କର୍ଣ୍ଣାଟକର ଚିକବଲ୍ଲାପୁର ଜିଲ୍ଲାର ଏକ ଗାଁ ହେଉଛି ଆଲିପୁରା। ଏଠାକାର ପ୍ରାୟ ୧୦୦ ଜଣ ଲୋକ ଇରାନର ପୂର୍ବତନ ସୁପ୍ରିମ୍ ଲିଡର୍ (ସର୍ବୋଚ୍ଚ ନେତା) ଆୟାତୋଲ୍ଲା ଅଲ୍ଲୀ ଖାମେନେଇଙ୍କୁ ଶେଷ ବିଦାୟ ଦେବା ପାଇଁ ତେହେରାନରେ ପହଞ୍ଚିଛନ୍ତି। ଆଲିପୁର ଗାଁ ସହ ଖାମେନେଇଙ୍କ ସମ୍ପର୍କ ଦଶନ୍ଧି ପୁରୁଣା ଏକ ଯାତ୍ରା ସହିତ ଜଡ଼ିତ। ଆଲିପୁର ହେଉଛି ଏକ ମୁସଲିମ୍ ବହୁଳ ଗାଁ। ଏଠାକାର ଜନସଂଖ୍ୟା ଇରାନର ନେତାଙ୍କ ସହ ଭାରତର ସମ୍ପର୍କର ଏକ ପ୍ରତୀକ ପାଲଟିଛି।

୨୮ ଫେବୃଆରୀରେ ଆମେରିକା-ଇସ୍ରାଏଲ୍ ଆକ୍ରମଣରେ ଇରାନର ପୂର୍ବତନ ସର୍ବୋଚ୍ଚ ନେତା ଆୟାତୋଲ୍ଲା ଅଲ୍ଲୀ ଖାମେନେଇଙ୍କ ହତ୍ୟା କରାଯାଇଥିଲା। ତାଙ୍କୁ ଶେଷ ବିଦାୟ ଦେବା ପାଇଁ ଲକ୍ଷ ଲକ୍ଷ ସଂଖ୍ୟାରେ ବିଦେଶରୁ ଲୋକେ ଇରାନରେ ପହଞ୍ଚିଛନ୍ତି। ୯ ଜୁଲାଇରେ ଖାମେନେଇଙ୍କୁ ଇରାନର ପବିତ୍ର ସହର ମଶହଦ୍ରେ ଥିବା ଇମାମ ରଜାଙ୍କ ଦରଗାହ ନିକଟରେ କବର ଦିଆଯିବ। ତେହେରାନରେ ତାଙ୍କର ଅନ୍ତିମ ସଂସ୍କାରରେ ସାମିଲ ଲକ୍ଷ ଲକ୍ଷ ଲୋକଙ୍କ ମଧ୍ୟରେ ଆଲିପୁରା ଗାଁର ଏହି ୧୦୦ ଜଣ ଲୋକ ମଧ୍ୟ ଥିଲେ, ଯେଉଁମାନେ ଖାମେନେଇଙ୍କ ସହ ବ୍ୟକ୍ତିଗତ ଭାବେ ଜଡ଼ିତ ଥିବା ଯୋଗୁଁ ଇରାନ ଯାଇଛନ୍ତି।

ଖାମେନେଇ ଏବଂ କର୍ଣ୍ଣାଟକ ଗାଁର କନେକ୍ସନ (ସମ୍ପର୍କ)

