ନୂଆଦିଲ୍ଲୀ: ମଧ୍ୟପ୍ରଦେଶର ଭୋପାଳରେ ମୁସଲିମ ସମାଜର ଅନେକ ଲୋକ ୱାକଫ ସଂଶୋଧନ ବିଧେୟକର ସମର୍ଥନ କରିଛନ୍ତି । ଭୋପାଳରେ ଅନେକ ଛୋଟ ଛୋଟ ମୁସଲିମ ସଂଗଠନ ଏହି ବିଧେୟକ ସମର୍ଥନରେ ରାଲି କରିଛନ୍ତି । ବଡ କଥା ଏହି ରାଲିରେ ବହୁ ସଂଖ୍ୟାରେ ମୁସଲିମ ମହିଳା ମଧ୍ୟ ହାତରେ ‘ଧନ୍ୟବାଦ ମୋଦୀ ଜୀ’ ପୋଷ୍ଟର ଧରି ରାସ୍ତାକୁ ଓହ୍ଲାଇଛନ୍ତି । 

ଏହା ପୂର୍ବରୁ ଭୋପାଳର ହତାଇ ଖେଡା ଡ୍ୟାମ ନିକଟରେ ଆନନ୍ଦପୁରା କୋକତାର ମୁସଲିମ ସମାଜର ଲୋକେ ଏକତ୍ର ହୋଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ବ୍ୟାନର-ପୋଷ୍ଟର ଧରି କୃତଜ୍ଞତା ଜଣାଇଛନ୍ତି । ଏହା ସହିତ ବାଜା ଢୋଲ ବଜାଇ ବାଣ ଫୁଟାଇ ବିଧେୟକର ସମର୍ଥନ କରିଛନ୍ତି । ମୁସଲିମ ସମାଜ ଏହି ବିଧେୟକକୁ ନେଇ କେତେ ଖୁସି ଅଛି ତାହା ଆପଣ ଏଥିରୁ ଜାଣି ପାରିବେ । 

ସୂଚନାଯୋଗ୍ୟ, ୱାକଫ ସଂଶୋଧନ ବିଧେୟକ ଆଜି ଲୋକସଭାରେ ଉପସ୍ଥାପିତ ହୋଇଛି । ସଂସଦୀୟ ବ୍ୟାପାର ମନ୍ତ୍ରୀ କିରେନ ରିଜିଜୁ ଏହି ବିଧେୟକକୁ ସଂସଦର ନିମ୍ନ ସଦନରେ ଉପସ୍ଥାପନ କରିଛନ୍ତି । ଏହି ବିଲ୍ ଉପରେ ଆଲୋଚନା ପାଇଁ ୮ ଘଣ୍ଟାର ସମୟ ରଖାଯାଇଛି । ସରକାର କହିଛନ୍ତି ଯେ, ଯଦି ଗୃହର ସହମତି ହୁଏ ତେବେ ଆଲୋଚନା ପାଇଁ ସମୟ ବୃଦ୍ଧି କରାଯିବ । ସରକାରଙ୍କ ପକ୍ଷରୁ ଆଜି ଆଲୋଚନା ସମୟରେ ପ୍ରଶ୍ନର ଉତ୍ତର ଦିଆଯିବ ।