ନୂଆଦିଲ୍ଲୀ: ପୂରା ଦେଶରେ ୱାକଫ ବୋର୍ଡ ସଂପ୍ରତି ସବୁଠୁ ଚର୍ଚ୍ଚାର ବିଷୟ ପାଲଟିଛି । ଚା ଖଟିଠୁ ନେଇ ସଂସଦ ପର୍ଯ୍ୟନ୍ତ ଏହାକୁ ନେଇ ବିତର୍କର ବିଷୟ ପାଲଟିଛି । ଏହି ବିଧେୟକ ସଂସଦରେ ଉପସ୍ଥାପିତ ହୋଇଥିବା ବେଳେ ସମସ୍ତ ବିରୋଧୀ ଦଳ ଏକଜୁଟ୍ ହୋଇ ଏହାର ବିରୋଧ କରିଛନ୍ତି । ଏହା ସହିତ ଏହି ବିଧେୟକ ପ୍ରତ୍ୟାହାର କରିବାକୁ ଦାବି କରିଛନ୍ତି । ମାତ୍ର ସାଧାରଣ ଲୋକଙ୍କ ପାଖରେ ୱାକଫ ବୋର୍ଡ ଓ ବିଧେୟକ ବିଷୟରେ ଅଧିକ ସୂଚନା ନାହିଁ । ସେଥିପାଇଁ ଲୋକେ ଜାଣିବାକୁ ଚାହୁଁଛନ୍ତି ୱାକଫ ବୋର୍ଡ କଣ ? ଏହାର କାମ କଣ ? ଏହାକୁ ନେଇ ବିଧେୟକ କାହିଁକି ଅଣା ଯାଇଛି ?

କଣ ଏହି ୱାକଫ ବୋର୍ଡ ?

ସର୍ବପ୍ରଥମେ ଏହା ବୁଝି ନିଅନ୍ତୁ ଯେ, ଏହା ଏକ ଧାର୍ମିକ ସଂଗଠନ କିମ୍ବା ଏକ ବୋର୍ଡ । ଏହା ଇସଲାମ ସିଦ୍ଧାନ୍ତରେ ପରିଚାଳିତ । ଏଥିରେ ଇସଲାମକୁ ମାନୁଥିବା ଏବଂ ଅନୁସରଣ କରୁଥିବା ଲୋକେ ଅନେକ ପ୍ରକାରର ଦାନ କରିଥାନ୍ତି । ଏଥିରେ ସବୁଠୁ ଅଧିକ ଦାନ ଜମିକୁ ଦିଆଯାଇଛି । ଅର୍ଥାତ ଭାରତ ସରକାରଙ୍କ ପରେ ୱାକଫ ବୋର୍ଡ ଏମିତି ଏକ ସଂସ୍ଥା, ଯାହା ପାଖରେ ସବୁଠୁ ଅଧିକ ଜମି ରହିଛି । ମୋଗଲକାଳଠୁ ଭାରତରେ ଏହି ପରମ୍ପରା ଚାଲି ଆସିଛି । 

କେଉଁଥି ପାଇଁ ମିଳୁଛି ଜମି ?

ୱାକଫ ନିକଟରେ ଯେତେ ବି ଜମି ରହିଛି, ଏହାକୁ କୌଣସି ନା କୌଣସି ଉଦ୍ଦେଶ୍ୟରେ ଦାନ ଉଦ୍ଦେଶ୍ୟରେ ଦିଆଯାଇଛି । ଯେମିତି କବରସ୍ତାନ ପାଇଁ ଜମି, ମଦରସା ପାଇଁ, ଦରଘା ଓ ମସଜିଦ ପାଇଁ ଜମି ଦିଆଯାଇଛି । ମୋଗଲ ଶାସନ କାଳରେ ଦେଶର ସବୁଠୁ ବଡ ବଡ ସହରରେ ଜମିକୁ ୱାକଫକୁ ଦିଆଯାଇଛି । ଯେଉଁ ଜମିରେ ସେମାନେ ଇସଲାମିକ ଉଦ୍ଦେଶ୍ୟ ପାଇଁ କାମ କରି ପାରିବେ ।

ୱାକଫ ପାଖରେ କେତେ ସଂପତ୍ତି ଅଛି ?

ୱାକଫର ମୋଟ୍ ସଂପତ୍ତିକୁ ନେଇ ଅଲଗା ଅଲଗା ତଥ୍ୟ ସାମ୍ନାକୁ ଅନେକ ଥର ଆସି ଚାଲିଛି । କିଛି ତଥ୍ୟରେ କୁହାଯାଇଛି ଯେ, ୱାକଫ ପାଖରେ ମୋଟ୍ ୯ ଲକ୍ଷ ଏକରରୁ ଅଧିକ ଜମି ରହିଛି । ଯାହାର ମୂଲ୍ୟ ଏକ ଲକ୍ଷ କୋଟିରୁ ଅଧିକ ହେବ । ୱାକଫ ଆସେଟ୍ ମ୍ୟାନେଜମେଣ୍ଟ ସିଷ୍ଟମ ଅଫ ଇଣ୍ଡିଆ ପକ୍ଷରୁ ଜାରି ତଥ୍ୟ ଅନୁଯାୟୀ, ବୋର୍ଡ ପାଖରେ ମୋଟ୍ ୮.୭୨ ଲକ୍ଷ ଅଚଳ ସଂପତ୍ତି ରହିଛି । କିନ୍‌ୁତ ଏହି ତଥ୍ୟ ୨୦୨୨ରେ ଜାରି କରାଯାଇଥିଲା । 

କେନ୍ଦ୍ର ସରକାରଙ୍କ ପରେ ୱାକଫ ବୋର୍ଡ ହିଁ ଦେଶର ଦ୍ୱିତୀୟ ସଂସ୍ଥା, ଯାହା ପାଖରେ ସବୁଠୁ ଅଧିକ ଜମି ସଂପତ୍ତି ଭାବେ ରହିଛି । ଏହା ପରେ କ୍ୟାଥୋଲିକ ଚର୍ଚ୍ଚ ପାଖରେ ସବୁଠୁ ଅଧିକ ଜମି ରହିଛି । ଏଥିରୁ ଅଧିକ ଜମି ଧାର୍ମିକ କାମ ପାଇଁ କିମ୍ବା ଦାନ ଆକାରରେ ବ୍ୟବହାର କରାଯାଇଛି ।