ଇସଲାମାବାଦ୍‌: ପାକିସ୍ତାନର ପ୍ରତିରକ୍ଷା ମନ୍ତ୍ରୀ ଖୱାଜା ଆସିଫ୍ ଏକ ସମ୍ପ୍ରତି ଏକ ଟିଭି ସାକ୍ଷାତକାରରେ ସ୍ପଷ୍ଟ ଶବ୍ଦରେ ଭାରତକୁ ଚେତାବନୀ ଦେଇଛନ୍ତି। ସେ କହିଛନ୍ତି ଯେ, ଯେ ଯଦି ଏହା ସିନ୍ଧୁ ନଦୀରେ କୌଣସି ନିର୍ମାଣ କରି ସିନ୍ଧୁ ଜଳ ଚୁକ୍ତି ଉଲ୍ଲଂଘନ କରେ, ତେବେ ପାକିସ୍ତାନ ସାମରିକ କାର୍ଯ୍ୟାନୁଷ୍ଠାନ ଗ୍ରହଣ କରିବ। ପ୍ରତିରକ୍ଷା ମନ୍ତ୍ରୀ କହିଛନ୍ତି ଯେ ଯଦି ସେମାନେ କୌଣସି ପ୍ରକାରର ଗଠନ ନିର୍ମାଣ କରିବାକୁ ଚେଷ୍ଟା କରନ୍ତି, ତେବେ ଆମେ ତାହା ଉପରେ ଆକ୍ରମଣ କରିବୁ। ଆକ୍ରମଣ କେବଳ ଗୁଳି ମାଧ୍ୟମରେ କରାଯାଏ ନାହିଁ, ପାଣି ବନ୍ଦ କରିବା ମଧ୍ୟ ଏକ ଅସ୍ତ୍ର।

ଏହି ବିବୃତ୍ତି ଏପରି ଏକ ସମୟରେ ଆସିଛି ଯେତେବେଳେ ପହଲଗାମ ଆକ୍ରମଣ ପରେ ଭାରତ ପାକିସ୍ତାନ ଉପରେ ଆଙ୍ଗୁଠି ଉଠାଇଥିଲା ଏବଂ ଦୁଇ ଦେଶ ମଧ୍ୟରେ କୂଟନୈତିକ ସମ୍ପର୍କ ଖରାପ ହୋଇଛି। ବିଶ୍ୱ ବ୍ୟାଙ୍କର ମଧ୍ୟସ୍ଥତାରେ ୧୯୬୦ ମସିହାରେ ଭାରତ ଏବଂ ପାକିସ୍ତାନ ମଧ୍ୟରେ ସ୍ୱାକ୍ଷରିତ ସିନ୍ଧୁ ଜଳ ଚୁକ୍ତିନାମାକୁ ଏପର୍ଯ୍ୟନ୍ତ ବିଶ୍ୱର ସବୁଠାରୁ ସଫଳ ଜଳ ଚୁକ୍ତିନାମା ଭାବରେ ବିବେଚନା କରାଯାଏ। ଏହି ଚୁକ୍ତି ଅନୁଯାୟୀ, ଭାରତକୁ ପୂର୍ବ ନଦୀଗୁଡ଼ିକ ରାବି, ବ୍ୟାସ, ସତଲେଜ ଉପରେ ନିୟନ୍ତ୍ରଣ ଦିଆଯାଇଥିଲା। ପଶ୍ଚିମ ନଦୀଗୁଡ଼ିକ ସିନ୍ଧୁ, ଝେଲମ, ଚେନାବ ଉପରେ ପାକିସ୍ତାନ ଅଧିକ ଅଧିକାର ପାଇଲା।

କିଛି ସର୍ତ୍ତ ଅନୁଯାୟୀ ପଶ୍ଚିମ ନଦୀଗୁଡ଼ିକରେ ବିଦ୍ୟୁତ ପ୍ରକଳ୍ପ ଏବଂ ଅନ୍ୟାନ୍ୟ ନିର୍ମାଣ କାର୍ଯ୍ୟ କରିବା ପାଇଁ ଭାରତକୁ ସୀମିତ ଅନୁମତି ମିଳିଛି। ଭାରତ ଏହି ଚୁକ୍ତିକୁ ସ୍ଥଗିତ ରଖିବା କିମ୍ବା ଏକପାଖିଆ ଭାବରେ ବାତିଲ କରିବାର ସମ୍ଭାବନା ପ୍ରତି ପାକିସ୍ତାନର ପ୍ରତିକ୍ରିୟା କଠୋର ଏବଂ ଆକ୍ରମଣାତ୍ମକ ରହିଛି। ୨୨ ଏପ୍ରିଲରେ ଜମ୍ମୁ-କାଶ୍ମୀରର ପହଲଗାମରେ ୨୬ ଜଣଙ୍କ ମୃତ୍ୟୁ ପରେ ଭାରତ ପାକିସ୍ତାନ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିଥିଲା। ଆଇଡବ୍ଲୁଟି ବାତିଲ କରିବା ବ୍ୟତୀତ, ଭାରତ ପାକିସ୍ତାନୀ ନାଗରିକଙ୍କ ଭିସା ବାତିଲ କରିଦେଇଥିଲା ଏବଂ ୱାଘା-ଅଟାରୀ ସୀମାକୁ ବନ୍ଦ କରିଦେଇଥିଲା।

ଆସିଫଙ୍କ ଅବାନ୍ତର ବୟାନ

ଆସିଫ୍ ବିଶ୍ୱାସ କରନ୍ତି ଯେ ଭାରତକୁ ଅନ୍ତର୍ଜାତୀୟ ମଞ୍ଚରେ ଆଶା କରାଯାଇଥିବା ସମର୍ଥନ ମିଳୁନାହିଁ। ସେ ଅଭିଯୋଗ କରିଛନ୍ତି ଯେ ଭାରତର ଅଭିଯୋଗକୁ ଅନ୍ତର୍ଜାତୀୟ ସମୁଦାୟ ପ୍ରତ୍ୟାଖ୍ୟାନ କରିଛନ୍ତି। ମୋଦୀ ସରକାରଙ୍କ ପାଖରେ ନିଜର ଦାବିକୁ ପ୍ରମାଣ କରିବା ପାଇଁ କୌଣସି ପ୍ରମାଣ ନାହିଁ।

ଅଧିକ ପଢ଼ନ୍ତୁ: ଗୁଜରାଟରେ ୩.୪ ତୀବ୍ରତାର ଭୂମିକମ୍ପ