ମୁସଲିମ୍ ବହୁଳ ଗାଁ ଆଲିପୁର ଏବଂ ଖାମେନେଇଙ୍କ ମଧ୍ୟରେ ଥିବା ଭାବଗତ ସମ୍ପର୍କ ୧୯୮୧-୮୨ ମସିହାରୁ ଜଡ଼ିତ, ଯେତେବେଳେ ସେ ଏହି ଗାଁକୁ ଆସିଥିଲେ। ସେହି ସମୟରେ ଗାଁର ପ୍ରାୟ ସମଗ୍ର ଜନସଂଖ୍ୟା ଶିଆ ସମ୍ପ୍ରଦାୟର ଥିଲେ। ଏହି ସମ୍ପର୍କ ଆହୁରି ମଜବୁତ ହେଲା ଯେତେବେଳେ ଖାମେନେଇ ଏଠାରେ 'ଇମାମ ଖୋମେନି ହସ୍ପିଟାଲ୍'ର ଉଦ୍ଘାଟନ କରିଥିଲେ। ଏହି ମେଡିକାଲ୍ ଇରାନ ସରକାରଙ୍କ ସହାୟତାରେ ନିର୍ମିତ ହୋଇଥିଲା। ତେଣୁ, ଗାଁର ପ୍ରତ୍ୟେକ ବ୍ୟକ୍ତିଙ୍କ ପାଇଁ ସେ କେବଳ ଜଣେ ରାଜନୈତିକ ବ୍ୟକ୍ତିତ୍ୱ ନଥିଲେ, ବରଂ ଜଣେ ଧାର୍ମିକ ଗୁରୁ ମଧ୍ୟ ଥିଲେ, ଯିଏ ଗାଁର ଗଳିକନ୍ଦିରେ ଏହି ଐତିହାସିକ ଯାତ୍ରା କରିଥିଲେ।

କେଉଁ ଘଟଣା ପରେ ନିର୍ମାଣ ହୋଇଥିଲା ମେଡିକାଲ୍?

ଯେତେବେଳେ ଖାମେନେଇ ଏଠାକୁ ଆସି ଆଲିପୁର ଗସ୍ତ କରିଥିଲେ, ସେତେବେଳେ ଏକ ଘଟଣା ଘଟିଥିଲା। ଗାଁର ଜଣେ ମହିଳାଙ୍କର ପରଲୋକ ହୋଇଯାଇଥିଲା ଏବଂ ଲୋକମାନେ ତାଙ୍କୁ ସେହି ମହିଳାଙ୍କ ପାଇଁ ପ୍ରାର୍ଥନା କରିବାକୁ ଅନୁରୋଧ କରିଥିଲେ। ସେ ଯେତେବେଳେ ମୃତ୍ୟୁର କାରଣ ପଚାରିଲେ, ଲୋକେ କହିଲେ ଯେ ସେ ଗର୍ଭବତୀ ଥିଲେ ଏବଂ ଏହି ଅଞ୍ଚଳରେ କୌଣସି ହସ୍ପିଟାଲ୍ ନଥିଲା। ତାଙ୍କୁ ବେଙ୍ଗାଲୁରୁ ନେବା ପାଇଁ ଚେଷ୍ଟା କରାଯାଉଥିଲା, କିନ୍ତୁ ବାଟରେ ହିଁ ତାଙ୍କର ମୃତ୍ୟୁ ହୋଇଗଲା। ଏହା ଶୁଣି ସେ ଅତ୍ୟନ୍ତ ଦୁଃଖିତ ଓ ମର୍ମାହତ ହୋଇଥିଲେ ଏବଂ ତୁରନ୍ତ ସେଠାରେ ଏକ ମେଡିକାଲ୍ ନିର୍ମାଣ କରିବା ସହ ତାର ସମସ୍ତ ଖର୍ଚ୍ଚ ବହନ କରିବାକୁ ଘୋଷଣା କରିଥିଲେ। ପରେ ସେଠାରେ ହସ୍ପିଟାଲ୍ ତିଆରି ହେଲା, ଯାହା 'ଆଇକେ (IK) ହସ୍ପିଟାଲ୍' ନାମରେ ଜଣାଶୁଣା। ଖାମେନେଇଙ୍କର ସେହି ପ୍ରତିଶ୍ରୁତି ଏବଂ ତାକୁ ପୂରଣ କରିବା ଶୈଳୀ ଏଠାକାର ଲୋକଙ୍କୁ ବହୁତ ପ୍ରଭାବିତ କରିଥିଲା। ତାଙ୍କର ଚିନ୍ତାଧାରାର ପ୍ରଭାବ ଏଠାକାର ଲୋକଙ୍କ ଉପରେ ପଡ଼ିଥିଲା, ଯାହା ଫଳରେ ସେମାନେ ଆତ୍ମିକ ଭାବେ ପୂର୍ବତନ ସୁପ୍ରିମ୍ ଲିଡର୍ଙ୍କ ସହ ଜଡ଼ିତ ହୋଇଗଲେ।

