ନୂଆଦିଲ୍ଲୀ: ସଡ଼କ ଦୁର୍ଘଟଣାରେ ଆହତଙ୍କୁ ମାର୍ଚ୍ଚ ସୁଦ୍ଧା ସାରା ଦେଶରେ କ୍ୟାସଲେସ୍ ଚିକିତ୍ସା ମିଳିବ। କୌଣସି ପ୍ରକାର ରାସ୍ତାରେ ଗାଡି ଧକ୍କା ହେଲେ ଆହତଙ୍କୁ ୭ ଦିନ ପର୍ଯ୍ୟନ୍ତ ଦୁର୍ଘଟଣା ପିଛା ସର୍ବାଧିକ ଦେଢ଼ ଲକ୍ଷ ଟଙ୍କା ପର୍ଯ୍ୟନ୍ତ କ୍ୟାସଲେସ୍ ଚିକିତ୍ସା ମିଳିବ ବୋଲି କେନ୍ଦ୍ରମନ୍ତ୍ରୀ ନୀତିନ ଗଡ଼କରୀ କହିଛନ୍ତି। ଏହି ଯୋଜନାକୁ କାର୍ଯ୍ୟକାରୀ କରିବା ପାଇଁ ଜାତୀୟ ସ୍ୱାସ୍ଥ୍ୟ ପ୍ରାଧିକରଣ (ଏନ୍ଏଚ୍ଏ) ଦାୟୀ ରହିବ। ଆସନ୍ତା ସଂସଦ ଅଧିବେଶନରେ ମୋଟର ଯାନ ସଂଶୋଧନ ଆଇନ ଆଗତ କରାଯିବ ବୋଲି ସେ କହିଛନ୍ତି। 

ସୂଚନାଯୋଗ୍ୟ, ସଡ଼କ ପରିବହନ ଓ ରାଜପଥ ମନ୍ତ୍ରଣାଳୟ ସଡ଼କ ଦୁର୍ଘଟଣାରେ ପୀଡ଼ିତଙ୍କୁ 'କ୍ୟାସଲେସ୍' ଚିକିତ୍ସା ଯୋଗାଇଦେବା ପାଇଁ ୨୦୨୪ ମାର୍ଚ୍ଚ ୧୪ତାରିଖରେ ପାଇଲଟ୍ ଯୋଜନା ଆରମ୍ଭ କରିଥିଲା। ପରବର୍ତ୍ତୀ ସମୟରେ ଏହି ଯୋଜନା ୬ଟି ରାଜ୍ୟରେ କାର୍ଯ୍ୟକାରୀ ହୋଇଥିଲା। ଏବେ ଏହା ମାର୍ଚ୍ଚରୁ ସାରା ଦେଶରେ ଲାଗୁ ହେବାକୁ ଯାଉଛି।

ଗଡ଼କରୀ କହିଛନ୍ତି ଯେ ୪୨ତମ ପରିବହନ ବିକାଶ ପରିଷଦ ବୈଠକରେ ସଡ଼କ ସୁରକ୍ଷାକୁ ପ୍ରାଥମିକତା ଦିଆଯାଇଛି। ବୈଠକରେ ନିଷ୍ପତ୍ତି ନିଆଯାଇଛି ଯେ ସମସ୍ତ ଭାରୀ ଯାନ ଅର୍ଥାତ୍ ଗାଡ଼ି ନିର୍ମାତାଙ୍କ ଦ୍ୱାରା ନିର୍ମିତ ବସ୍ ଓ ଟ୍ରକରେ ବାଧ୍ୟତାମୂଳକ ଭାବେ ତିନୋଟି ନିରାପତ୍ତା ଜ୍ଞାନକୌଶଳ ରହିବ। ଏହି ଜ୍ଞାନକୌଶଳ ଟ୍ରେନ୍ ର 'ଆର୍ମର୍' ସୁରକ୍ଷା ବ୍ୟବସ୍ଥା ଭଳି ଟ୍ରକ୍ ଓ ବସ୍‌କୁ ସୁରକ୍ଷା ଦେଇପାରିବ ବୋଲି ବିଶ୍ୱାସ କରାଯାଉଛି। ନୂଆଦିଲ୍ଲୀରେ ଦୁଇ ଦିନିଆ କର୍ମଶାଳା ସହ ପରିଷଦର ବୈଠକ ଅନୁଷ୍ଠିତ ହୋଇଥିଲା। 

