ନୂଆଦିଲ୍ଲୀ: ଭାରତୀୟ ରାଜନୀତିର ଇତିହାସରେ ଏକ ନୂଆ ଅଧ୍ୟାୟ ଯୋଡ଼ିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। ଦେଶର ପ୍ରଥମ ପ୍ରଧାନମନ୍ତ୍ରୀ ଜବାହରଲାଲ ନେହେରୁଙ୍କ ନାମରେ ଥିବା ଏକ ବଡ଼ ରେକର୍ଡକୁ ସେ ଅତିକ୍ରମ କରିଛନ୍ତି। ନେହେରୁଙ୍କ ତୁଳନାରେ ମୋଦୀ ଏବେ ଦେଶର ସବୁଠାରୁ ଦୀର୍ଘ ସମୟ ଧରି ଶାସନ ଗାଦିରେ ରହିଥିବା 'ନିର୍ବାଚିତ' ପ୍ରଧାନମନ୍ତ୍ରୀ ହେବାର ଗୌରବ ହାସଲ କରିଛନ୍ତି। ଏହି ଐତିହାସିକ ସଫଳତା ଏବଂ ମୋଦୀ ସରକାରଙ୍କ ୧୨ ବର୍ଷର ପୂର୍ତ୍ତି ଅବସରରେ ଆସନ୍ତାକାଲି ଏନଡିଏର ଏକ ବିଶାଳ ବୈଠକ ଅନୁଷ୍ଠିତ ହେବାକୁ ଯାଉଛି।

କିଭଳି ଭାଙ୍ଗିଲା ନେହେରୁଙ୍କ ରେକର୍ଡ ?

ପ୍ରଧାନମନ୍ତ୍ରୀ ମୋଦୀ ୨୦୧୪ ମଇ ୨୬ରେ ପ୍ରଥମ ଥର ପାଇଁ ଶପଥ ଗ୍ରହଣ କରିଥିଲେ। ଏହାପରେ ୨୦୧୯ ଏବଂ ପରେ ୨୦୨୪ରେ ଲଗାତାର ତୃତୀୟ ଥର ପାଇଁ ସେ ଦେଶର ମଙ୍ଗ ଧରିଛନ୍ତି। ୧୦ ଜୁନ୍ ସୁଦ୍ଧା ମୋଦୀ ଜଣେ 'ନିର୍ବାଚିତ' ପ୍ରଧାନମନ୍ତ୍ରୀ ଭାବେ ନେହେରୁଙ୍କ ୪,୩୯୯ ଦିନର କାର୍ଯ୍ୟକାଳ ରେକର୍ଡକୁ ପଛରେ ପକାଇ ଦେଇଛନ୍ତି। ସୂଚନାଯୋଗ୍ୟ ଯେ, ନେହେରୁଙ୍କ ପ୍ରଥମ ପର୍ଯ୍ୟାୟ କାର୍ଯ୍ୟକାଳ (୧୯୪୭-୧୯୫୨) ଏକ ଅନ୍ତରୀଣ ସରକାର ଭାବେ ଥିଲା, କାରଣ ସେତେବେଳେ ନିର୍ବାଚନ ହୋଇନଥିଲା। ସେହିପରି ଇନ୍ଦିରା ଗାନ୍ଧୀଙ୍କ କାର୍ଯ୍ୟକାଳ ୧୪ ବର୍ଷ ଥିଲେ ମଧ୍ୟ ସେ ଲଗାତାର ଭାବେ ଏହି ପଦବୀରେ ରହିନଥିଲେ। ଏହି ଦୃଷ୍ଟିରୁ ମୋଦୀ ଏବେ ଭାରତର ଶୀର୍ଷ ସ୍ଥାନରେ ପହଞ୍ଚିଛନ୍ତି।

ଭାରତ ମଣ୍ଡପମରେ ଜମିବ ୩୫ ଦଳ ଓ ୭୫ ନେତାଙ୍କ ଆସର

ଏହି ସଫଳତାକୁ ପାଳନ କରିବା ପାଇଁ ଦିଲ୍ଲୀର ଭାରତ ମଣ୍ଡପମରେ ଏନଡିଏର ମହାବୈଠକ ବସିବ। ପ୍ରାୟ ଦେଢ଼ ବର୍ଷ ପରେ ଏନଡିଏ ଏତେ ବଡ଼ ଆୟୋଜନ କରିବାକୁ ଯାଉଛି। ଏହି ବୈଠକରେ ଏନଡିଏ ଶାସିତ ୨୨ଟି ରାଜ୍ୟର ମୁଖ୍ୟମନ୍ତ୍ରୀ ଏବଂ ଉପ-ମୁଖ୍ୟମନ୍ତ୍ରୀମାନେ ଯୋଗଦେବେ। ହେଭିୱେଟ୍ ନେତା ପ୍ରଧାନମନ୍ତ୍ରୀ ମୋଦୀଙ୍କ ସହ ରାଜନାଥ ସିଂ, ଅମିତ ଶାହ, ଜେ.ପି. ନଡ୍ଡା ଏବଂ ଶିବରାଜ ସିଂ ଚୌହାନଙ୍କ ଭଳି କେନ୍ଦ୍ରମନ୍ତ୍ରୀ ଉପସ୍ଥିତ ରହିବେ।

ସହଯୋଗୀ ଦଳ ଭାବେ  ଟିଡିପିର କେ. ରାମମୋହନ ନାଇଡୁ, ଜେଡିୟୁର ରାଜୀବ ରଞ୍ଜନ ସିଂ, ଜେଡିଏସର ଏଚ.ଡି. କୁମାରସ୍ୱାମୀ ଏବଂ ଅପନା ଦଳ (ଏସ୍) ର ଅନୁପ୍ରିୟା ପଟେଲ ମଧ୍ୟ ବୈଠକରେ ସାମିଲ ହେବେ।

ବୈଠକର ମୁଖ୍ୟ ଏଜେଣ୍ଡା

ଏହି ବୈଠକର ଅଧ୍ୟକ୍ଷତା ବିଜେପି ଅଧ୍ୟକ୍ଷ ନିତିନ ନବୀନ କରିବେ। ଏଥିରେ ପ୍ରଧାନମନ୍ତ୍ରୀ ମୋଦୀଙ୍କର ଏହି ବିରଳ ସଫଳତାକୁ ପ୍ରଶଂସା କରି ଏକ ସ୍ୱତନ୍ତ୍ର ପ୍ରସ୍ତାବ ପାରିତ ହେବାର ସମ୍ଭାବନା ରହିଛି। ଗଠବନ୍ଧନର ସମସ୍ତ ୩୫ଟି ସହଯୋଗୀ ଦଳ ଏକଜୁଟ ହୋଇ ଆଗାମୀ ରଣନୀତି ଉପରେ ମଧ୍ୟ ଆଲୋଚନା କରିପାରନ୍ତି।