ହାତକୁ ଦୁଇ ହାତ ହେବେ କ୍ରିକେଟର ଋତୁରାଜ ଗାଏକ୍ୱାଡ୍ । ଗାଏକ୍ୱାଡ୍ଙ୍କୁ ନେଇ ଏବେ ସବୁଠି ଚର୍ଚ୍ଚା। ପ୍ରଥମଟି ହେଲା ନିଜର ଦମ୍ଦାର୍ ବ୍ୟାଟିଂକୁ ନେଇ, ଅନ୍ୟଟି ତାଙ୍କର ମ୍ୟାରେଜ୍କୁ ନେଇ । ଚଳିତ ବର୍ଷ ଆଇପିଏଲରେ ଚେନ୍ନାଇ ସୁପର କିଙ୍ଗ୍ସ ପାଇଁ ଦମ୍ଦାର ବ୍ୟାଟିଂ କରି ସେ ଫ୍ୟାନ୍ସଙ୍କ ମନମୁଗ୍ଧ କରିଦେଇଛନ୍ତି । ସେପଟେ ଆସନ୍ତାକାଲି ଜୁନ ୩ ତାରିଖରେ ବିବାହ ବନ୍ଧନରେ ବାନ୍ଧି ହେବେ ଗାଏକ୍ୱାଡ। ଏନେଇ ତାଙ୍କର ମେହେନ୍ଦି ସେରିମନି ଖୁବ୍ ଧୁମ୍ଧାମ୍ରେ ଶେଷ ହୋଇଛି। ମେହେନ୍ଦି ସେରିମନିର ଫଟୋ ଇନଷ୍ଚାରେ ସେୟାର କରିଛନ୍ତି ଗାଏକ୍ନାଡ।
ଚେନ୍ନାଇ ଆଇପିଏଲ ଟ୍ରଫି ଜିତିବା ପରେ ଗାଏକ୍ୱାଡ ଗୋଟିଏ ଫଟୋ ସୋଶାଲ ମିଡିଆରେ ପୋଷ୍ଟ କରିଥିଲେ। ଏହି ଫଟୋରେ ଚେନ୍ନାଇ ଅଧିନାୟକ ମହେନ୍ଦ୍ର ସିଂହ ଧୋନି ଓ ଗାଏକ୍ୱାଡଙ୍କ ଗର୍ଲଫ୍ରେଣ୍ଡ ଉତ୍କର୍ଷା ପାୱାର ମଧ୍ୟ ରହିଥିଲେ । ଉତ୍କର୍ଷା ମଧ୍ୟ ଋତୁରାଜ ଗାଏକ୍ୱାଡଙ୍କ ଭଳି ଜଣେ କ୍ରିକେଟର । କ୍ରିକେଟ ଖେଳିବା ସମୟରେ ଋତୁରାଜ ଗାଏକ୍ୱାଡଙ୍କ ପ୍ରେମରେ ପଡ଼ିଥିଲେ ଉତ୍କର୍ଷା । ଏବେ ଉଭୟ ବିବାହ ବନ୍ଧନରେ ବାନ୍ଧି ହେବାକୁ ଯାଉଛନ୍ତି । ଗାଏକ୍ୱାଡ ମଧ୍ୟ ମହାରାଷ୍ଟ୍ର କ୍ରିକେଟ ଟିମର ଖେଳାଳି । ୧୯୯୭ ମସିହା ଜାନୁଆରୀ ୩୧ତାରିଖରେ ଗାଏକ୍ୱାଡ ପୁନେରେ ଜନ୍ମଗ୍ରହଣ କରିଥିଲେ ।
୧୯୯୮ ମସିହା ଅକ୍ଟୋବର ୧୩ରେ ଜନ୍ମ ଗ୍ରହଣ କରିଥିଲେ ଉତ୍କର୍ଷା। ପିଲା ଦିନରୁ ହିଁ ତାଙ୍କର ଫୁଟବଲ, ବ୍ୟାଡମିଣ୍ଟନ ଓ କ୍ରିକେଟ ପ୍ରତି ଅହେତୁକ ଦୁର୍ବଳତା ଥିଲା। କିନ୍ତୁ ୧୧ ବର୍ଷ ବୟସରୁ ସେ କ୍ରିକେଟ ପ୍ରତି ଆକୃଷ୍ଟ ହୋଇଥିଲେ। ପରବର୍ତ୍ତୀ ଅବସ୍ଥାରେ ସେ ମହାରାଷ୍ଟ୍ରର ମହିଳା ଟିମରେ ଜଣେ ଅଲରାଉଣ୍ଡର ଭାବେ ସ୍ଥାନ ପାଇଥିଲେ। ଉତ୍କର୍ଷା ମହାରାଷ୍ଟ୍ର ମହିଳା କ୍ରିକେଟ ଟିମ ପକ୍ଷରୁ ଏକାଧିକ ମ୍ୟାଚ୍ ଖେଳି ସାରିଛନ୍ତି। ମହାରାଷ୍ଟ୍ର ଅଣ୍ଡର ୧୯ ଟିମ ପାଇଁ ୨୦୧୨-୧୩ ଓ ୨୦୧୭-୧୮ରେ ସେ ଖେଳିଥିଲେ। ମହାରାଷ୍ଟ୍ରର ସିନିୟର ମହିଳା ଟିମ୍ରେ ବି ସେ ନଜର ଆସିଥିଲେ। ସେ ୧୮ମାସ ତଳେ ମହାରାଷ୍ଟ୍ର ପାଇଁ ଶେଷ ମ୍ୟାଚ୍ ଖେଳିଥିଲେ। ବର୍ତ୍ତମାନ ସେ ପୁଣେରେ ଥିବା ଆଇଏନଏଫଏସ୍ରେ ପାଠ ପଢ଼ୁଛନ୍ତି ।