ନୂଆଦିଲ୍ଲୀ: ନିଟ୍ ପେପର୍ ଲିକ୍ ଦୁର୍ନୀତି ଏବଂ ଦିଲ୍ଲୀର ଜନ୍ତର ମନ୍ତରରେ ପ୍ରଦର୍ଶନ ପରେ 'କକ୍ରୋଚ୍ ଜନତା ପାର୍ଟି' ମଧ୍ୟରେ ଆଭ୍ୟନ୍ତରୀଣ କନ୍ଦଳ ମୁଣ୍ଡ ଟେକିଲାଣି । ଦଳର ଅସଲ ଆଭିମୁଖ୍ୟ ନେଇ କାର୍ଯ୍ୟକର୍ତ୍ତାମାନେ ପ୍ରଶ୍ନ କରିବାକୁ ଆରମ୍ଭ କଲେଣି । ଗୁଜରାଟର ଜଣେ ପ୍ରମୁଖ ରାଜନୈତିକ ଏବଂ ସାମାଜିକ କର୍ମୀ ଏବଂ ପରିଚାଳନା ପରାମର୍ଶଦାତା ମନୀଷ ବ୍ରହ୍ମଭଟ୍ଟ ସିଜେପି ସହିତ ନିଜର ସମ୍ପର୍କ ଛିନ୍ନ କରି ନିଜର ସ୍ୱତନ୍ତ୍ର ଦଳ ଗଠନ କରିବାକୁ ନିଷ୍ପତ୍ତି ନେଇଛି । ସେ ସିଜେପି ଉପରେ ସ୍ୱେଚ୍ଛାଚାରିତାର ଅଭିଯୋଗ ଆଣି 'କକ୍ରୋଚ୍ ଜନତା ପାର୍ଟି-ଡେମୋକ୍ରାଟିକ୍' ନାମରେ ଏକ ନୂତନ ସଂଗଠନର ଘୋଷଣା କରିଛନ୍ତି । 

ମନୀଷ ବ୍ରହ୍ମଭଟ୍ଟ ମୂଳ ସିଜେପି ମଧ୍ୟରେ ଗଣତନ୍ତ୍ର ଏବଂ ସ୍ୱଚ୍ଛତାର ଘୋର ଅଭାବ ସମ୍ପର୍କରେ ଗମ୍ଭୀର ଅଭିଯୋଗ ଆଣିଛନ୍ତି । ଅଭିଜିତ ଦିପକେ ଏବଂ ଦଳକୁ ସମାଲୋଚନା କରିଛନ୍ତି । ମନୀଷ କହିଛନ୍ତି ଯେ ଦଳ ଯୁବ ଏବଂ ଛାତ୍ର ଆନ୍ଦୋଳନର ଆଢ଼ୁଆଳରେ ମନଇଚ୍ଛା ଏକ 12 ସଦସ୍ୟ ବିଶିଷ୍ଟ କମିଟି ଗଠନ କରିଛନ୍ତି। ସିଜେପି ବର୍ତ୍ତମାନ ଆମ ଆଦମୀ ପାର୍ଟି କିମ୍ବା 'ଟିମ୍ କେଜରିୱାଲ୍' ପରି କାର୍ଯ୍ୟ କରୁଛି । ଯେଉଁଠାରେ ପ୍ରକୃତ ତୃଣମୂଳ ସ୍ତରର କର୍ମୀମାନଙ୍କୁ କଣଠେସା  କରି ରଖାଯାଇଛି।

ମନୀଷ ବ୍ରହ୍ମଭଟ୍ଟ ଗୁଜରାଟର ବନସକଣ୍ଠା ଜିଲ୍ଲାର ପାଲନପୁର ତାଲୁକାର ଚଣ୍ଡିସର ଗ୍ରାମର ବାସିନ୍ଦା ଅଟନ୍ତି । ସେ ଜଣେ ସକ୍ରିୟ ରାଜନୈତିକ କର୍ମୀ, ସାମାଜିକ କର୍ମୀ ଏବଂ ପରିଚାଳନା ପରାମର୍ଶଦାତା। ୨୦୨୨ ମସିହାରେ ଗୁଜରାଟ ବିଧାନସଭା ନିର୍ବାଚନରେ ସ୍ୱାଧୀନ ପ୍ରାର୍ଥୀ ଭାବରେ ପ୍ରତିଦ୍ୱନ୍ଦ୍ୱିତା କରିଥିଲେ । ୨୦୨୨ ମସିହାରେ ନିର୍ବାଚନ କମିଶନଙ୍କ ନିକଟରେ ଦାଖଲ ହୋଇଥିବା ଶପଥପତ୍ର ଅନୁଯାୟୀ, ସେ ୨୦୦୦ ମସିହାରେ ପାଲନପୁରର ବିଦ୍ୟାମନ୍ଦିର ସ୍କୁଲରୁ ଏସଏସସି ପରୀକ୍ଷା ଏବଂ ୨୦୦୨ ମସିହାରେ ଏଚଏସସି ପରୀକ୍ଷା ପାସ୍ କରିଥିଲେ।

ପରବର୍ତ୍ତୀ ସମୟରେ, ସେ ୨୦୦୫ ମସିହାରେ ବାଣିଜ୍ୟରେ ସ୍ନାତକ ଏବଂ ୨୦୦୯ ମସିହାରେ ହେମଚନ୍ଦ୍ରାଚାର୍ଯ୍ୟ ଉତ୍ତର ଗୁଜରାଟ ବିଶ୍ୱବିଦ୍ୟାଳୟରୁ ଆଇନରେ ଡିଗ୍ରୀ ହାସଲ କରିଥିଲେ। ତାଙ୍କ ବିରୁଦ୍ଧରେ ସାବରମତୀ, ଭାଦଜ, ଘାଟଲୋଡିଆ ଏବଂ ପାଲନପୁର ତାଲୁକା ପୋଲିସ ଷ୍ଟେସନରେ ମୋଟ ଚାରୋଟି ଫୌଜଦାରୀ ମାମଲା ରୁଜୁ ହୋଇଛି।

ତଥାପି, ସେ ସତ୍ୟପାଠରେ ସ୍ପଷ୍ଟ କରିଛନ୍ତି ଯେ ଏହି ମାମଲାରେ ତାଙ୍କୁ ଏପର୍ଯ୍ୟନ୍ତ କୌଣସି କୋର୍ଟ ଦୋଷୀ ସାବ୍ୟସ୍ତ କରିନାହାଁନ୍ତି, ଏବଂ ସେଗୁଡ଼ିକ ସମ୍ବନ୍ଧରେ କୌଣସି ବିଚାରାଧୀନ ଅପିଲ୍ କିମ୍ବା ସଂଶୋଧନ ଆବେଦନ ନାହିଁ।