ଭୁବନେଶ୍ୱର: ବିଜୁ ଜନତା ଦଳକୁ ଏକ ଶକ୍ତ ଝଟକା ଲାଗିଛି । ରାଜ୍ୟସଭା ନିର୍ବାଚନରେ କ୍ରସ୍ ଭୋଟିଂ କରିବା ଅଭିଯୋଗରେ ଅଯୋଗ୍ୟ ଘୋଷଣା କରିବାକୁ ବିଜେଡ଼ି ପକ୍ଷରୁ କରାଯାଇଥିବା ଆବେଦନ ଖାରଜ ହୋଇଛି । ବାଚସ୍ପତି ସୁରମା ପାଢ଼ୀ ଆବେଦନକୁ ଖାରଜ କରିବା ସହିତ ୮ ବିଧାୟକଙ୍କ ସଭ୍ୟ ପଦକୁ ବଜାୟ ରଖିଛନ୍ତି । 

ଗତ ରାଜ୍ୟସଭା ନିର୍ବାଚନରେ ବିଜେଡ଼ିର ୮ ଜଣ ସଦସ୍ୟ ଦଳୀୟ ହ୍ୱିପକୁ ଅବମାନନା କରି ସ୍ୱାଧୀନ ପ୍ରାର୍ଥୀ ଦିଲ୍ଲୀପ ରାୟଙ୍କୁ ଭୋଟ୍ ଦେଇଥିଲେ । ରମାକାନ୍ତ ଭୋଇ, ଅରବିନ୍ଦ ମହାପାତ୍ର, ନବକିଶୋର ମଲ୍ଲିକ, ସନାତନ ମହାକୁଡ଼, ଚକ୍ରମଣି କହଁର ଓ ସୁବାସିନୀ ଜେନାଙ୍କୁ ଦଳ ନିଲମ୍ବିତ କରିବା ସହିତ ଅଯୋଗ୍ୟ ଘୋଷଣା କରିବାକୁ ବିଜେଡ଼ି ମୁଖ୍ୟ ସଚେତକ ପ୍ରମିଳା ମଲ୍ଲିକ ବିଧାନସଭା ବାଚସ୍ପତିଙ୍କ ନିକଟରେ ଆବେଦନ କରିଥିଲେ । ସମସ୍ତ ବିଧାୟକମାନେ ସ୍ୱେଚ୍ଛାକୃତଭାବେ ଦଳର ସଦସ୍ୟତା ତ୍ୟାଗ କରିଥିବାରୁ ବାଚସ୍ପତି ଆବେଦନକୁ ଖାରଜ କରିଛନ୍ତି । 

ଉଲ୍ଲେଖ ଯୋଗ୍ୟ ଗତ ମାର୍ଚ୍ଚ ୧୬ରେ ଅନୁଷ୍ଠିତ ରାଜ୍ୟସଭା ନିର୍ବାଚନରେ ବିଜେଡ଼ିର ଉପରୋକ୍ତ ୮ ଜଣ ସଦସ୍ୟ ଦଳୀୟ ହ୍ୱିପକୁ ଅବମାନନା କରି ସ୍ୱାଧୀନ ପ୍ରାର୍ଥୀ ଦିଲ୍ଲୀପ ରାୟଙ୍କୁ ଭୋଟ୍ ଦେଇଥିଲେ । ଅରବିନ୍ଦ ମହାପାତ୍ର ଓ ସନାତନ ମହାକୁଡ଼ଙ୍କ ଦଳ ନିର୍ବାଚନ ପୂର୍ବରୁ ନିଲମ୍ବିତ କରିସାରିଥିଲା । ଏଥିରେ ଦିଲ୍ଲୀପ ରାୟ ବିଜୟୀ ହୋଇଥିବାବେଳେ କଂଗ୍ରେସ-ବିଜେଡ଼ିର ମିଳିତ ପ୍ରାର୍ଥୀ ଡାକ୍ତର ଦତ୍ତେଶ୍ୱର ହୋତା ପରାଜିତ ହୋଇଥିଲେ ।