ୍ରିୟଙ୍କା କାଲିମିରେଡ୍ଡୀ, କୋଷାଧ୍ୟକ୍ଷ ଡାକ୍ତର ଜ୍ଞାନରଞ୍ଜନ ସ୍ୱାଇଁ ଏବଂ ସଦସ୍ୟ ଭାବେ ଡକ୍ଟର ରାଧାପ୍ରସନ୍ନ ଦଳାଇ, ଡକ୍ଟର ବିସ୍ମୟ ସିଂ, ଡକ୍ଟର ଶ୍ରୀନନ୍ଦନ ପ୍ରଧାନ ଏବଂ ଡକ୍ଟର ଦୀପମାଲା ସାହୁ ଦାୟିତ୍ୱ ନିର୍ବାହ କରିଥିଲେ ।
ଏହି ଅବସରରେ ଅନୁଷ୍ଠାନର ବାର୍ଷିକ ଅଧିବେଶନ ଆୟୋଜନ କରାଯାଇଥିବା ବେଳେ ଆଇଏସ୍ପିପିଡିର ପ୍ରେସିଡେଂଟ ଭାବେ ଡକ୍ଟର ସୁଧୀନ୍ଦ୍ର ବାଲିଗା ଦାୟିତ୍ୱ ଗ୍ରହଣ କରିଥିବା ବେଳେ ଡକ୍ଟର ସୁଶାନ୍ତ ମହାନ୍ତି ପ୍ରେସିଡେଂଟ ଇଲେକ୍ଟ ଭାବେ ମନୋନୀତ ହୋଇଥିଲେ ।