ନୂଆଦିଲ୍ଲୀ: ପୂର୍ବତନ କ୍ରିକେଟର ମନୋଜ ତିୱାରୀ ବିସ୍ଫୋରକ ବୟାନ ଦେଇ କ୍ରିକେଟ୍ ଜଗତରେ ଏକ ନୂତନ ବିତର୍କକୁ ଜନ୍ମ ଦେଇଛନ୍ତି । ସେ କହିଛନ୍ତି କେହି ଜଣେ ଅଛି ଯିଏ ରୋହିତ ଶର୍ମାଙ୍କୁ ପସନ୍ଦ କରନ୍ତି ନାହିଁ । ଉକ୍ତ ବ୍ୟକ୍ତି ଚାହେଁ ନାହିଁ ଯେ ହିଟମ୍ୟାନ ଦିନିକିଆ ଦଳର ଅଂଶ ହୁଅନ୍ତୁ । ତାଙ୍କୁ ଟିମ୍ ଇଣ୍ଡିଆରୁ ବାହାର କରିବା ପାଇଁ ହିଁ ଭାରତୀୟ କ୍ରିକେଟରେ ନୂଆ ବ୍ରୋଙ୍କୋ ଟେଷ୍ଟ ଅଣାଯାଇଛି । ସାଧାରଣତଃ ରବବି ଖେଳାଳିଙ୍କ ପାଇଁ ଏହି ଟେଷ୍ଟ ରହିଥାଏ ।
ତେବେ ଟିମ୍ ଇଣ୍ଡିଆର ଷ୍ଟ୍ରେଙ୍ଗଥ ଆଣ୍ଡ କଣ୍ଡିସନିଂ କୋଚ୍ ଆଡ୍ରିୟ ଲେ ରକ୍ସଙ୍କ ତତ୍ୱାବଧାନରେ ଏହି ଟେଷ୍ଟକୁ ଭାରତୀୟ କ୍ରିକେଟରେ ଲାଗୁ କରାଯାଉଛି । ଏବେ ଖେଳାଳିଙ୍କୁ ଦଳରେ ଚୟନ ପାଇଁ ହେଲେ ୟୋ ୟୋ ଟେଷ୍ଟ, ୨ କିଲୋମିଟର ଦୌଡ ସହ ବ୍ରୋଙ୍କୋ ଟେଷ୍ଟରେ ଉତ୍ତୀର୍ଣ୍ଣ ହେବାକୁ ପଡିବ । କ୍ରିକଟ୍ରାକର ସହ ଆଲୋଚନା ବେଳେ ମନୋଜ ତିୱାରୀ କହିଛନ୍ତି, ବ୍ରୋଙ୍କୋ ଟେଷ୍ଟ ଆଣିବାର ସମୟ ଏବଂ ଏହି ଫିଟନେସ୍ ଟେଷ୍ଟ ପଛର ଉଦ୍ଦେଶ୍ୟରୁ ଅନେକ ଗମ୍ଭୀର ପ୍ରଶ୍ନ ଉଠୁଛି । ବିଶେଷ କରି ଏହି ନିୟମ ସେହି ସମୟରେ ଅଣାଯାଉଛି ଯେତେବେଳେ ଭାରତୀୟ ଦଳ ୨୦୨୭ ବିଶ୍ୱକପ୍ ପୂର୍ବରୁ ଟ୍ରାଞ୍ଜିଟ ପର୍ଯ୍ୟାୟ ଦେଇ ଗତି କରୁଛି ।
ମନୋଜ ତିୱାରୀ କହିଛନ୍ତି, ମୋତେ ଲାଗୁଛି ବିରାଟ କୋହଲିଙ୍କୁ ୨୦୦୭ ବିଶ୍ୱକପର ଯୋଜନାରୁ ବାହାରେ ରଖିବା ମୁସ୍କିଲ ହେବ । ମାତ୍ର ମୋତେ ସନ୍ଦେହ ଯେ ଉକ୍ତ ଲୋକମାନେ ରୋହିତ ଶର୍ମାଙ୍କୁ ନେଇ କିଛି ଅଲଗା ଚିନ୍ତା କରୁଛନ୍ତି । ସେମିତିରେ ବି ଭାରତୀୟ କ୍ରିକେଟର ସବୁଠୁ ଫିଟ୍ ରହୁଥିବା ଖେଳାଳିଙ୍କ ତାଲିକାରେ ରୋହିତ ଶର୍ମା ଆସୁ ନାହାନ୍ତି । ମାତ୍ର ସେ ଯେଉଁଭଳି ପ୍ରଦର୍ଶନ କରୁଛନ୍ତି ସେଥିରେ ତାଙ୍କୁ ବେଞ୍ଚରେ ବସାଇବା ମୁସ୍କିଲ । ତେଣୁ ବ୍ରୋଙ୍କୋ ଟେଷ୍ଟ ଲାଗୁ କରାଯାଉଛି ଯଦ୍ୱାରା ରୋହିତଙ୍କୁ ଦଳରୁ ବାଦ୍ ଦିଆଯାଇ ପାରିବ । କାରଣ ବ୍ରୋଙ୍କୋ ଟେଷ୍ଟ ପାସ୍ କରିବାକୁ ହେଲେ ରୋହିତଙ୍କୁ ବହୁତ ପରିଶ୍ରମ କରିବାକୁ ପଡିବ ।
Also read: ଇସ୍ତଫା ଦେଲେ ରୋଜର ବିନ୍ନି, ରାଜୀବ ଶୁକ୍ଳା ହେଲେ ବିସିିସିଆଇର କାର୍ଯ୍ୟକାରୀ ଅଧ୍ୟକ୍ଷ