ରାଞ୍ଚି: ରାଞ୍ଚିରେ ଦକ୍ଷିଣ ଆଫ୍ରିକା ବିପକ୍ଷରେ ବିରାଟ କୋହଲି ୧୩୫ ରନର ଐତିହାସିକ ଇନିଂସ ଖେଳି ରେକର୍ଡ ବର୍ଷା କରିଛନ୍ତି। ତାଙ୍କର ଏହି ଇନିଂସ ଦମରେ ଟିମ୍ ଇଣ୍ଡିଆ ପ୍ରଥମେ ବ୍ୟାଟିଂ କରି ୩୪୯ ରନର ବିଶାଳ ସ୍କୋର କରିଛି। କୋହଲି ଆଉଟ୍ ହେବା ସମୟରେ ସମଗ୍ର ଷ୍ଟାଡିୟମ ତାଙ୍କୁ କରତାଳି ଦେଇ ଅଭିବାଦନ ଜଣାଇଥିଲା। ପ୍ରତିପକ୍ଷ ଦଳର ଖେଳାଳିମାନେ ମଧ୍ୟ ତାଙ୍କୁ କରତାଳି ଦେଇଥିଲେ। ମୁଖ୍ୟ ପ୍ରଶିକ୍ଷକ ଗୌତମ ଗମ୍ଭୀର ମଧ୍ୟ ଠିଆ ହୋଇ କୋହଲିଙ୍କୁ ପ୍ରଶଂସା କରିବା ସହ ପାଭିଲିୟନରେ ଆଲିଙ୍ଗନ କରିଥିଲେ। ଏହି ଇନିଂସ ଜରିଆରତେ କୋହଲି ୫ଟି ରେକର୍ଡ ନିଜ ନାଁରେ କରିଛନ୍ତି। 

୧. ଅନ୍ତର୍ଜାତୀୟ କ୍ରିକେଟର ଗୋଟିଏ ଫର୍ମାଟରେ ସର୍ବାଧିକ ଶତକ

ବିରାଟ କୋହଲି ଅନ୍ତର୍ଜାତୀୟ କ୍ରିକେଟର ଗୋଟିଏ ଫର୍ମାଟରେ ସର୍ବାଧିକ ଶତକ ହାସଲ କରିବାର ରେକର୍ଡ ନିଜ ନାଁରେ କରିଛନ୍ତି। ସେ ସଚିନ ତେନ୍ଦୁଲକରଙ୍କ ରେକର୍ଡ ଭାଙ୍ଗିଛନ୍ତି। ସଚିନ ଟେଷ୍ଟ କ୍ରିକେଟରେ ୫୧ ଶତକ ହାସଲ କରିଥିଲେ।  

୨. ଭାରତର ଗୋଟିଏ ଷ୍ଟାଡିୟମରେ ସର୍ବାଧିକ ଶତକ

ବିରାଟ କୋହଲି ଏବେ ଭାରତର ଯେ କୌଣସି ଷ୍ଟାଡିୟମରେ ସର୍ବାଧିକ ଶତକ ହାସଲ କରିବାର ବ୍ୟାଟର ହୋଇଛନ୍ତି। ରାଞ୍ଚିର ଝାଡ଼ଖଣ୍ଡ କ୍ରିକେଟ୍ ଆସୋସିଏସନ୍ ଷ୍ଟାଡିୟମରେ ବିରାଟ ପାଞ୍ଚଟି ଇନିଂସରେ ତିନୋଟି ଶତକ ମାରିଛନ୍ତି। ସେ ବିଶାଖାପାଟଣା ଏବଂ ପୁଣେରେ ମଧ୍ୟ ତିନୋଟି ଶତକ ମାରିଛନ୍ତି।

୩. ଦକ୍ଷିଣ ଆଫ୍ରିକା ବିପକ୍ଷରେ ସର୍ବାଧିକ ଶତକ

ବିରାଟ କୋହଲି ଦକ୍ଷିଣ ଆଫ୍ରିକା ବିପକ୍ଷରେ ସର୍ବାଧିକ ଦିନିକିଆ ଶତକ ହାସଲ କରିବାର ବ୍ୟାଟର ହୋଇଛନ୍ତି। ଏହା ରାଞ୍ଚିରେ ଦକ୍ଷିଣ ଆଫ୍ରିକା ବିପକ୍ଷରେ କୋହଲିଙ୍କ ଷଷ୍ଠ ଦିନିକିଆ ଶତକ ଥିଲା।

୪. ଘରୋଇ ପରିବେଶରେ ସର୍ବାଧିକ ୫୦+ ସ୍କୋର 

ନିଜର ୧୩୫ ରନର ଇନିଂସ ସହିତ ବିରାଟ କୋହଲି ସଚିନ ତେନ୍ଦୁଲକରଙ୍କ ଦ୍ୱାରା ରେକର୍ଡ ହୋଇଥିବା ଆଉ ଏକ ପ୍ରମୁଖ ରେକର୍ଡ ଭାଙ୍ଗିଛନ୍ତି। ସେ ଭାରତରେ ଦିନିକିଆ ମ୍ୟାଚ୍‌ରେ ସର୍ବାଧିକ ୫୦+ ସ୍କୋର କରିଥିବା ବ୍ୟାଟର ହୋଇଛନ୍ତି। ଏହି ରେକର୍ଡ ପୂର୍ବରୁ ସଚିନ ତେନ୍ଦୁଲକରଙ୍କ ନାମରେ ଥିଲା, ଯିଏ ୫୮ ଥର ଏହି ସଫଳତା ହାସଲ କରିଥିଲେ। କୋହଲି ଏବେ ଘରୋଇ ପରିବେଶରେ ୫୯ ଥର ଦିନିକିଆ ମ୍ୟାଚ୍‌ରେ ୫୦+ ସ୍କୋର କରିଛନ୍ତି।

୫. ନମ୍ବର ୩ରେ ସର୍ବାଧିକ ଅନ୍ତର୍ଜାତୀୟ ଛକା

ବିରାଟ କୋହଲି ନମ୍ବର ୩ରେ ସର୍ବାଧିକ ଅନ୍ତର୍ଜାତୀୟ ଛକା ମାରିଥିବା ବ୍ୟାଟର ହୋଇଛନ୍ତି। ସେ ରିକି ପଣ୍ଟିଂଙ୍କ ରେକର୍ଡ ଭାଙ୍ଗିଛନ୍ତି, ଯିଏ ୫୪୦ ଇନିଂସରେ ୨୧୭ ଛକା ମାରିଥିଲେ। ବିରାଟ କୋହଲି ନମ୍ବର ୩ ରେ ୩୨୭ ଇନିଂସରେ ୨୧୮ ଛକା ମାରିଛନ୍ତି।