ନୂଆଦିଲ୍ଲୀ: ତାମିଲନାଡୁରେ ଭୋଟରଙ୍କ ସ୍ୱତନ୍ତ୍ର ସଘନ ସଂଶୋଧନ ପ୍ରକ୍ରିୟା ପ୍ରାୟତଃ ଶେଷ ହେବାକୁ ବସିଛି । ଏସ୍ଆଇଆର୍ ପରେ ନିର୍ବାଚନ କମିଶନ ଚୂଡ଼ାନ୍ତ ଭୋଟର ତାଲିକା ପ୍ରକାଶ କରିଛନ୍ତି । ରାଜ୍ୟ ମୁଖ୍ୟ ନିର୍ବାଚନ ଅଧିକାରୀ ଅର୍ଚ୍ଚନା ପଟ୍ଟନାୟକ ସୋମବାର ଚୂଡ଼ାନ୍ତ ଭୋଟର ତାଲିକା ପ୍ରକାଶ କରିଛନ୍ତି । ବିଭିନ୍ନ ବର୍ଗ ଅଧୀନରେ ମୋଟ ୯୭ ଲକ୍ଷ ୩୭ ହଜାର ମତଦାତାଙ୍କ ନାମ ଭୋଟର୍ ତାଲିକାରୁ ବାଦ ଦିଆଯାଇଛି । 

ଚେନ୍ନାଇରେ ଏକ ସାମ୍ବାଦିକ ସମ୍ମିଳନୀରେ ମୁଖ୍ୟ ନିର୍ବାଚନ ଅଧିକାରୀ ଅର୍ଚ୍ଚନା ପଟ୍ଟନାୟକ ଯେ ଏବେ ତାମିଲନାଡ଼ୁରେ ୫ କୋଟି ୬୭ ଲକ୍ଷ  ୭ ହଜାର ୩୮୦ ଜଣ ମତଦାତା ଅଛନ୍ତି । ଏଥିରେ ୨ କୋଟି ୭୭ ଲକ୍ଷ ୩୮ ହଜାର ୯୨୫ ପୁରୁଷ, ୨ କୋଟି ୮୯ ଲକ୍ଷ ୬୦ ହଜାର ୮୩୮ ମହିଳା ଏବଂ ୭ ହଜାର ୬୧୭ ତୃତୀୟ ଲିଙ୍ଗ ଭୋଟର ଅନ୍ତର୍ଭୁକ୍ତ । ଏସ୍ଆଇଆର୍ ପୂର୍ବରୁ ରାଜ୍ୟରେ ଭୋଟରଙ୍କ ସଂଖ୍ୟା ୬ କୋଟି ୪୧ ଲକ୍ଷ ଥିଲା। ୧୮-୧୯ ବୟସ ବର୍ଗର ୭ ଲକ୍ଷ ୪୦ ହଜାର ନୂତନ ଭୋଟରଙ୍କୁ ତାଲିକାରେ ଯୋଡା ଯାଇଛି । ବିଭିନ୍ନ ବର୍ଗର ମୋଟ ୯୭ ଲକ୍ଷ ୩୭ ହଜାର ଭୋଟରଙ୍କ ନାମ ବାଦ ଦିଆଯାଇଛି । ତାଲିକାରୁ ବାଦ୍ ପଡ଼ିଥିବା ନାମ ମୃତ ମତଦାତାଙ୍କର ବୋଲି ନିର୍ବାଚନ ଅଧିକାରୀ ସ୍ପଷ୍ଟ କରିଛନ୍ତି । 

ସୁପ୍ରିମକୋର୍ଟଙ୍କ ନିର୍ଦ୍ଦେଶ ପାଳନ ପୂର୍ବକ "ତାର୍କିକ ଅସଙ୍ଗତି" ବର୍ଗରେ ବାଦ ଦିଆଯାଇଥିବା ନାମଗୁଡ଼ିକୁ ବାଦ ଦେବାର କାରଣ ସହିତ ସାର୍ବଜନୀନ ଭାବରେ ପ୍ରଦର୍ଶିତ କରାଯିବା ଆବଶ୍ୟକ। ଏହି ତାଲିକାଗୁଡ଼ିକ ଗ୍ରାମ ପଞ୍ଚାୟତ କାର୍ଯ୍ୟାଳୟ, ସାର୍ବଜନୀନ ସ୍ଥାନ, ତାଲୁକା ଏବଂ ଉପ-ବିଭାଗ କାର୍ଯ୍ୟାଳୟ ଏବଂ ସହରାଞ୍ଚଳରେ ୱାର୍ଡ କାର୍ଯ୍ୟାଳୟରେ ପ୍ରଦର୍ଶିତ ହୋଇଥିଲା। ପ୍ରଭାବିତ ବ୍ୟକ୍ତିମାନଙ୍କୁ ଆପତ୍ତି ଦାଖଲ କରିବାକୁ କିମ୍ବା ସ୍ପଷ୍ଟୀକରଣ ଦାଖଲ କରିବାକୁ ୧୦ ଦିନ ସମୟ ଦିଆଯାଇଥିଲା। ତା'ପରେ ଜିଲ୍ଲା ନିର୍ବାଚନ ଅଧିକାରୀ ସେମାନଙ୍କ ନିଜ ନିଜ ଜିଲ୍ଲାରେ ଚୂଡ଼ାନ୍ତ ଭୋଟର ତାଲିକା ପ୍ରକାଶ କରିଥିଲେ।

ପ୍ରକାଶ ଯୋଗ୍ୟ, ଦ୍ୱିତୀୟ ପର୍ଯ୍ୟାୟରେ ନଅଟି ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳରେ ପ୍ରାୟ ଆଠ ପ୍ରତିଶତ ଭୋଟରଙ୍କ ନାମ ବାଦ ଦିଆଯାଇଛି । କିଛି ଦିନ ପୂର୍ବେ ପ୍ରକାଶିତ ଚୂଡ଼ାନ୍ତ ଭୋଟର ତାଲିକା ଅନୁଯାୟୀ, ପଡ଼ୋଶୀ କେନ୍ଦ୍ରଶାସିତ ଅଞ୍ଚଳ ପୁଡୁଚେରୀରେ ମୋଟ ଭୋଟରଙ୍କ ସଂଖ୍ୟା ୯ ଲକ୍ଷ ୪୪ ହଜାର ୨୧୧ । ଶୋଲିଙ୍ଗାନାଲ୍ଲୁରରେ ମୋଟ ୫,୩୬,୯୯୧ ଭୋଟର ଅଛନ୍ତି, ଯେଉଁଥିରୁ ୨,୬୨,୬୨୧ ପୁରୁଷ ଭୋଟର, ୨,୭୪,୨୫୪ ମହିଳା ଭୋଟର ଏବଂ ୧୧୬ ତୃତୀୟ ଲିଙ୍ଗ ଭୋଟର।