ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଶନିବାର ଦିନ “ଭଲ ଲୋକଙ୍କୁ” ବାଛିବା ଉପରେ ଜୋର ଦେଇଛନ୍ତି ଏବଂ ୨୦୧୭ ପୂର୍ବ ସମୟକୁ ସୂଚାଇ କହିଛନ୍ତି ଯେ, ସେତେବେଳେ “ବିକାଶ କେବଳ ଗୋଟିଏ ଗାଁ ମଧ୍ୟରେ ସୀମିତ ଥିଲା।” ଯୋଗୀ ଆଦିତ୍ୟନାଥ କହିଛନ୍ତି, “ଯଦି ଆପଣ ଭଲ ଲୋକ ଏବଂ ଭଲ ସରକାର ବାଛିବେ, ତେବେ ପରିଣାମ ଭଲ ହେବ। ଯଦି ଭୁଲ ଲୋକ ନିର୍ବାଚିତ ହେବେ, ତେବେ କେହି ଆପଣଙ୍କୁ ତାର ଖରାପ ପରିଣାମରୁ ରକ୍ଷା କରିପାରିବେ ନାହିଁ।”

ଏହା ସହିତ ଯୋଗୀ ଚେତାବନୀ ଦେଇ କହିଛନ୍ତି ଯେ, ଯଦି କେହି ବି ଉତ୍ସବର ରଙ୍ଗରେ ଭଙ୍ଗ ପକାଇବାକୁ ଚେଷ୍ଟା କରେ, ତେବେ ତାର ବର୍ତ୍ତମାନ ତ ନଷ୍ଟ ହେବ, ସହିତ ତାର ଭବିଷ୍ୟତ ମଧ୍ୟ ସମ୍ପୂର୍ଣ୍ଣ ଭାବେ ସ୍ଵାହା ହୋଇଯିବ। ସେ ଆହୁରି ମଧ୍ୟ କହିଛନ୍ତି, “ଏବଂ, ଏମିତି ହିଁ ହେଉଥିଲା। ୨୦୧୭ ପୂର୍ବରୁ, ଯେତେବେଳେ ଭୁଲ ସରକାର ଆସୁଥିଲା, ସେତେବେଳେ ବିକାଶ କେବଳ ଗୋଟିଏ ଗାଁ ମଧ୍ୟରେ ସୀମିତ ହୋଇ ରହିଯାଉଥିଲା।”

ଗୋଣ୍ଡାରେ ୫୧୬ କୋଟି ଟଙ୍କାର ପ୍ରକଳ୍ପର ଲୋକାର୍ପଣ ଓ ଶିଳାନ୍ୟାସ

ସେ ଆହୁରି ମଧ୍ୟ କହିଛନ୍ତି ଯେ ତାଙ୍କ ସରକାର ରାଜ୍ୟର ବିଭିନ୍ନ ଜିଲ୍ଲାରେ ମେଡିକାଲ କଲେଜ ନିର୍ମାଣ କରିଛନ୍ତି। ଆଦିତ୍ୟନାଥ କହିଛନ୍ତି, “(ଯେତେବେଳେ) ଆମକୁ ମେଡିକାଲ କଲେଜ ତିଆରି କରିବାର ଥିଲା, ଆମେ ଏହା କହିନଥିଲୁ ଯେ ଏହା କେବଳ ସୈଫଇ (ସମାଜବାଦୀ ପାର୍ଟିର ଯାଦବ ପରିବାରର ପୈତୃକ ଗାଁ) ରେ ନିର୍ମାଣ ହେବ। ଆମେ କହିଲୁ ଯେ ଏହା ଗୋଣ୍ଡା, ବହରାଇଚ୍, ବଲରାମପୁର, ଅଯୋଧ୍ୟା ଏବଂ ବସ୍ତିରେ ନିର୍ମାଣ ହେବ।”

