ହରିୟାଣା: ରାଫେଲ୍‌ରେ ଉଡ଼ିଲେ ରାଷ୍ଟ୍ରପତି ଦ୍ରୌପଦୀ ମୁର୍ମୁ। ବୁଧବାର ହରିୟାଣାର ଅମ୍ବାଲା ବାୟୁସେନା ଷ୍ଟେସନରୁ ପ୍ରଥମ ଥର ପାଇଁ ରାଫେଲ ଯୁଦ୍ଧ ବିମାନରେ ଉଡ଼ାଣ କରିଛନ୍ତି ରାଷ୍ଟ୍ରପତି। ରାଷ୍ଟ୍ରପତି ଏହି ବିମାନ ଉଡାଇ ଭାରତୀୟ ବାୟୁସେନା ଏବଂ ସମଗ୍ର ଦେଶକୁ ଗର୍ବରେ ଭରି ଦେଇଛନ୍ତି। ରାଷ୍ଟ୍ରପତି ଦ୍ରୌପଦୀ ମୁର୍ମୁ ଦେଶର ସର୍ବୋଚ୍ଚ ସାମ୍ବିଧାନିକ ପଦବୀରେ ଅଧିଷ୍ଠିତ। ତେଣୁ ସେ ତିନି ସଶସ୍ତ୍ର ବାହିନୀର କମାଣ୍ଡର ମଧ୍ୟ।

ରାଷ୍ଟ୍ରପତିଙ୍କୁ ଗାର୍ଡ ଅଫ୍ ଅନର ପ୍ରଦାନ

ରାଫେଲରେ ଉଡ଼ାଣ ପୂର୍ବରୁ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଅମ୍ବାଲା ବାୟୁସେନା ଷ୍ଟେସନରେ ପହଞ୍ଚିଥିଲେ ଏବଂ ବାୟୁସେନା ମୁଖ୍ୟ ମାର୍ଶାଲ ଅମର ପ୍ରୀତ ସିଂହ ତାଙ୍କୁ ସ୍ୱାଗତ କରିଥିଲେ। ବାୟୁସେନାର କର୍ମଚାରୀମାନେ ତାଙ୍କୁ ଗାର୍ଡ ଅଫ୍ ଅନର ମଧ୍ୟ ପ୍ରଦାନ କରିଥିଲେ। ରାଷ୍ଟ୍ରପତିଙ୍କ ଭାରତୀୟ ବାୟୁସେନାର ଲଢ଼ୁଆ ବିମାନରେ ଉଡ଼ାଣ ଅଭିଜ୍ଞତାକୁ ବାୟୁସେନାର ଆଧୁନିକତା, କ୍ଷମତା ଏବଂ ଆତ୍ମନିର୍ଭରଶୀଳ ଭାରତ ପାଇଁ ପ୍ରତିରକ୍ଷା ପ୍ରୟାସର ପ୍ରତୀକ ଭାବରେ ବିବେଚନା କରାଯାଉଛି। ଉଲ୍ଲେଖନୀୟ ଯେ ଅମ୍ବାଲା ବାୟୁସେନା ଷ୍ଟେସନ ରାଫେଲ ସ୍କ୍ୱାର୍ଡନ୍ ପାଇଁ ପ୍ରାଥମିକ ନିୟୋଜନ କେନ୍ଦ୍ର ଏବଂ ଭାରତର ବାୟୁ ପ୍ରତିରକ୍ଷା ପାଇଁ ଏକ ଗୁରୁତ୍ୱପୂର୍ଣ୍ଣ ଘାଟି ଭାବରେ ବିବେଚନା କରାଯାଏ।

ପୂର୍ବରୁ ସୁଖୋଇ-୩୦ ବିମାନ ମଧ୍ୟ ଉଡ଼ିଥିଲା

ତିନି ସଶସ୍ତ୍ର ବାହିନୀର ମୁଖ୍ୟ ମୁର୍ମୁ ୮ ଏପ୍ରିଲ୍ ୨୦୨୩ରେ ଆସାମର ତେଜପୁର ବାୟୁସେନା ଷ୍ଟେସନରେ ଏକ ସୁଖୋଇ-୩୦ MKI ଲଢ଼ୁଆ ବିମାନ ଉଡ଼ାଇଥିଲେ, ଏବଂ ଏପରି କରିବାରେ ସେ ତୃତୀୟ ରାଷ୍ଟ୍ରପତି ହୋଇଥିଲେ। ତାଙ୍କ ଆଗରୁ ରାଷ୍ଟ୍ରପତି ଭାବରେ କାର୍ଯ୍ୟ କରୁଥିବା ସମୟରେ ଏପିଜେ ଅବଦୁଲ କଲାମ ୮ ଜୁନ୍ ୨୦୦୬ରେ ସୁଖୋଇ-୩୦ ଏମକେଆଇ ଯୁଦ୍ଧ ବିମାନ ଉଡ଼ାଣ କରିଥିଲେ ଏବଂ ପ୍ରତିଭା ପାଟିଲ ୨୫ ନଭେମ୍ବର ୨୦୦୯ରେ ପୁଣେ ନିକଟସ୍ଥ ଲୋହେଗାଓଁ ବାୟୁସେନା ଷ୍ଟେସନରେ ସୁଖୋଇ-୩୦ ଏମକେଆଇ ଯୁଦ୍ଧ ବିମାନ ଉଡ଼ାଣ କରିଥିଲେ।

ଅଧିକ ପଢନ୍ତୁ: ହରିୟାଣାରେ ଭୁଶୁଡ଼ିଲା ଶତାୟୁ ସେତୁ, ବର୍ତ୍ତିଗଲେ ହଜାର ହଜାର ‌ଛଠ୍‌ ବ୍ରତଧାରୀ