ନୂଆଦିଲ୍ଲୀ: ପହଲଗାମ ଆତଙ୍କବାଦୀ ଆକ୍ରମଣ ପରେ ଭାରତ ଏବଂ ପାକିସ୍ତାନ ମଧ୍ୟରେ ଉତ୍ତେଜନା ବୃଦ୍ଧି ପାଇଛି । ଉଭୟ ଦେଶ ମଧ୍ୟରେ ଅନେକ ଗୁଡ଼ିଏ କୂଟନୈତିକ ପଦକ୍ଷେପ ନିଆଯାଇଛି । ଉଭୟ ଦେଶ ସେମାନଙ୍କର ଆକାଶମାର୍ଗ ପରସ୍ପର ପାଇଁ ବନ୍ଦ କରିଦେଇଛନ୍ତି । ତେବେ ଏହାରି ମଧ୍ୟରେ ଏୟାର ଇଣ୍ଡିଆ ବଡ଼ କ୍ଷତି ସହିବାର ଆଶଙ୍କା କରୁଛି । ଯଦି ପାକିସ୍ତାନୀ ଆକାଶମାର୍ଗ ବର୍ଷେ ପାଇଁ ବନ୍ଦ ରହେ କମ୍ପାନୀକୁ ବହୁତ ବଡ଼ କ୍ଷତିର ସାମ୍ନା କରିବା ପଡ଼ିପାରେ । 

ରଏଟର୍ସ ଅନୁଯାୟୀ, ଏୟାର ଇଣ୍ଡିଆ ଦାବି କରିଛି ଯେ ବର୍ଷକ ମଧ୍ୟରେ ପ୍ରାୟ ୬୦କୋଟି ଡଲାର (୫୦୫୩ କୋଟି ଟଙ୍କା) ଅତିରିକ୍ତ କ୍ଷତି ସହିବାକୁ ପଡ଼ିପାରେ । କମ୍ପାନୀ ଏହି କ୍ଷତି ପୂରଣ ଭରଣା କରିବା ପାଇଁ କେନ୍ଦ୍ର ସରକାରଙ୍କ ନିକଟରେ ଆବେଦନ କରିଛି । ଏୟାର ଇଣ୍ଡିଆ ବେସାମରିକ ବିମାନ ଚଳାଚଳ ମନ୍ତ୍ରଣାଳୟକୁ ଉକ୍ତ ଚିଠି ଲେଖିଛି । ଏପ୍ରିଲ ୨୭ରେ ବିମାନ କମ୍ପାନୀଗୁଡ଼ିକ ଭାରତ ସରକାରଙ୍କଠାରୁ ଆର୍ଥିକ କ୍ଷତି ଅନୁପାତରେ ଏକ 'ସବସିଡି ମଡେଲ' ଦାବି କରିଥିଲେ, ଆକଳନ କରାଯାଇଛି ଯେ ଆକାଶମାର୍ଗ ପ୍ରତିବନ୍ଧକ ଯୋଗୁଁ ପ୍ରତିବର୍ଷ ୫୦ ବିଲିୟନ ଭାରତୀୟ ଟଙ୍କା (୫୯୧ ନିୟୁତ ଡଲାର) ରୁ ଅଧିକ କ୍ଷତି ସହିବ ।

ଏୟାର ଇଣ୍ଡିଆର ଏହି ଚିଠିରେ କୁହାଯାଇଛି ଯେ ପ୍ରଭାବିତ ଅନ୍ତର୍ଜାତୀୟ ବିମାନ ପାଇଁ ସବସିଡି ଏକ ଭଲ, ପରିବର୍ତ୍ତନଶୀଳ ଏବଂ ଯୁକ୍ତିଯୁକ୍ତ ବିକଳ୍ପ । ପରିସ୍ଥିତିରେ ଉନ୍ନତି ହେଲେ ସବସିଡି ହଟାଯାଇପାରିବ । ରିପୋର୍ଟରେ କୁହାଯାଇଛି ଯେ ସରକାର ଏୟାର ଇଣ୍ଡିଆ ଅଧିକାରୀଙ୍କୁ ଭାରତୀୟ ବିମାନ ସେବା ଉପରେ ଏୟାରସ୍ପେସ୍ ପ୍ରତିବନ୍ଧକର ପ୍ରଭାବ ଆକଳନ କରିବାକୁ କହିବା ପରେ ଏୟାର ଇଣ୍ଡିଆ ଏହି ଚିଠି ପଠାଇଛି।

