ଚେନ୍ନାଇ: ତାମିଲନାଡ଼ର ସରକାରୀ ବିଦ୍ୟାଳୟଗୁଡ଼ିକରେ ପଢ଼ୁଥିବା ଛାତ୍ରଛାତ୍ରୀଙ୍କ ପାଇଁ ଏକ ଚର୍ଚ୍ଚିତ ପଦକ୍ଷେପ ନେବାକୁ ଯାଉଛି ରାଜ୍ୟ ସରକାର। ମଧ୍ୟାହ୍ନ ଭୋଜନ ଯୋଜନା ଅଧୀନରେ ଏବେ ଛାତ୍ରଛାତ୍ରୀଙ୍କୁ ସପ୍ତାହରେ ଗୋଟିଏ ଦିନ ଚିକେନ୍ ବିରିଆନି ପ୍ରଦାନ କରିବାକୁ ଯୋଜନା କରାଯାଉଛି। ରାଜ୍ୟର ମୁଖ୍ୟମନ୍ତ୍ରୀ ଜୋସେଫ୍ ବିଜୟଙ୍କ ଏହି ବଡ଼ ସ୍ୱପ୍ନକୁ ସାକାର କରିବା ଦିଗରେ କାର୍ଯ୍ୟ ଆରମ୍ଭ ହୋଇଯାଇଛି।

ପ୍ରଥମେ ପାଇଲଟ୍ ପ୍ରୋଜେକ୍ଟ ଜରିଆରେ ଯାଞ୍ଚ

ଏହି ନୂତନ ଯୋଜନାକୁ ହଠାତ୍ ସମଗ୍ର ରାଜ୍ୟରେ ଲାଗୁ ନକରି ପ୍ରଥମେ ଏକ 'ପାଇଲଟ୍ ପ୍ରୋଜେକ୍ଟ' ମାଧ୍ୟମରେ ପରୀକ୍ଷା କରାଯିବ ବୋଲି ରାଜ୍ୟ ଶିକ୍ଷା ମନ୍ତ୍ରୀ ରାଜ ମୋହନ ସ୍ପଷ୍ଟ କରିଛନ୍ତି। କିଛି ନିର୍ଦ୍ଦିଷ୍ଟ ସ୍କୁଲକୁ ନେଇ ଆରମ୍ଭ ହେବାକୁ ଥିବା ଏହି ପ୍ରକଳ୍ପ ଜରିଆରେ ଖାଦ୍ୟ ପ୍ରସ୍ତୁତିର ମାନ, ସ୍ୱଚ୍ଛତା ଏବଂ ସୁରକ୍ଷା ମାନଦଣ୍ଡକୁ ନିରୀକ୍ଷଣ କରାଯିବ। ସମସ୍ତ ବ୍ୟବସ୍ଥା ଠିକ୍ ଭାବେ ପରିଚାଳିତ ହେବା ପରେ ହିଁ ଏହାକୁ ବ୍ୟାପକ ସ୍ତରରେ ଲାଗୁ କରାଯିବ।

"ଜେଲ୍ କଏଦୀଙ୍କୁ ମିଳିଲେ, ପିଲାଙ୍କୁ କାହିଁକି ନୁହେଁ?"

ଏହି ପ୍ରସଙ୍ଗରେ ମନ୍ତ୍ରୀ ରାଜ ମୋହନ ଏକ ଯୁକ୍ତିଯୁକ୍ତ ଏବଂ ଚର୍ଚ୍ଚିତ ବୟାନ ଦେଇ କହିଛନ୍ତି ଯେ, ଯେତେବେଳେ ରାଜ୍ୟର ବିଭିନ୍ନ ଜେଲରେ କଏଦୀମାନଙ୍କୁ ନିୟମିତ ଭାବେ ଚିକେନ୍ ବିରିଆନି ପରିବେଷଣ କରାଯାଉଛି, ସେତେବେଳେ ଦେଶର ଭବିଷ୍ୟତ ତଥା ମଧ୍ୟାହ୍ନ ଭୋଜନ ଉପରେ ନିର୍ଭର କରୁଥିବା ଏହି କୋମଳମତି ଶିଶୁମାନେ କାହିଁକି ଏହାରୁ ବଞ୍ଚିତ ହେବେ? ବଢ଼ିବା ବୟସରେ ପିଲାମାନଙ୍କ ଶରୀରକୁ ପର୍ଯ୍ୟନ୍ତ ପୋଷଣ ଏବଂ ପ୍ରୋଟିନ୍ ଆବଶ୍ୟକ ହୋଇଥାଏ, ଯାହାକୁ ଦୃଷ୍ଟିରେ ରଖି ଏହି ପଦକ୍ଷେପ ନିଆଯାଉଛି।

କେମିତି ଆସିଲା ଏହି ଚିନ୍ତାଧାରା ?

ଗତ ଜୁଲାଇ ମାସରେ ପ୍ରଥମ ଥର ପାଇଁ ଏହି ପ୍ରସ୍ତାବ ସାମ୍ନାକୁ ଆସିଥିଲା। ସରକାରୀ ସ୍କୁଲର ଛାତ୍ରଛାତ୍ରୀଙ୍କୁ ପୁଷ୍ଟିକର ଖାଦ୍ୟ ଯୋଗାଇବା ଉଦ୍ଦେଶ୍ୟରେ ଏହି ବିଷୟ ମୁଖ୍ୟମନ୍ତ୍ରୀ ବିଜୟଙ୍କ ସମ୍ମୁଖରେ ଉପସ୍ଥାପନ କରାଯାଇଥିଲା। ଏହି ପ୍ରସ୍ତାବ ଉପରେ ଚୂଡ଼ାନ୍ତ ନିଷ୍ପତ୍ତି ମୁଖ୍ୟମନ୍ତ୍ରୀଙ୍କୁ ନେବାର ଥିବାବେଳେ, ବର୍ତ୍ତମାନ ଏହାକୁ କାର୍ଯ୍ୟକାରୀ କରିବା ପାଇଁ ପ୍ରଶାସନିକ ସ୍ତରରେ ପ୍ରସ୍ତୁତି ଜୋରଦାର କରାଯାଇଛି।