କଟକ : ମଙ୍ଗଳବାର କଟକର ନୂତନ ଡିସିପି ଭାବେ ଦାୟିତ୍ବ ଗ୍ରହଣ କରିଛନ୍ତି ଆଇପିଏସ ଜଗମୋହନ ମୀନା । ଜଗମୋହନ ମୀନା ୨୦୧୩ ବ୍ୟାଚ୍ ଆଇପିଏସ୍ ଅଫିସର ଅଟନ୍ତି । ପୂର୍ବରୁ ସେ ଗଞ୍ଜାମ ଏସ୍ପି ଭାବେ କାର୍ଯ୍ୟ କରୁଥିଲେ । ବିଦାୟୀ ଡିସିପି ପ୍ରକାଶ ଆର୍ଙ୍କ ଠାରୁ ଆଜି ଦାୟିତ୍ୱ ଗ୍ରହଣ କରିଛନ୍ତି ଜଗମୋହନ ମୀନା ।
ଦାୟିତ୍ୱ ଗ୍ରହଣ ପରେ ଡିସିପି ପ୍ରତିକ୍ରିୟା ଦେଇ କହିଛନ୍ତି ଯେ ପାର୍ବଣ ଋତୁ ଆରମ୍ଭ ହୋଇଯାଉଥିବାରୁ ଗୁରୁତ୍ୱ ଦିଆଯିବ ସହ ଥାନାରେ ପୋଲିସର ଆଚରଣ ଓ ବ୍ୟବହାର ସୁଧାର ଆଣିବାକୁ ଚେଷ୍ଟା କରିବୁ । ଏନେଇ ଥାନାଧିକାରୀଙ୍କୁ ସଫ୍ଟ ସ୍କିଲ ଉପରେ ପ୍ରଶିକ୍ଷଣ ଦିଆଯିବ । ମହିଳା ମାନଙ୍କ ସୁରକ୍ଷା ଉପରେ ବିଶେଷ ଗୁରୁତ୍ୱ ଦିଆଯିବ । ସେ ଏକଥା ମଧ୍ୟ କହିଛନ୍ତି ଯେ ମୋର ଅଫିସିଆଲ ନମ୍ବର ସହିତ ମୋର ହ୍ବାଟସ୍ଆପ ନମ୍ବର ମଧ୍ୟ ସାଧାରଣ ଲୋକଙ୍କ ପାଖେ ରହିବ । ସାଂସ୍କୃତିକ ପ୍ରାଣକେନ୍ଦ୍ର ସହର କଟକ ର ସେବା କରିବାକୁ ସୁଯୋଗ ମିଳିଥିବାରୁ ବହୁତ ଖୁସିଅଛନ୍ତି ବୋଲି ଜଗମୋହନ ମୀନା କହିଛନ୍ତି ।
ସୂଚନା ଥାଉକି, ରାଜ୍ୟ ସରକାରଙ୍କ ପକ୍ଷରୁ ଭାରତୀୟ ପୁଲିସ ସେବା (ଆଇପିଏସ) ସ୍ତରରେ ଅଦଳ ବଦଳ କରାଯାଇଛି। କଟକ-ଭୁବନେଶ୍ବର ପୁଲିସ କମିଶନର ସଞ୍ଜୀବ ପଣ୍ଡାଙ୍କୁ ବଦଳି କରାଯାଇଛି। ସଞ୍ଜୀବ ପଣ୍ଡାଙ୍କୁ ଏଡିଜି ଟ୍ରେନିଂ ଏବଂ ବିପିଏସପିଏ ନିର୍ଦ୍ଦେଶକ ଭାବେ ଅବସ୍ଥାପିତ କରାଯାଇଛି। ସେହିପରି କଟକ-ଭୁବନେଶ୍ବର ପୁଲିସ କମିଶନର ଭାବେ ସୁରେଶ ଦେବଦତ୍ତ ସିଂ ନିଯୁକ୍ତି ଦିଆଯାଇଛି ।