ଶ୍ରୀନଗର: ଜମ୍ମୁ କଶ୍ମୀରର ଜୋଜିଲା ପାସ୍ ଖୋଲିଛି। ପୁଣି ‌ଥରେ ଏହି ରାସ୍ତାରେ ଯାନବାହନର ଶଦ୍ଦ ଶୁଭିଛି। ଶ୍ରୀନଗର-କାରଗିଲ-ଲେହ ଜାତୀୟ ରାଜପଥରେ ସମୁଦ୍ର ପତ୍ତନଠାରୁ ପ୍ରାୟ ୩୫୨୮ ମିଟର ଉଚ୍ଚତାରେ ଅବସ୍ଥିତ ଜୋଜିଲା ପାସ୍ ୩୨ ଦିନ ବନ୍ଦ ରହିବା ପରେ ମଙ୍ଗଳବାର ଦିନ ଯାନବାହାନ ଚଳାଚଳ ପାଇଁ ଖୋଲି ଦିଆଯାଇଛି। ସୀମା ସଡ଼କ ସଂଗଠନ (ବିଆରଓ)ର ମହାନିର୍ଦ୍ଦେଶକ ଲେଫ୍ଟନାଣ୍ଟ ଜେନେରାଲ ରଘୁ ଶ୍ରୀନିବାସନ କାଶ୍ମୀରରୁ ଲଦାଖକୁ ପ୍ରଥମ କାନଭୟକୁ ପତାକା ଦେଖାଇ ଶୁଭାରମ୍ଭ କରିଥିଲେ।

୨୦୨୧ ମସିହାରେ, ଜୋଜିଲା ପାସ୍ ପ୍ରାୟ ୧୧୦ ଦିନ ପାଇଁ ବନ୍ଦ ଥିଲା। ଏଥର ଏହା ମାତ୍ର ୩୨ ଦିନରେ ଖୋଲାଗଲା ଯାହା ଏକ ରେକର୍ଡ। ବିଆରଓ ୧୫ ଦିନ ମଧ୍ୟରେ ବରଫ ସଫା କରି ଜୋଜିଲାକୁ ଯାତାୟାତ ଉପଯୋଗୀ କରିଛି।

ଜୋଜିଲା ପାସ୍ ହେଉଛି ବିଶ୍ୱର ସବୁଠାରୁ ଗୁରୁତ୍ୱପୂର୍ଣ୍ଣ ଏବଂ ଚ୍ୟାଲେଞ୍ଜିଂ ଉଚ୍ଚତା ପାସ୍ ମଧ୍ୟରୁ ଗୋଟିଏ ଯାହା କାଶ୍ମୀର ଉପତ୍ୟକାକୁ ଲଦାଖ ସହିତ ସଂଯୋଗ କରୁଛି। ଏହା ଶ୍ରୀନଗରରୁ ପ୍ରାୟ ୧୦୦ କିଲୋମିଟର ଏବଂ ସୋନମାର୍ଗରୁ ୧୫ କିଲୋମିଟର ଦୂରରେ ଅବସ୍ଥିତ। ଏହି ଦୁର୍ଗମ ଘାଟିରେ ପ୍ରବଳ ତୁଷାରପାତ ହୁଏ, ଯାହା ଦ୍ଵାରା କଠୋର ଶୀତ ମାସରେ ଏହାକୁ ବନ୍ଦ କରିବାକୁ ପଡ଼ିଥାଏ।

ଏହି ଅସ୍ଥାୟୀ ବନ୍ଦ କେବଳ ସୈନ୍ୟ ଏବଂ ଅତ୍ୟାବଶ୍ୟକ ସାମଗ୍ରୀର ଗତିବିଧିକୁ ପ୍ରଭାବିତ କରେ ନାହିଁ ବରଂ ଲଦାଖର ସ୍ଥାନୀୟ ଲୋକଙ୍କ ଦୈନନ୍ଦିନ ଜୀବନକୁ ମଧ୍ୟ ବାଧାପ୍ରାପ୍ତ କରେ, ଯେଉଁମାନେ ବାଣିଜ୍ୟ, ଚିକିତ୍ସା ସହାୟତା ଏବଂ ଆର୍ଥିକ କାର୍ଯ୍ୟକଳାପ ପାଇଁ ଏହି ମାର୍ଗ ଉପରେ ନିର୍ଭର କରନ୍ତି। ପ୍ରାୟ ୨୦ ବର୍ଷ ପୂର୍ବେ, ଏହି ଘାଟି ୩୧ ଅକ୍ଟୋବରରେ ସାଧାରଣ ଯାନବାହାନ ଚଳାଚଳ ପାଇଁ ବନ୍ଦ ରହୁଥିଲା ଏବଂ ଛଅ ମାସ ପରେ ମେ ମାସର ପ୍ରଥମ ସପ୍ତାହରେ କିମ୍ବା ଏପ୍ରିଲର ଶେଷ ଦିନରେ ଖୋଲାଯାଉଥିଲା।

ପ୍ରଯୁକ୍ତିବିଦ୍ୟାର ଉନ୍ନତି, ଉନ୍ନତ ତୁଷାରପାତ ସଫା କରିବା କୌଶଳ ଏବଂ ବିଆରଓର ଅକ୍ଳାନ୍ତ ପ୍ରୟାସ ଯୋଗୁଁ, ଏହାକୁ ଯଥାସମ୍ଭବ ଖୋଲା ରଖାଯାଇଥିଲା ଏବଂ ଗ୍ରୀଷ୍ମ ଋତୁ ଆସିବା ପୂର୍ବରୁ, ବିଆରଓ ଘାଟିରେ ରାସ୍ତାରୁ ବରଫ ସଫା କରି ଏହାକୁ ଗାଡ଼ି ଚଳାଚଳ କରିବା ଆରମ୍ଭ କରିଥିଲା।

ଅଧିକ ପଢ଼ନ୍ତୁ: ଆମେରିକାରେ ଚାକିରି ହରାଇବେ ୬୦ ହଜାର ଲୋକ!