ଯାଜପୁର : ଦିନକୁ ଦିନ ବଢିଚାଲିଛି ମର୍ମନ୍ତୁଦ ସଡକ ଦୁର୍ଘଟଣା। ଫଳରେ ଅନେକ ନିରୀହ ଜୀବନ ଅକାରଣେ ଚାଲିଯାଉଛି। ସେହିଭଳି ଯାଜପୁର ଟାଉନ ଥାନା ଅନ୍ତର୍ଗତ ଏନସି କଲେଜ ଛକ ନିକଟରେ ବାଲି ବୋଝେଇ ଟ୍ରକ ଭାରସାମ୍ୟ ହରାଇ ଦୋକାନ ଭିତରକୁ ପଶିଯାଇଛି। ତେବେ ଏହି ଦୁର୍ଘଟଣାରେ ଅଳ୍ପକେ ଦୋକାନୀ ବର୍ତ୍ତୀ ଯାଇଛନ୍ତି। ତେବେ ଲୋକେ ସିଡ଼ି ଲଗାଇ ବ୍ୟବସାୟୀଙ୍କୁ ଉଦ୍ଧାର କରିଥିବା ଜଣାପଡିଛି।

ସୂଚନା ଅନୁସାରେ, ସୋମବାର ବିଳମ୍ବିତ ରାତିରେ କଲେଜ ଛକ ଦେଇ ଆସୁଥିବା ଏକ ବାଲି ବୋଝେଇ ଟ୍ରକଟି ଭାରସାମ୍ୟ ହରାଇ ନିକଟରେ ଥିବା ଏକ ଜଳଖିଆ ଦୋକାନ ଭିତରକୁ ପଶିଯାଇଥିଲା। ଫଳରେ ଦୋକାନ ଭିତରେ ଥିବା ସମସ୍ତ ସାମଗ୍ରୀ ନଷ୍ଟ ହୋଇଯାଇଥିଲା। ହେଲେ ଏହି ଦୁର୍ଘଟଣାରେ ଦୋକାନୀ ଜଣଙ୍କ ଦୋକାନ ଭିତରେ ଶୋଇଥିବା ବେଳେ ଅଳ୍ପକେ ବର୍ତି ଯାଇଛନ୍ତି। ତେବେ ଖବରପାଇ ଅଗ୍ନିଶମବାହିନୀ ଦୁର୍ଘଟଣାସ୍ଥଳରେ ପହଂଚି ସ୍ଥାନୀୟ ଲୋକଙ୍କ ସାହାଯ୍ୟରେ ସିଡ଼ି ଲଗାଇ ବ୍ୟବସାୟୀଙ୍କୁ ଉଦ୍ଧାର କରିଥିଲେ। ଏହାପରେ ଘଟଣାସ୍ଥଳରେ ଟାଉନ୍ ଥାନା ପୋଲିସ ପହଞ୍ଚି ଗାଡ଼ିକୁ ଜବତ କରିବା ସହ ଡ୍ରାଇଭରଙ୍କୁ ଅଟକ ରଖି ସମସ୍ତ ଘଟଣା ବାବଦରେ ପଚରାଉଚରା କରୁଛି।