ଆଉ ଏକ ସମ୍ବାଦ ସରବରାହ ସଂସ୍ଥା ପିଟିଆଇ ରିପୋର୍ଟ ଅନୁସାରେ, ମନ୍ତ୍ରଣାଳୟ ନିକଟରେ ପାକିସ୍ତାନର ଏୟାରସ୍ପେସ୍ ବନ୍ଦ କରିବା ପ୍ରସଙ୍ଗରେ ଆଲୋଚନା କରିବା ପାଇଁ ଅନେକ ଏୟାରଲାଇନ୍ସ ସହିତ ଏକ ବୈଠକ କରାଯାଇଛି । ପରିସ୍ଥିତିର ମୁକାବିଲା ପାଇଁ ସେମାନଙ୍କ ପରାମର୍ଶ ଲୋଡିଛନ୍ତି ସରକାର । ଏୟାର ଇଣ୍ଡିଆ, ଇଣ୍ଡିଗୋ ଏବଂ ସ୍ପାଇସଜେଟ୍ ସମେତ ଅନେକ ଏୟାରଲାଇନ୍ସ ଏପ୍ରିଲ ୨୨ ତାରିଖରେ ପହଲଗାମରେ ଆତଙ୍କବାଦୀ ଆକ୍ରମଣ ପରେ ପାକିସ୍ତାନର ଏୟାରସ୍ପେସ୍ ବନ୍ଦ (ପାକ୍ ଏୟାରସ୍ପେସ୍ ବନ୍ଦ) ର ପ୍ରଭାବ ଉପରେ ବେସାମରିକ ବିମାନ ଚଳାଚଳ ମନ୍ତ୍ରଣାଳୟକୁ ସେମାନଙ୍କର ସୂଚନା ଏବଂ ପରାମର୍ଶ ଦେଇଛନ୍ତି । ସେ କହିଛନ୍ତି ଯେ ମନ୍ତ୍ରଣାଳୟ ପରିସ୍ଥିତିର ମୂଲ୍ୟାଙ୍କନ କରୁଛି ଏବଂ ସମସ୍ୟାର ସମାଧାନ ପାଇଁ ସମ୍ଭାବ୍ୟ ସମାଧାନ ଉପରେ ବିଚାର କରୁଛି।

ଉତ୍ତର ଭାରତୀୟ ସହରଗୁଡ଼ିକରୁ ପରିଚାଳିତ ଅନ୍ତର୍ଜାତୀୟ ବିମାନ ପାଇଁ ଅତିରିକ୍ତ ଖର୍ଚ୍ଚ ପ୍ରତି ସପ୍ତାହରେ ୭୭ କୋଟି ଟଙ୍କା ହେବାର ସମ୍ଭାବନା ଅଛି । କାରଣ ଇନ୍ଧନ ବ୍ୟବହାର ବୃଦ୍ଧି ପାଇବ ଏବଂ ଏୟାରସ୍ପେସ୍ ପ୍ରତିବନ୍ଧକ ଯୋଗୁଁ ଉଡ଼ାଣ ଅବଧି ମଧ୍ୟ ବୃଦ୍ଧି ପାଇବ । କାରଣ ବିକଳ୍ପ ମାର୍ଗ ଦେଇ ଅନ୍ୟଦେଶକୁ ବିମାନ ଚାଲିବ । ଯାହାକି ଲମ୍ବା ରାସ୍ତା ହେବ । ସେଥିପାଇଁ ଖର୍ଚ୍ଚ ବଢ଼ିବାର ବେଶ ଆଶଙ୍କା ରହିଛି । ବିଦେଶୀ ବିମାନ ଉଡ଼ାଣ ସଂଖ୍ୟା ଏବଂ ବର୍ଦ୍ଧିତ ଉଡ଼ାଣ ଅବଧି ଏବଂ ଆନୁମାନିକ ଖର୍ଚ୍ଚ ଉପରେ ଆଧାର କରି ପିଟିଆଇ ଦ୍ୱାରା କରାଯାଇଥିବା ଗଣନାର ବିଶ୍ଳେଷଣରୁ ଜଣାପଡିଛି ଯେ ଭାରତୀୟ ବିମାନ କମ୍ପାନୀଗୁଡ଼ିକ ପାଇଁ ଅତିରିକ୍ତ ମାସିକ ପରିଚାଳନା ଖର୍ଚ୍ଚ ୩୦୬  କୋଟି ଟଙ୍କାରୁ ଅଧିକ ହୋଇପାରେ।