ସୋମବାର ପ୍ରଥମ ଦିନରେ କେନ୍ଦ୍ର ସଡ଼କ ପରିବହନ ଓ ରାଜପଥ ସଚିବ ଭି ଉମାଶଙ୍କର ୨୭ଟି ରାଜ୍ୟର ପରିବହନ ସଚିବ ଓ ପରିବହନ କମିସନରଙ୍କ ସହ ବୈଠକ କରିଥିବା ବେଳେ ନୀତିନ ଗଡ଼କରୀ ମଙ୍ଗଳବାର ପରିବହନ ମନ୍ତ୍ରୀଙ୍କ ସହ ବୈଠକ କରିଥିଲେ।

ସଡ଼କ ଦୁର୍ଘଟଣା ରୋକିବା ପାଇଁ ଭାରି ଯାନରେ ତିନୋଟି ଜ୍ଞାନକୌଶଳକୁ ବାଧ୍ୟତାମୂଳକ କରିବାକୁ ନିଷ୍ପତ୍ତି ନିଆଯାଇଛି ବୋଲି କେନ୍ଦ୍ରମନ୍ତ୍ରୀ କହିଛନ୍ତି। ଇଲେକ୍ଟ୍ରୋନିକ୍ ସ୍ଥିରତା ନିୟନ୍ତ୍ରଣ ଏବଂ ସ୍ୱୟଂଚାଳିତ ଜରୁରୀକାଳୀନ ବ୍ରେକିଂ ସିଷ୍ଟମ ଦୁଇଟି ଯାନ ମଧ୍ୟରେ ଧକ୍କାକୁ ରୋକିପାରିବ, ଯେତେବେଳେ କି ଡ୍ରାଇଭରର ନିଦ୍ରା ପ୍ରଣାଳୀ ଏକ ଅଡିଓ ସିଷ୍ଟମ ହେବ ଯାହା ଡ୍ରାଇଭର ନିଦ୍ରାହୀନ କିମ୍ବା ଅଳସୁଆ ଥିଲେ ଅନୁଭବ କରିବ ଏବଂ ଚାଳକଙ୍କୁ ସତର୍କ କରିବ।

ଗଡ଼କରୀ କହିଛନ୍ତି ଯେ ୨୦୨୪ ମସିହାରେ ସଡ଼କ ଦୁର୍ଘଟଣାରେ ମୃତ୍ୟୁବରଣ କରିଥିବା ୧ ଲକ୍ଷ ୮୦ ହଜାର ଲୋକଙ୍କ ମଧ୍ୟରୁ ୩୫ ହଜାର ଲୋକଙ୍କ ମୃତ୍ୟୁ ବିନା ଡ୍ରାଇଭିଂ ଲାଇସେନ୍ସରେ ଡ୍ରାଇଭରଙ୍କ ଯୋଗୁଁ ହୋଇଛି। ଡ୍ରାଇଭରଙ୍କୁ ପ୍ରଶିକ୍ଷଣ ଦେବା ପାଇଁ ମନ୍ତ୍ରଣାଳୟ ଏକ ଡ୍ରାଇଭର ଟ୍ରେନିଂ ପଲିସି ଆରମ୍ଭ କରିଛି। ଏହା ଅଧୀନରେ ସାରା ଦେଶରେ ୧୨୫୦ ଟି ନୂତନ ପ୍ରଶିକ୍ଷଣ କେନ୍ଦ୍ର ଏବଂ ଫିଟନେସ୍ କେନ୍ଦ୍ର ଖୋଲାଯିବ। ଏଥିରେ ମନ୍ତ୍ରଣାଳୟ ପକ୍ଷରୁ ପାଖାପାଖି ସାଢ଼େ ୪ ହଜାର କୋଟି ଟଙ୍କା ବିନିଯୋଗ କରାଯିବ। ପ୍ରଶିକ୍ଷଣ ଓ ଲାଇସେନ୍ସ ନେଇ ପ୍ରାୟ ୨୫ ଲକ୍ଷ ନୂଆ ଡ୍ରାଇଭର ଏହି କେନ୍ଦ୍ରରୁ ବାହାରକୁ ଆସି ନିଯୁକ୍ତି ପାଇବେ ଏବଂ ଏହି କେନ୍ଦ୍ରଗୁଡ଼ିକରେ ପ୍ରାୟ ୧୫ ଲକ୍ଷ ଲୋକଙ୍କୁ ନିଯୁକ୍ତି ମିଳିବ। ପ୍ରତି ଜିଲ୍ଲାରେ ଏକ ସ୍ୱୟଂଚାଳିତ ଟେଷ୍ଟିଂ ସେଣ୍ଟର ଖୋଲାଯିବ।