ବିଦେଶରେ ବିଭିନ୍ନ ଜେଲରେ ଅଛନ୍ତି ୧୦ ହଜାରରୁ ଅଧିକ ଭାରତୀୟ । ଭିନ୍ନ ଭିନ୍ନ କାରଣ ପାଇଁ ଦେଶ ବାହାରେ ଜେଲରେ ବନ୍ଦୀ ହୋଇରହିଛନ୍ତି ଭାରତୀୟ । ତେବେ ବୈଦେଶିକ ମନ୍ତ୍ରଣାଳୟ ପକ୍ଷରୁ ଜଣାପଡ଼ିଛି ଯେ, ବିଦେଶରେ କାରାଦଣ୍ଡ ଭୋଗୁଥିବା ସାଉଦୀ ଆରବରେ ସର୍ବାଧିକ ଭାରତୀୟ ଜେଲ ଦଣ୍ଡ ଭୋଗୁଛନ୍ତି । ଭାରତ ସରକାର ଏମାନଙ୍କୁ କୁଟନୈତିକ ଏବଂ ଆଇନଗତ ସହାୟତା ଯୋଗାଇ ଦେବା ସହିତ ସେମାନଙ୍କୁ ମୁକୁଳାଇବାକୁ ପ୍ରଚେଷ୍ଟା କରାଯାଉଥିବା ନେଇ କହିଛି ବୈଦେଶିକ ମନ୍ତ୍ରଣାଳୟ । 

ବିଦେଶରେ ଭାରତୀୟଙ୍କ ସ୍ଥିତି ସମ୍ପର୍କରେ ଅନୁଧ୍ୟାନ ଲାଗି ବୈଦେଶିକ ମନ୍ତ୍ରଣାଳୟ ସହ ସମ୍ପୃକ୍ତ ସଂସଦୀୟ କମିଟି ଆଗରେ ମନ୍ତ୍ରଣାଳୟ ପକ୍ଷରୁ ଉପସ୍ଥାପିତ ରିପୋର୍ଟରେ କୁହାଯାଇଛି, ଭାରତ ବାହାରେ ୮୬ଟି ଦେଶରେ ୧୦ହଜାର ୧୫୨ ଜଣ ଭାରତୀୟ ଜେଲରେ ଅଛନ୍ତି । ତେବେ ଏଇ ଦେଶ ଭିତରେ ସାଉଦୀ ଆରବରେ ସବୁଠୁ ଅଧିକା ଭାରତୀୟ ଜେଲରେ ରହିଛନ୍ତି । 

ରିପୋର୍ଟ ମୁତାବିକ, ସାଉଦୀ ଆରବ ଏବଂ ୟୁଏଇର ୨ ହଜାରରୁ ଅଧିକ ଭାରତୀୟ ଜେଲ ଦଣ୍ଡ ଭୋଗୁଛନ୍ତି । ପଡୋଶୀ ନେପାଳରେ ୧ହଜାର ୩୧୭ ଜଣ ଜେଲରେ ଥିବା ବେଳେ ମାଲେସିଆରେ ୩୩୮ ଜଣ, ଚୀନରେ ୧୭୩ ଜଣ ଭାରତୀୟ ଜେଲ ଦଣ୍ଡ ଭୋଗୁଛନ୍ତି । ସେମାନଙ୍କ ମଧ୍ୟରେ ଅନେକ ବିଚାରଧୀନ କଏଦୀ ଭାବେ ଜେଲରେ ଅଛନ୍ତି । ଭାରତର ଅନେକ ଲୋକେ କାମ ପାଇଁ ଶ୍ରମିକ ଭାବେ ବାହାର ଦେଶକୁ ଯାଇଛନ୍ତି । ତେବେ ସେଠାକାର ଆଇନ କାନୁନ୍ ସମ୍ପର୍କରେ ସେମାନେ ଭଲଭାବେ ଅବଗତ ନାହାନ୍ତି, ତେଣୁ ଅନେକ ସମୟରେ ସେମାନେ ଆଇନ୍ ବିରୋଧୀ କାର୍ଯ୍ୟ କରି ଏଠାରେ ପଶିଯାଉଛନ୍ତିି ।