ଚେନ୍ନାଇ: ତାମିଲନାଡୁର ପୂର୍ବତନ ଗଣ ଶିକ୍ଷା ମନ୍ତ୍ରୀ ଅନବିଲ ମହେଶ ପୋୟ୍ୟାମୋଝିଙ୍କୁ ସିବିଆଇ ଗିରଫ କରିଛି । ଘରୋଇ ବିଦ୍ୟାଳୟଗୁଡ଼ିକୁ ଲାଇସେନ୍ସ ଏବଂ ଅନ୍ୟାନ୍ୟ ଅନୁମତି ପ୍ରଦାନ କରିବା ସହ ଜଡ଼ିତ ୧୦୦ କୋଟି ଟଙ୍କାର ଏକ କଥିତ ଦୁର୍ନୀତି ମାମଲାରେ ତାଙ୍କୁ ଗିରଫ କରାଯାଇଛି। 

ସୋମବାର ଦିନ ମାଡ୍ରାସ ହାଇକୋର୍ଟ ମହେଶଙ୍କ ଅଗ୍ରୀମ ଜାମିନ ଆବେଦନକୁ ଖାରଜ କରିଦେବା ପରେ ତାଙ୍କୁ ଗିରଫ କରାଯାଇଛି। ବିଚାରପତି ଭି. ଲକ୍ଷ୍ମୀନାରାୟଣନ ପୂର୍ବତନ ମନ୍ତ୍ରୀଙ୍କ ଏହି ଆବେଦନକୁ ଖାରଜ କରିଦେଇଥିଲେ, ଯେଉଁଥିରେ ସେ ଗିରଫଦାରୀରୁ ସୁରକ୍ଷା ଲୋଡ଼ିଥିଲେ । ମହେଶ ନିଜ ବିରୋଧରେ ରୁଜୁ ହୋଇଥିବା ଏଫ୍‌ଆଇଆର୍ (FIR) କୁ ରଦ୍ଦ କରିବା ପାଇଁ ମଧ୍ୟ କୋର୍ଟଙ୍କ ଦ୍ୱାରସ୍ଥ ହୋଇଛନ୍ତି।

ତଦନ୍ତ ସମୟରେ ସଂଗୃହୀତ ପ୍ରମାଣ, ଯେଉଁଥିରେ ଡିଜିଟାଲ୍ ଉପକରଣରୁ ମିଳିଥିବା ତଥ୍ୟ ଏବଂ ପଚରାଉଚରା ସମୟରେ ରେକର୍ଡ କରାଯାଇଥିବା ବୟାନକୁ ତର୍ଜମା କଲେ ତାହା ଏକ ସ୍ପଷ୍ଟ ଦୁର୍ନୀତିକୁ ଦର୍ଶାଉଛି । 'ଦୁର୍ନୀତି ନିବାରଣ ଆଇନ' ଅଧୀନରେ ଡିଏମକେ ନେତାଙ୍କ ବିରୋଧରେ ସିବିଆଇ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି । ପୂର୍ବତନ ମନ୍ତ୍ରୀ ଏହି ଅଭିଯୋଗଗୁଡ଼ିକୁ ଖଣ୍ଡନ କରିବା ସହ ତାଙ୍କ ବିରୋଧରେ ଦାୟର ହୋଇଥିବା ମାମଲାକୁ ଚ୍ୟାଲେଞ୍ଜ କରିଛନ୍ତି।

ତାମିଲନାଡୁର ଘରୋଇ ବିଦ୍ୟାଳୟଗୁଡ଼ିକର ସଂଘ 'ଫେଡେରେସନ୍ ଅଫ୍ ଆସୋସିଏସନ୍ସ ଅଫ୍ ପ୍ରାଇଭେଟ୍ ସ୍କୁଲ୍ସ'ର ସମ୍ପାଦକ ଡି.ସି. ଇଲାଙ୍ଗୋଭାନଙ୍କ ଅଭିଯୋଗ କ୍ରମେ ଏହି ମାମଲା ପଞ୍ଜୀକୃତ ହୋଇଛି। ଏକ ଅଣ-ପଞ୍ଜୀକୃତ ସଂସ୍ଥା 'ତାମିଲନାଡୁ ପ୍ରାଇଭେଟ୍ ସ୍କୁଲ୍ସ ଆସୋସିଏସନ୍' ର ପ୍ରତିଷ୍ଠାତା ତଥା ସଭାପତି ବି.ଟି. ଅର୍ସାକୁମାର ଏବଂ କୋଷାଧ୍ୟକ୍ଷ ମୁଥୁକୁମାର ଘରୋଇ ବିଦ୍ୟାଳୟଗୁଡ଼ିକର ପରିଚାଳନା କର୍ତ୍ତୃପକ୍ଷଙ୍କ ଠାରୁ ୧୦୦ କୋଟି ଟଙ୍କାରୁ ଅଧିକ ଅର୍ଥ ସଂଗ୍ରହ କରିଥିଲେ।

ସିବିଆଇକୁ ଏହି ମାମଲା ହସ୍ତାନ୍ତର କରାଯାଇଥିଲା । ସରକାରୀ ଅନୁମତି ଦେବାର ପ୍ରତିଶ୍ରୁତି ଦେଇ ଘରୋଇ ଶିକ୍ଷାନୁଷ୍ଠାନଗୁଡ଼ିକ ଠାରୁ ଅର୍ଥ ଆଦାୟ କରାଯାଇଥିବା ନେଇ ଆସିଥିବା ଅଭିଯୋଗର ତଦନ୍ତ ପରେ ଏହି ଗିରଫଦାରୀ କରାଯାଇଛି। ତଦନ୍ତକାରୀ ଅଧିକାରୀମାନେ ଏହି ଘଟଣା ଦ୍ୱାରା ପ୍ରଭାବିତ ହୋଇଥିବା ସନ୍ଦେହ କରାଯାଉଥିବା ୧୭୭ଟି ବିଦ୍ୟାଳୟକୁ ଚିହ୍ନଟ କରିଛନ୍ତି ।

ସେପଟେ ଡିଏମକେ ଅଭିଯୋଗ କରିଛି ଯେ, ତାମିଲନାଡୁର ଶାସକ ଦଳ ଟିଭିକେ ରାଜନୈତିକ ବିରୋଧୀଙ୍କୁ ଟାର୍ଗେଟ୍ କରିବା ପାଇଁ ତଦନ୍ତକାରୀ ସଂସ୍ଥାଗୁଡ଼ିକର ବ୍ୟବହାର କରୁଛି।