ନୂଆଦିଲ୍ଲୀ: ଅଯୋଧ୍ୟାର ରାମ ମନ୍ଦିରକୁ ନେଇ ଉତ୍ତରପ୍ରଦେଶ ରାଜନୀତିରେ ପୁଣି ଚର୍ଚ୍ଚା ଜୋର ଧରିଛି। ସମାଜବାଦୀ ପାର୍ଟି (SP) ମୁଖ୍ୟ ତଥା ପୂର୍ବତନ ମୁଖ୍ୟମନ୍ତ୍ରୀ ଅଖିଳେଶ ଯାଦବ ଆସନ୍ତା ଡିସେମ୍ବର ୧୨ ତାରିଖରେ ଅଯୋଧ୍ୟା ଗସ୍ତ କରିବେ। ଏହି ଗସ୍ତରେ ସେ ପତ୍ନୀ ତଥା ସାଂସଦ ଡିମ୍ପଲ ଯାଦବଙ୍କ ସହ ହନୁମାନଗଡ଼ି ମନ୍ଦିର ଏବଂ ରାମ ମନ୍ଦିରରେ ପୂଜାର୍ଚ୍ଚନା କରିବେ। ଦଳୀୟ ନେତା ପବନ ପାଣ୍ଡେ ଏହି ଗସ୍ତ ସମ୍ପର୍କରେ ସୂଚନା ଦେଇଛନ୍ତି।

ପବନ ପାଣ୍ଡେଙ୍କ ସୂଚନା ଅନୁସାରେ, ଅଖିଳେଶ ଯାଦବ ପରିବାର ସହ ଅଯୋଧ୍ୟାରେ ପହଞ୍ଚି ପ୍ରଥମେ ହନୁମାନଗଡ଼ି ମନ୍ଦିରରେ ହନୁମାନଜୀଙ୍କ ଦର୍ଶନ କରିବେ। ଏହାପରେ ରାମ ଜନ୍ମଭୂମି ପରିସରକୁ ଯାଇ ରାମଲଲାଙ୍କ ଆଶୀର୍ବାଦ ନେବେ। ଏହି ଅବସରରେ ସେ ଅଯୋଧ୍ୟାର ସାଧୁସନ୍ଥ ଓ ମହନ୍ତମାନଙ୍କୁ ମଧ୍ୟ ଭେଟିବା ସହ ସେମାନଙ୍କ ଆଶୀର୍ବାଦ ନେବାର କାର୍ଯ୍ୟକ୍ରମ ରହିଛି। 

ଅଖିଳେଶଙ୍କ ଏହି ଗସ୍ତ ରାମ ମନ୍ଦିରର ପ୍ରାଣପ୍ରତିଷ୍ଠା ପରେ ପ୍ରଥମ ହେବାକୁ ଯାଉଛି। ୨୦୨୪ ଜାନୁଆରୀରେ ରାମଲଲାଙ୍କ ପ୍ରାଣପ୍ରତିଷ୍ଠା ହୋଇଥିବାବେଳେ ଏହା ପରେ ସେ ପ୍ରଥମଥର ପାଇଁ ମନ୍ଦିରରେ ଦର୍ଶନ କରିବେ। ତେଣୁ ଏହି ଗସ୍ତକୁ ନେଇ ସମାଜବାଦୀ ପାର୍ଟିର କର୍ମୀ ଓ ସମର୍ଥକଙ୍କ ମଧ୍ୟରେ ଉତ୍ସାହ ଦେଖାଦେଇଛି। ଗସ୍ତକୁ ସଫଳ କରିବା ପାଇଁ ଦଳ ପକ୍ଷରୁ ପ୍ରସ୍ତୁତି ମଧ୍ୟ ଆରମ୍ଭ ହୋଇଛି। 

ଅଖିଳେଶଙ୍କ ଅଯୋଧ୍ୟା ଗସ୍ତକୁ ନେଇ ପବନ ପାଣ୍ଡେ କହିଛନ୍ତି ଯେ, ସୈଫାଇରେ ନିର୍ମାଣାଧୀନ କେଦାରେଶ୍ୱର ମହାଦେବ ମନ୍ଦିରର ପ୍ରାଣପ୍ରତିଷ୍ଠା ପରେ ଅଯୋଧ୍ୟା ଆସି ରାମଲଲାଙ୍କ ଦର୍ଶନ କରିବେ ବୋଲି ଅଖିଳେଶ ପୂର୍ବରୁ କହିଥିଲେ। ସେହି ଅନୁସାରେ ଶୁଭ ମୁହୂର୍ତ୍ତ ନିର୍ଦ୍ଧାରଣ କରାଯାଇ ଡିସେମ୍ବର ୧୨ ତାରିଖକୁ ଗସ୍ତ ପାଇଁ ଚୂଡ଼ାନ୍ତ କରାଯାଇଛି।

ଅନ୍ୟପଟେ ଅଖିଳେଶଙ୍କ ଏହି ଗସ୍ତକୁ ନେଇ ଉତ୍ତରପ୍ରଦେଶରେ ବିଜେପି ଓ ସମାଜବାଦୀ ପାର୍ଟି ମଧ୍ୟରେ ରାଜନୈତିକ ବାକ୍‌ଯୁଦ୍ଧ ତୀବ୍ର ହୋଇଛି। ବିଜେପି ବିଧାୟକ ରାମଚନ୍ଦ୍ର ଯାଦବ ଏହି ଗସ୍ତକୁ ସମାଜବାଦୀ ପାର୍ଟିର ରାଜନୈତିକ ପ୍ରଚାର ବୋଲି କହିଛନ୍ତି। ଅଖିଳେଶ ନିଜେ ଗସ୍ତ ସମ୍ପର୍କରେ ସ୍ପଷ୍ଟ ଭାବେ କହିନଥିବାରୁ ଏହାକୁ ନେଇ ସନ୍ଦେହ ପ୍ରକାଶ କରିଛନ୍ତି ସେ। ତେବେ ପବନ ପାଣ୍ଡେ ଏହି ଅଭିଯୋଗକୁ ଖଣ୍ଡନ କରିବା ସହ ଗସ୍ତ ପାଇଁ ପ୍ରସ୍ତୁତି ଚାଲିଥିବା କହିଛନ୍ତି।