ମୁମ୍ବାଇ: ମହାରାଷ୍ଟ୍ର ବିଧାନସଭା ନିର୍ବାଚନ ଫଳାଫଳ ୨୦୨୪ ର ଫଳାଫଳର ପ୍ରାୟ ୧୦ ଦିନ ପରେ, ବୁଧବାର ରାଜ୍ୟର ନୂତନ ମୁଖ୍ୟମନ୍ତ୍ରୀଙ୍କ ସସପେନ୍ସର ଅନ୍ତ ହୋଇପାରେ। ଭାରତୀୟ ଜନତା ପାର୍ଟି (ବିଜେପି) ଦ୍ୱାରା ନିଯୁକ୍ତ ଦୁଇ ପର୍ଯ୍ୟବେକ୍ଷକ ଆଜି ମୁମ୍ବାଇରେ ବିଜେପି ବିଧାୟକ ଦଳ ସହ ବୈଠକ କରିବେ। ଏହାପରେ ମୁଖ୍ୟମନ୍ତ୍ରୀଙ୍କ ନାମ ଘୋଷଣା କରାଯିବ।

ଦେବେନ୍ଦ୍ର ଫଡନାଭିସ ମୁଖ୍ୟମନ୍ତ୍ରୀ ଦୌଡ଼ରେ ସବୁଠୁ ଆଗରେ ଅଛନ୍ତି ଏବଂ ସେ ମୁଖ୍ୟମନ୍ତ୍ରୀ ହେବା ପ୍ରାୟ ନିଶ୍ଚିତ, କେବଳ ଆନୁଷ୍ଠାନିକ ଘୋଷଣା ବାକି ଅଛି। ଗଣମାଧ୍ୟମର ରିପୋର୍ଟ ଅନୁଯାୟୀ, ଦଳର ବରିଷ୍ଠ ନେତାମାନେ ତାଙ୍କ ସପକ୍ଷରେ ଅଛନ୍ତି। ସେପଟେ ସେ ଏବେ ଶିବସେନା ଶିନ୍ଦେ ଗୋଷ୍ଠୀ ମୁଖ୍ୟ ଏକନାଥ ସିନ୍ଦେଙ୍କୁ ରାଜି କରାଇଛନ୍ତି। ସିନ୍ଦେ ଉପମୁଖ୍ୟମନ୍ତ୍ରୀ ପଦ ପାଇଁ ରାଜି ହୋଇଛନ୍ତି।

ମହାରାଷ୍ଟ୍ର ବିଜେପିର ବରିଷ୍ଠ ନେତାଙ୍କ ସହ ଦେବେନ୍ଦ୍ର ଫଡନାଭିସ ମଙ୍ଗଳବାର ମୁମ୍ବାଇସ୍ଥିତ ତାଙ୍କ ବାସଭବନରେ କାର୍ଯ୍ୟକାରୀ ମୁଖ୍ୟମନ୍ତ୍ରୀ ଏକନାଥ ସିନ୍ଦେଙ୍କୁ ଭେଟିଥିଲେ। ଏଥିରେ ମୁଖ୍ୟମନ୍ତ୍ରୀ ପଦଠାରୁ ଆରମ୍ଭ କରି ଉପମୁଖ୍ୟମନ୍ତ୍ରୀ ପର୍ଯ୍ୟନ୍ତ ବିସ୍ତୃତ ଆଲୋଚନା ହୋଇଥିଲା। କୁହାଯାଉଛି ଯେ ଏହି ସମୟରେ ଦେବେନ୍ଦ୍ର ଫଡନାଭିସ ଉପମୁଖ୍ୟମନ୍ତ୍ରୀ ପଦ ପାଇଁ ସିନ୍ଦେଙ୍କୁ ପ୍ରସ୍ତୁତ କରିଥିବା ବେଳେ ପୂର୍ବରୁ ଖବର ଆସିଥିଲା ଯେ ସିନ୍ଦେ ଫଡନାଭିସଙ୍କ ସହ ଏହି ପଦ ନେବାକୁ ରାଜି ନୁହଁନ୍ତି। 

ଆଜି କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ଏବଂ ଗୁଜୁରାଟର ପୂର୍ବତନ ମୁଖ୍ୟମନ୍ତ୍ରୀ ବିଜୟ ରୂପାନୀ, ଯେଉଁମାନଙ୍କୁ ଦଳୀୟ ହାଇକମାଣ୍ଡ ବିଧାୟକ ଦଳ ବୈଠକ ପାଇଁ କେନ୍ଦ୍ରୀୟ ପର୍ଯ୍ୟବେକ୍ଷକ ଭାବେ ନିଯୁକ୍ତ କରିଛନ୍ତି, ଉଭୟ ମୁମ୍ବାଇରେ ପହଞ୍ଚିବେ। ସେମାନଙ୍କ ଉପସ୍ଥିତିରେ ବିଧାୟକ ଦଳର ଏକ ବୈଠକ ବସି ବିଧାୟକମାନେ ସେମାନଙ୍କ ନେତା ଚୟନ କରିବେ। ଏହାବ୍ୟତୀତ କ୍ୟାବିନେଟ ବୈଠକରେ ମଧ୍ୟ ଆଲୋଚନା ହେବ। ପୂର୍ବାହ୍ନ ୧୦ଟାରେ ଆରମ୍ଭ ହେବ ବିଜେପି ବିଧାୟକ ଦଳ ବୈଠକ, ବୈଠକ ଶେଷ ହେବା ପରେ ମୁଖ୍ୟମନ୍ତ୍ରୀଙ୍କ ନାମ ଘୋଷଣା ହୋଇପାରେ।

ବୁଧବାର ମହାରାଷ୍ଟ୍ରର ନୂତନ ମୁଖ୍ୟମନ୍ତ୍ରୀ ଏବଂ କ୍ୟାବିନେଟର ନାମ ଚୂଡ଼ାନ୍ତ ହେବା ପରେ ଗୁରୁବାର (୫ ଡିସେମ୍ବର ୨୦୨୪) ଶପଥ ଗ୍ରହଣ ସମାରୋହ ଅନୁଷ୍ଠିତ ହେବ। ଏଥିରେ ରାଜ୍ୟର ନୂଆ ମୁଖ୍ୟମନ୍ତ୍ରୀ, ଉପମୁଖ୍ୟମନ୍ତ୍ରୀ ଓ ଅନ୍ୟ କ୍ୟାବିନେଟ୍ ମନ୍ତ୍ରୀମାନେ ଶପଥ ନେଇପାରିବେ।

ଅଧିକ ପଢ଼ନ୍ତୁ: ତେଲେଙ୍ଗାନାର ମୁଲୁଗୁରେ ୫.୩ ତୀବ୍ରତାର ଭୂମିକମ୍ପ