ହରିଦ୍ୱାର: ଅଯୋଧ୍ୟା ରାମ ମନ୍ଦିର ଦାନ ବା ଚାନ୍ଦା ଆତ୍ମସାତ ହୋଇଥିବା ନେଇ ଦୀର୍ଘ ଦିନ ହେବ ଚର୍ଚ୍ଚା ଲାଗି ରହିଛି। ବିରୋଧୀ ଦଳଗୁଡ଼ିକ ମଧ୍ୟ ଏହି ପ୍ରସଙ୍ଗରେ ବାରମ୍ବାର ପ୍ରଶ୍ନ ଉଠାଉଛନ୍ତି। ଏହି ସମଗ୍ର ବିବାଦ ଉପରେ ଏବେ ରାଷ୍ଟ୍ରୀୟ ସ୍ୱୟଂସେବକ ସଂଘ  ସରସଂଘଚାଳକ ମୋହନ ଭାଗବତ ନିଜର ପ୍ରଥମ ପ୍ରତିକ୍ରିୟା ରଖିଛନ୍ତି। ହରିଦ୍ୱାର ଗସ୍ତ ସମୟରେ ଗଣମାଧ୍ୟମ ପ୍ରତିନିଧିଙ୍କ ଏକ ପ୍ରଶ୍ନର ଉତ୍ତର ଦେଇ ସେ ଏହି ପ୍ରସଙ୍ଗରେ ସ୍ପଷ୍ଟ ମତ ପ୍ରକାଶ କରିଛନ୍ତି।

ହରିଦ୍ୱାରରେ ଗଣମାଧ୍ୟମ ପ୍ରତିନିଧିମାନେ ଯେତେବେଳେ ମୋହନ ଭାଗବତଙ୍କୁ ରାମ ମନ୍ଦିର ଚାନ୍ଦା ଚୋରି ସମ୍ପର୍କିତ ଅଭିଯୋଗ ବିଷୟରେ ପଚାରିଥିଲେ, ସେ ସମ୍ପୂର୍ଣ୍ଣ ସ୍ପଷ୍ଟ ଭାବେ କହିଥିଲେ, ଦେଶରେ ଆଇନ ବ୍ୟବସ୍ଥା ରହିଛି। ଯଦି କେଉଁଠି ଚାନ୍ଦା ଟଙ୍କା ଚୋରି କିମ୍ବା ହେରଫେର୍ ହୋଇଛି, ତେବେ ସେଥିପାଇଁ କୋର୍ଟ ଏବଂ ପୋଲିସ ଅଛନ୍ତି। ନିୟମ ଅନୁଯାୟୀ ଏହାର ତଦନ୍ତ ହେବା ଉଚିତ୍ ଏବଂ ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ଦରକାର।ସେ ଆହୁରି ମଧ୍ୟ କହିଛନ୍ତି ଯେ ଏହି ମାମଲାରେ ଯେଉଁମାନେ ଅଭିଯୋଗ ଆଣୁଛନ୍ତି, ସେମାନଙ୍କୁ ପ୍ରମାଣ ସହିତ ନ୍ୟାୟାଳୟର ଦ୍ୱାରସ୍ଥ ହେବା ଉଚିତ୍।

‘ଆମେ ସାର୍ଟିଫିକେଟ୍ ବାଣ୍ଟିବାକୁ ବସିନାହୁଁ’

ସଂଘ ମୁଖ୍ୟ ନିଜର ସ୍ପଷ୍ଟବାଦୀ ଶୈଳୀରେ କହିଛନ୍ତି ଯେ, କିଏ ସାଧୁ ଆଉ କିଏ ଚୋର, ତାହାର ସାର୍ଟିଫିକେଟ୍ ବାଣ୍ଟିବା ସଂଘର କାମ ନୁହେଁ। ଯଦି କେହି ଭୁଲ୍ କରିଛନ୍ତି, ତେବେ ଆଇନ ଏହାର ବିଚାର କରିବ। ରାମ ମନ୍ଦିର ପାଇଁ ଆସିଥିବା ଦାନର ହିସାବ ସମ୍ପୂର୍ଣ୍ଣ ଭାବେ ସ୍ୱଚ୍ଛ ରହିବା ଉଚିତ୍ ଏବଂ ଏଥିରେ କୌଣସି ଅନିୟମିତତାକୁ ପ୍ରଶ୍ରୟ ଦିଆଯିବ ନାହିଁ ବୋଲି ସେ ପରୋକ୍ଷରେ ସଂକେତ ଦେଇଛନ୍ତି।