ଅଯୋଧ୍ୟା: ଅଯୋଧ୍ୟା ଶ୍ରୀରାମ ଜନ୍ମଭୂମି ମନ୍ଦିରରେ ଶ୍ରଦ୍ଧାଳୁଙ୍କ ଦ୍ୱାରା ଅର୍ପଣ କରାଯାଉଥିବା ଦାନ ଅର୍ଥ ହେରଫେର ଘଟଣାରେ ଏକ ବଡ଼ ଖବର ସାମ୍ନାକୁ ଆସିଛି। ଏହି ସମ୍ବେଦନଶୀଳ ମାମଲାର ତଦନ୍ତ କରୁଥିବା ସ୍ୱତନ୍ତ୍ର ତଦନ୍ତକାରୀ ଦଳ (SIT) ନିଜର ଖୋଳତାଡ଼ କାର୍ଯ୍ୟ ପ୍ରାୟତଃ ଶେଷ କରିଛି। ସୂତ୍ର ଅନୁଯାୟୀ, ଚଢ଼ାଉ ଚୋରି ଘଟଣାରେ SIT ଆସନ୍ତା ଦୁଇ ଦିନ ମଧ୍ୟରେ ନିଜର ଚୂଡ଼ାନ୍ତ ରିପୋର୍ଟ ପ୍ରଦାନ କରିବାକୁ ଯାଉଛି।

କ’ଣ ଥିଲା ସମ୍ପୂର୍ଣ୍ଣ ଘଟଣା ?

ରାମ ମନ୍ଦିରରେ ଶ୍ରଦ୍ଧାଳୁଙ୍କ ଆଗମନ ପରେ ପ୍ରତିଦିନ କୋଟି କୋଟି ଟଙ୍କାର ଚଢ଼ାଉ ଓ ଦାନ ସଂଗ୍ରହ ହେଉଥିଲା। କିନ୍ତୁ କିଛି ଦିନ ପୂର୍ବେ ମନ୍ଦିରକୁ ଆସୁଥିବା ଏହି ଦାନ ଅର୍ଥକୁ ଚୋରି କରାଯାଉଥିବା ନେଇ ସଙ୍ଗିନ ଅଭିଯୋଗ ଉଠିଥିଲା। ଏହାକୁ ନେଇ ସାରା ଦେଶରେ ଚର୍ଚ୍ଚା ଲାଗିରହିଥିବା ବେଳେ ଘଟଣାର ସଠିକ୍ ତଦନ୍ତ ପାଇଁ ଉତ୍ତରପ୍ରଦେଶ ସରକାର ଏକ ଉଚ୍ଚସ୍ତରୀୟ 'ଏସଆଇଟି' (SIT) ଗଠନ କରିଥିଲେ।

ସରିଲା  ଖୋଳତାଡ଼

SIT ର ବରିଷ୍ଠ ଅଧିକାରୀମାନେ ଅଯୋଧ୍ୟାରେ ରହି ମନ୍ଦିର ଟ୍ରଷ୍ଟର ବ୍ୟାଙ୍କ ଖାତା, ଦାନ ଗଣତି କେନ୍ଦ୍ର ଏବଂ ସମଗ୍ର ବ୍ୟବସ୍ଥାର ଯାଞ୍ଚ କରିଛନ୍ତି। ଏହି ମାମଲାରେ ସନ୍ଦିଗ୍ଧ ବ୍ୟକ୍ତିବିଶେଷ ଏବଂ ମନ୍ଦିର ପ୍ରଶାସନ ସହ ଜଡ଼ିତ କର୍ମଚାରୀଙ୍କୁ ମଧ୍ୟ ପଚରାଉଚରା କରାଯାଇଛି। ମନ୍ଦିରର ସୁରକ୍ଷା ବ୍ୟବସ୍ଥା ଓ ସିସିଟିଭି ଫୁଟେଜ୍‌ର ମଧ୍ୟ ଗଭୀର ଅନୁଧ୍ୟାନ କରାଯାଇଥିବା ସୂଚନା ମିଳିଛି।

ବ୍ୟାଙ୍କିଙ୍ଗ୍ ସେକ୍ଟର ଉପରେ ଯାଞ୍ଚ

ପ୍ରାଥମିକ ସୂଚନା ଅନୁଯାୟୀ, SIT ରାମ ମନ୍ଦିର ଟ୍ରଷ୍ଟର ଅଡିଟ୍ ଏବଂ ବ୍ୟାଙ୍କିଙ୍ଗ୍ ରେକର୍ଡଗୁଡ଼ିକର ପୁଙ୍ଖାନୁପୁଙ୍ଖ ଯାଞ୍ଚ କରିଛି। ବ୍ୟାଙ୍କ ନେଣଦେଣରେ କୌଣସି ବଡ଼ ତ୍ରୁଟି ଦେଖିବାକୁ ମିଳିନଥିବା ବେଳେ, ବ୍ୟାଙ୍କରେ ଟଙ୍କା ଜମା ହେବା ପୂର୍ବରୁ ଅର୍ଥାତ୍ ଦାନ ଗଣତି ଏବଂ ସେଗୁଡ଼ିକର ପରିଚାଳନା ସମୟରେ ହିଁ ଅନିୟମିତତା ହୋଇଥିବା ନେଇ ତଦନ୍ତକାରୀ ଦଳ ସନ୍ଦେହ କରୁଛି।