ମୁଖ୍ୟମନ୍ତ୍ରୀ ଗୋଣ୍ଡାରେ ୫୧୬ କୋଟି ଟଙ୍କାର ୨୬୨ଟି ପ୍ରକଳ୍ପର ଉଦଘାଟନ ଓ ଶିଳାନ୍ୟାସ ସମାରୋହରେ ଅଭିଭାଷଣ ଦେଉଥିଲେ। ସେହି ସମୟକୁ ମନେ ପକାଇ ସେ କହିଥିଲେ, ଯେତେବେଳେ ଗୋଣ୍ଡାକୁ ଦେଶର ସବୁଠାରୁ ଅପରିଷ୍କାର (ଅସନ୍ତୋଷଜନକ ସ୍ୱଚ୍ଛତା ଥିବା) ସହର କୁହାଯାଉଥିଲା।

ଯୋଗୀ ଆଦିତ୍ୟନାଥ କହିଛନ୍ତି, “ଯଦି ୨୦୧७ ରେ ଦେଶର ସବୁଠାରୁ ଅପରିଷ୍କାର ସହର ବିଷୟରେ ଚର୍ଚ୍ଚା ହେଉଥିଲା, ତେବେ ସେଇଟା ଗୋଣ୍ଡା ଥିଲା। କିନ୍ତୁ ଆଜି, ମୁଁ କହିପାରିବି ଯେ ଗୋଣ୍ଡା ଦେଶର ସ୍ୱଚ୍ଛ ସହରଗୁଡ଼ିକ ମଧ୍ୟରୁ ଅନ୍ୟତମ ଭାବେ ନିଜର ପରିଚୟ ସୃଷ୍ଟି କରୁଛି। ଯେତେବେଳେ ଭୁଲ ସରକାର ନିର୍ବାଚିତ ହୁଏ, ସେତେବେଳେ ପରିଣାମ ଭୁଲ ହୁଏ। ଆଜି ଗୋଣ୍ଡା ସ୍ୱଚ୍ଛ ଅଛି ଏବଂ ଏକ ନୂଆ ପରିଚୟ ସହିତ ଆଗକୁ ବଢ଼ୁଛି।”

ଉତ୍ସବର ରଙ୍ଗରେ ଯଦି କେହି ଭଙ୍ଗ ପକାଇବାକୁ ଚେଷ୍ଟା କରେ ତେବେ…

ଏହା ସହିତ ଯୋଗୀ କହିଛନ୍ତି ଯେ, ବର୍ଷ ୨୦୧୫-୧୬ ସମୟରେ ଗୋଣ୍ଡାରେ ଦୁର୍ଗାପୂଜା ଅବସରରେ ଦଙ୍ଗା ସୃଷ୍ଟି କରିବାକୁ ଚେଷ୍ଟା କରାଯାଇଥିଲା ଏବଂ ସେହି ସମୟରେ ମା’ ଦୁର୍ଗାଙ୍କ ମୂର୍ତ୍ତି ବିସର୍ଜନକୁ ରୋକାଯାଇଥିଲା। ଏପରିକି ରାମଲୀଳାରେ ମଧ୍ୟ ବାଧା ସୃଷ୍ଟି କରାଯାଇଥିଲା ଏବଂ ପର୍ବପର୍ବାଣୀ ଆରମ୍ଭ ହେବା ମାତ୍ରେ ହିଁ ଗଣ୍ଡଗୋଳ ଆରମ୍ଭ ହୋଇଯାଉଥିଲା।

ସେ କହିଛନ୍ତି ଯେ ସେତେବେଳେ ନା ଝିଅମାନେ ସୁରକ୍ଷିତ ଥିଲେ ନା ବ୍ୟବସାୟୀମାନେ। ୨୦୧୭ ପୂର୍ବରୁ ୟୁପିରେ କ୍ଷମତାରେ ଥିବା ଲୋକେ ଗୁଣ୍ଡାମାନଙ୍କୁ ଆଶ୍ରୟ ଦେଉଥିଲେ ଏବଂ ରାଜ୍ୟରେ ମାସ ମାସ ଧରି କରଫ୍ୟୁ ଲାଗି ରହୁଥିଲା। କିନ୍ତୁ ଏବେ ଯଦି କେହି ଉତ୍ସବର ରଙ୍ଗରେ ଭଙ୍ଗ ପକାଇବାକୁ ଚେଷ୍ଟା କରିବ, ତେବେ ତାର ବର୍ତ୍ତମାନ ଏବଂ ଭବିଷ୍ୟତ ଉଭୟ ହିଁ ସ୍ଵାହା  ହୋଇଯିବ।