'ଦି ହିନ୍ଦୁ'ର ରିପୋର୍ଟ ଅନୁଯାୟୀ, ଏହି ଲୋକମାନଙ୍କ ମଧ୍ୟରୁ କିଛି କନ୍ନଡ଼ ଭାଷୀ ଲୋକ ପୂର୍ବରୁ ହିଁ ଇରାନର ବିଭିନ୍ନ ଧାର୍ମିକ ଅନୁଷ୍ଠାନର ଛାତ୍ର, ମେଡିକାଲ୍ ଷ୍ଟୁଡେଣ୍ଟସ୍ ଏବଂ ମେଡିକାଲ୍ ପ୍ରଫେସନାଲ୍ ଭାବେ ରହୁଛନ୍ତି କିମ୍ବା ସେଠାରେ ବ୍ୟବସାୟ କରୁଛନ୍ତି। ବାକି ଲୋକମାନେ ରବିବାର ଦିନ ବେଙ୍ଗାଲୁରୁରୁ ମୁମ୍ବାଇ ଦେଇ 'ଇରାନ ଏୟାର'ର ଏକ ଚାର୍ଟାର୍ଡ ଫ୍ଲାଇଟ୍ ଯୋଗେ ଇରାନର ରାଜଧାନୀ ତେହେରାନରେ ପହଞ୍ଚିଥିଲେ।

ମୃତ୍ୟୁ ଖବର ହୃଦୟକୁ ଆନ୍ଦୋଳିତ କଲା

ଆଲିପୁରାର ବାସିନ୍ଦା ଫୈଜାନ୍ ରଜା କହିଛନ୍ତି, "ତାଙ୍କୁ ଏଠାରେ ବହୁତ ସମ୍ମାନ ଦିଆଯାଉଥିଲା। ତାଙ୍କର ଏହି ନିଧନ ଆମ ହୃଦୟ ଏବଂ ଆତ୍ମାକୁ ଆନ୍ଦୋଳିତ କରିଦେଇଛି। ଏହି କାରଣରୁ ତାଙ୍କର ଶେଷ ବିଦାୟ ସମାରୋହରେ ସାମିଲ ହେବା ଆମ ପାଇଁ ଅତ୍ୟନ୍ତ ଜରୁରୀ ଥିଲା। ତେଣୁ ମୁଁ ଆଲିପୁରାରୁ ଏଠାକୁ ଆସିଛି।"

ହକିମ୍ ରଜା କହିଛନ୍ତି ଯେ, ୪୦ ଦିନର ଶୋକ ଏବଂ ଏକ ସପ୍ତାହର ସରକାରୀ ଛୁଟି ଏହି କଥାକୁ ଦର୍ଶାଉଛି ଯେ ଏହି ଦୁଃଖଦ ଘଟଣା କେବଳ ଗୋଟିଏ ପରିବାରର ବ୍ୟକ୍ତିଗତ କ୍ଷତି ନଥିଲା, ବରଂ ଏହା ଏକ ସାମୂହିକ ଜାତୀୟ ଆଘାତ ଥିଲା, ଯାହା ବ୍ୟକ୍ତିଗତ ଦୁଃଖକୁ ଜାତୀୟ ସଂକଳ୍ପ ସହିତ ଯୋଡ଼ି ଦେଇଛି।