ନୂଆଦିଲ୍ଲୀ: ଲଦାଖ ଉପରେ ଅଧିକାର ସାବ୍ୟସ୍ତ କରୁଥିବା ଚୀନକୁ ଭାରତ କଡ଼ା ଜବାବ ଦେଇଛି । ଲଦାଖ କେନ୍ଦ୍ରଶାସିତ ଅଞ୍ଚଳ ଭାରତର ଏକ ଅବିଚ୍ଛେଦ୍ୟ ଅଙ୍ଗ ବୋଲି ଭାରତ ସ୍ପଷ୍ଟ କରିଛି । ବେଜିଂର ପ୍ରତ୍ୟାଖ୍ୟାନ ବାସ୍ତବତାକୁ କଦାପି ପରିବର୍ତ୍ତନ କରିପାରିବ ନାହିଁ ବୋଲି ଭାରତ କହିଛି । 

 ଲଦାଖ ଉପରେ ଚୀନର ମନ୍ତବ୍ୟ ବିଷୟରେ ଗଣମାଧ୍ୟମର ପ୍ରଶ୍ନର ଉତ୍ତର ଦେଇ, ବୈଦେଶିକ ବ୍ୟାପାର ମନ୍ତ୍ରଣାଳୟର ମୁଖପାତ୍ର ରଣଧୀର ଜୟସୱାଲ କହିଛନ୍ତି , "ଆମେ ପୁନରାବୃତ୍ତି କରୁଛୁ ଯେ ଲଦାଖ କେନ୍ଦ୍ରଶାସିତ ଅଞ୍ଚଳ ଭାରତର ଏକ ଅବିଚ୍ଛେଦ୍ୟ ଅଂଶ। ଚୀନର ଅଗ୍ରାହ୍ୟ, ସତକୁ ବଦଳାଇ ପାରିବ ନାହିଁ । ଭାରତ ସରକାରଙ୍କ ସ୍ୱରାଷ୍ଟ୍ର ମନ୍ତ୍ରଣାଳୟର ଘୋଷଣାରେ କୁହାଯାଇଛି ଯେ କେନ୍ଦ୍ର ଶାସିତ ଅଞ୍ଚଳ ଲଦାଖର ୨୮ଟି ସ୍ଥାନ/ବୈଶିଷ୍ଟ୍ୟକୁ ସରକାରୀ ସର୍ଭେ ଅଫ୍ ଇଣ୍ଡିଆ ମାନଚିତ୍ରରେ ମାନକ ନାମ ସହିତ ଚିହ୍ନଟ କରାଯାଇଛି । ଏହି କାର୍ଯ୍ୟ କେନ୍ଦ୍ର ଶାସିତ ଅଞ୍ଚଳ ଲଦାଖ ଏବଂ ସ୍ଥାନୀୟ ଅଂଶୀଦାରମାନଙ୍କ ସହିତ ପରାମର୍ଶ କରି କରାଯାଇଛି। କେନ୍ଦ୍ର ଶାସିତ ଅଞ୍ଚଳ ଲଦାଖର ସର୍ଭେ ଅଫ୍ ଇଣ୍ଡିଆ ମାନଚିତ୍ରରେ ଏହି ସ୍ଥାନଗୁଡ଼ିକୁ ଆନୁଷ୍ଠାନିକ ଭାବରେ ଚିହ୍ନଟ କରିବାର ଉଦ୍ଦେଶ୍ୟ ହେଉଛି ସେମାନଙ୍କର ସଠିକ୍ ଚିହ୍ନଟ ସୁନିଶ୍ଚିତ କରିବା ଏବଂ ସାଧାରଣ ଲୋକଙ୍କ ମଧ୍ୟରେ ଉତ୍ତମ ସଚେତନତାକୁ ପ୍ରୋତ୍ସାହିତ କରିବା।

ଏଠାରେ ଉଲ୍ଲେଖ ଯୋଗ୍ୟ, ଚୀନ୍ ବୈଦେଶିକ ମନ୍ତ୍ରଣାଳୟର ମୁଖପାତ୍ର ମାଓ ନିଙ୍ଗ୍, ବେଜିଂରେ ଏକ ସାମ୍ବାଦିକ ସମ୍ମିଳନୀରେ କହିଥିଲେ ଯେ ସମଗ୍ର ଲଦାଖ ତାଙ୍କର । ସେ କହିଥିଲେ ଯେ ଭାରତ ଦ୍ୱାରା ଏକପାଖିଆ ଏବଂ ଅବୈଧ ଭାବରେ ସୃଷ୍ଟି ହୋଇଥିବା ତଥାକଥିତ 'ଲଦାଖ କେନ୍ଦ୍ରଶାସିତ ଅଞ୍ଚଳ'କୁ ଚୀନ୍ କେବେବି ସ୍ୱୀକୃତି ଦେଇନାହିଁ। ଭାରତ ଦ୍ୱାରା ତଥାକଥିତ ମାନକ ନାମ ଘୋଷଣାକୁ ଚୀନ୍ ଦୃଢ଼ ବିରୋଧ କରେ। ଲଦାଖରେ ୨୮ଟି ସ୍ଥାନ ଏବଂ ଭୌଗୋଳିକ କ୍ଷେତ୍ର ପାଇଁ ଭାରତୀୟ ଗୃହ ମନ୍ତ୍ରଣାଳୟ ଦ୍ୱାରା ନିଷ୍ପତ୍ତି ବେଆଇନ ଏବଂ ଅବୈଧ । ଏହା ଭାରତ-ଚୀନ୍ ସୀମାର ପଶ୍ଚିମ ସେକ୍ଟରରେ ଥିବା ପ୍ରାସଙ୍ଗିକ ଅଞ୍ଚଳଗୁଡ଼ିକ ସର୍ବଦା ଚୀନ୍‌ର ଥିଲା ବୋଲି ସତ୍ୟକୁ ପରିବର୍ତ୍ତନ କରିପାରିବ ନାହିଁ।