କାଙ୍କେର: ଛତିଶଗଡ଼ର କାଙ୍କେର ଜିଲ୍ଲାରେ ଶନିବାର ଏକ ଇମ୍ପ୍ରୋଭାଇଜଡ୍ ଏକ୍ସପ୍ଲୋସିଭ୍ ଡିଭାଇସ୍ (ଆଇଇଡି) ବିସ୍ଫୋରଣ ହେବାରୁ ଜିଲ୍ଲା ରିଜର୍ଭ ଗାର୍ଡ (ଡିଆରଜି)ର ତିନି ଜଣ ଯବାନ ସହିଦ ହୋଇଥିବା ବେଳେ  ଏବଂ ଅନ୍ୟ ଜଣେ ଯବାନ ଆହତ ହୋଇଛନ୍ତି।

କାଙ୍କେର-ନାରାୟଣପୁର ସୀମାରେ ମାଇନ ଡି-ମାଇନିଂ ଅଭିଯାନ ସମୟରେ ଛୋଟେବେଠିଆ ପୋଲିସ ଷ୍ଟେସନ ସୀମା ଅନ୍ତର୍ଗତ ଏକ ଜଙ୍ଗଲ ଅଞ୍ଚଳରେ ଏହି ଘଟଣା ଘଟିଥିଲା। ବାରୁଦ ସୁଡଙ୍ଗ ନିଷ୍କ୍ରିୟ କରିବା ଅଭିଯାନ ସମୟରେ ବିସ୍ଫୋରଣ ହୋଇଥିଲା। 

କାଙ୍କେର ପୋଲିସ ଅଧିକ୍ଷକ ନିଖିଲ ରାଖେଚା କହିଛନ୍ତି ଯେ ଜିଲ୍ଲା ସୀମା ନିକଟସ୍ଥ କୋରୋସ୍କୋଡା ଅଞ୍ଚଳରେ ଦଳ କାମ କରୁଥିଲେ ଯେତେବେଳେ ଆଇଇଡି ବିସ୍ଫୋରଣ ହୋଇଥିଲା। "ତିନି ଜଣ ଡିଆରଜି କର୍ମଚାରୀ, ଇନ୍ସପେକ୍ଟର ସୁଖରାମ ଭାଟି, କନଷ୍ଟେବଳ କୃଷ୍ଣ କୋମରା ଏବଂ କନଷ୍ଟେବଳ ସଞ୍ଜୟ ଗଡ଼ପାଲେଙ୍କ ଘଟଣାସ୍ଥଳରେ  ମୃତ୍ୟୁ ହୋଇଥିଲା। ଆଉ ଜଣେ ଯବାନ, କନଷ୍ଟେବଳ ପରମାନନ୍ଦ କୋମରା ଆହତ ହୋଇଛନ୍ତି।

ବସ୍ତର ରେଞ୍ଜ ପୋଲିସ ମହାନିରୀକ୍ଷକ ସୁନ୍ଦରରାଜ ପଟ୍ଟିଲିଙ୍ଗମ ଏହି ଘଟଣାରେ ଦୁଃଖ ପ୍ରକାଶ କରି ସମବେଦନା ଜଣାଇଛନ୍ତି। " ଗତ କିଛି ମାସ ମଧ୍ୟରେ ନକ୍ସଲମାନଙ୍କ ଦ୍ୱାରା ଲୁଚାଇ ରଖାଯାଇଥିବା ଶହ ଶହ ଆଇଇଡି ମିଳିସାରିଛି ଏବଂ ନିଷ୍କ୍ରିୟ କରାଯାଇଛି। କିନ୍ତୁ, ଏଥର ନିଷ୍କ୍ରିୟ କରିବା ପ୍ରୟାସ ସମୟରେ ବିସ୍ଫୋରକଟି ଅପ୍ରତ୍ୟାଶିତ ଭାବରେ ବିସ୍ଫୋରଣ ହୋଇଥିଲା, ଯାହା ଫଳରେ ଏହି ଦୁଃଖଦ ଘଟଣା ଘଟିଥିବା," ସେ କହିଛନ୍ତି।