କୋଲକାତା: ଚଳିତ ବର୍ଷର ଆନ୍ତର୍ଜାତୀୟ ଯୋଗ ଦିବସ ଅତ୍ୟନ୍ତ ସ୍ପେଶାଲ ହେବାକୁ ଯାଉଛି। ପ୍ରଥମ ଥର ପାଇଁ ପଶ୍ଚିମବଙ୍ଗର ରାଜଧାନୀ କୋଲକାତାରେ ଜାତୀୟ ସ୍ତରର ମୁଖ୍ୟ କାର୍ଯ୍ୟକ୍ରମ ଆୟୋଜିତ ହେଉଛି, ଯେଉଁଠାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନିଜେ ଯୋଗ ଦେଇଛନ୍ତି। କୋଲକାତାର ପ୍ରସିଦ୍ଧ 'ରେଡ୍ ରୋଡ୍'ରେ ଆୟୋଜିତ ଏହି ମେଗା ଇଭେଣ୍ଟରେ ପ୍ରଧାନମନ୍ତ୍ରୀଙ୍କ ସହ ପ୍ରାୟ ୧୦ ଲକ୍ଷ ଲୋକ ଏକାଠି ଯୋଗାଭ୍ୟାସ କରି ଏକ ନୂଆ ରେକର୍ଡ କରିବାକୁ ଯାଉଛନ୍ତି। ଆୟୁଷ ମନ୍ତ୍ରଣାଳୟ ପକ୍ଷରୁ ଏହି ସୂଚନା ଦିଆଯାଇଛି।

ଦେଶର 'ଯୋଗ ରାଜଧାନୀ' ସାଜିବ କୋଲକାତା

ଆୟୁଷ ମନ୍ତ୍ରଣାଳୟର ସଚିବ ବୈଦ୍ୟ ରାଜେଶ କୋଟେଚାଙ୍କ କହିବା ଅନୁସାରେ, ୧୨ତମ ଆନ୍ତର୍ଜାତୀୟ ଯୋଗ ଦିବସ ଅବସରରେ ପ୍ରଧାନମନ୍ତ୍ରୀ ମୋଦୀ ରବିବାର ସକାଳେ କୋଲକାତାରେ ପହଞ୍ଚି ସାରିଛନ୍ତି। ମୁଖ୍ୟ କାର୍ଯ୍ୟକ୍ରମ ସ୍ଥଳରେ ପ୍ରାୟ ୩୫ ହଜାର ଲୋକ ସିଧାସଳଖ ଉପସ୍ଥିତ ରହିବେ। ଏହା ସହିତ ସାରା କୋଲକାତାରେ ପ୍ରାୟ ୧୦ ଲକ୍ଷ ଲୋକ ପ୍ରଧାନମନ୍ତ୍ରୀଙ୍କ ସହ ଡିଜିଟାଲ୍ ଏବଂ ଶାରୀରିକ ଭାବେ ଯୋଗ ଦେବେ। ସରକାରୀ ପୋର୍ଟାଲରେ ଏଥିପାଇଁ ପ୍ରାୟ ୭ ଲକ୍ଷରୁ ଅଧିକ ଲୋକ ପଞ୍ଜୀକରଣ କରିସାରିଛନ୍ତି।

ହାୱଡା ବ୍ରିଜ୍‌ରେ ଦେଖିବାକୁ ମିଳିଲା ଭବ୍ୟ ଡ୍ରୋନ୍ ଶୋ'

ଯୋଗ ଦିବସ ପୂର୍ବରୁ କୋଲକାତାର ପ୍ରସିଦ୍ଧ ହାୱଡା ବ୍ରିଜ୍ ନିକଟରେ ଏକ ଆକର୍ଷଣୀୟ ଡ୍ରୋନ୍ ଶୋ'ର ଆୟୋଜନ କରାଯାଇଥିଲା। ଏହି ଲାଇଟ୍ ଶୋ' ମାଧ୍ୟମରେ ଆକାଶରେ ବିଭିନ୍ନ ଯୋଗ ମୁଦ୍ରା ଏବଂ ଭାରତୀୟ ସାଂସ୍କୃତିକ ପ୍ରତୀକଗୁଡିକୁ ପ୍ରଦର୍ଶିତ କରାଯାଇଥିଲା, ଯାହା ସ୍ଥାନୀୟ ଲୋକଙ୍କ ମନ ମୋହି ନେଇଛି।

ଆୟୁଷ ମନ୍ତ୍ରଣାଳୟର ଯୁଗ୍ମ ସଚିବ ମୋନାଲିସା ଦାସ କହିଛନ୍ତି ଯେ, ପ୍ରତିବର୍ଷ ଦେଶର ଭିନ୍ନ ଭିନ୍ନ ସ୍ଥାନରେ ଯୋଗ ଦିବସର ମୁଖ୍ୟ କାର୍ଯ୍ୟକ୍ରମ ଆୟୋଜିତ ହୋଇଥାଏ। ଏଥର କୋଲକାତାରେ ଯୋଗ ପ୍ରଚାର ପାଇଁ ୪ଟି ସ୍ଥାନରେ 'ରନ୍ ଫର୍ ଯୋଗ' ମାରାଥନ ଆୟୋଜନ କରାଯାଇଛି, ଯେଉଁଥିରେ ୧୦ ହଜାରରୁ ଅଧିକ ଲୋକ ସାମିଲ ହେଉଛନ୍ତି। ଏହି ମୁଖ୍ୟ ମଞ୍ଚରେ ପ୍ରଧାନମନ୍ତ୍ରୀ ମୋଦୀଙ୍କ ସହ ଜଣାଶୁଣା ଯୋଗ ଗୁରୁ ଉମଙ୍ଗ ତ୍ୟାଗୀ ମଧ୍ୟ ଯୋଗାଭ୍ୟାସ କରିବେ।