ନୂଆଦିଲ୍ଲୀ: ଦିଲ୍ଲୀରେ ବୋମା ଧମକ ମାମଲା ଥମିବାର ନାଁ ନେଉନାହିଁ । ଶୁକ୍ରବାର ଦିଲ୍ଲୀ ହାଇକୋର୍ଟକୁ ଏକ ଇମେଲ୍ ମାଧ୍ୟମରେ ବୋମା ଧମକ ମିଳିଛି । ବିଚାରପତିଙ୍କ ଚାମ୍ବର ଏବଂ ଅନ୍ୟାନ୍ୟ ସ୍ଥାନରେ ତିନୋଟି ବୋମା ରଖାଯାଇଛି । ଅପରାହ୍ନ ନମାଜ ପରେ ବିସ୍ଫୋରଣ ହେବ । ତେଣୁ ଅପରାହ୍ନ 2ଟା ସୁଦ୍ଧା କୋର୍ଟ ପରିସର ଖାଲି କରିବାକୁ ଇମେଲରେ କୁହାଯାଇଛି । ଧମକ ପୂର୍ଣ୍ଣ ଇମେଲ ମିଳିବା ପରେ କୋର୍ଟ ପରିସରରେ ଯାଞ୍ଚ ଆରମ୍ଭ ହୋଇଯାଇଛି । 

ସୂଚନା ଅନୁଯାୟୀ, ଦିଲ୍ଲୀ ହାଇକୋର୍ଟକୁ ଏକ ଇମେଲ୍ ମିଳିଥିଲା ଯେଉଁଥିରେ ଲେଖାଯାଇଥିଲା ଯେ, 'ଆଜି ଅପରାହ୍ନରେ ଇସଲାମିକ୍ ନମାଜ ପରେ ବିଚାରପତିଙ୍କ ଚାମ୍ବରରେ ବିସ୍ଫୋରଣ ହେବ । "kanimozhi.thevidiya@outlook.com" ନାମରେ ଇମେଲ ଆସିଥିଲା । ଏହି ଇମେଲ୍ ପାଇବା ପରେ, ସୁରକ୍ଷା ଦୃଷ୍ଟିରୁ ହାଇକୋର୍ଟ ପରିସରକୁ ଖାଲି କରାଯାଇଥିଲା। ଓକିଲ ଏବଂ ବିଚାରପତିମାନଙ୍କୁ ପରିସରରୁ ଖାଲି କରାଯାଇଥିଲା। ସୁରକ୍ଷା ଏଜେନ୍ସିଗୁଡ଼ିକ ଘଟଣାସ୍ଥଳରେ ପହଞ୍ଚିଛନ୍ତି ଯାଞ୍ଚ କରୁଛନ୍ତି । 

ପୂର୍ବରୁ ମଧ୍ୟ ଏଭଳି ଅନେକ ମିଥ୍ୟା ବୋମା ଧମକ ମିଳିଛି । ଦିଲ୍ଲୀର ଏକାଧିକ ସ୍କୁଲ ଏବଂ ସପିଂ ମଲକୁ ମଧ୍ୟ ବୋମା ବିସ୍ଫୋରଣ ଧମକ ମିଳିଛି । କିନ୍ତୁ ଯାଞ୍ଚ ପରେ କୌଣସି ବିସ୍ଫୋରକ ସାମଗ୍ରୀ ମିଳି ନାହିଁ ।