ନୂଆଦିଲ୍ଲୀ: ଦେଶର ସବୁ ବଡ଼ବଡ଼ ସହରରେ ପ୍ରଦୂଷଣ ଚିନ୍ତା ବଢ଼ାଇଛି। କିନ୍ତୁ ଦୀପାବଳି ଅବସରରେ ପ୍ରଦୂଷଣର ମାତ୍ରା ଏହା ବହୁଗୁଣିତ ହୋଇଯାଇଛି। ଦିଲ୍ଲୀରେ ସକାଳ ଭଳି ସବୁଠି ପ୍ରଦୂଷଣର ଧୂଆଁ ଦେଖିବାକୁ ମିଳୁଛି। ଯଦି କୌଣସି ବ୍ୟକ୍ତି ଶ୍ୱାସରୋଗୀ, ତେବେ ସେ ଘରୁ ବାହାରିବା ଉଚିତ୍ ନୁହେଁ। କାରଣ ତାଙ୍କୁ ନିଶ୍ୱାସ ନେବାରେ ଅସୁବିଧା ହୋଇପାରେ। ଦିଲ୍ଲୀ-ଏନସିଆରର ବାୟୁଗୁଣବତ୍ତା 'ଗମ୍ଭୀର' ସ୍ତରରେ ପହଞ୍ଚିଛି। ଅନେକ ସ୍ଥାନରେ ଏକ୍ୟୁଆଇ ୩୫୦ ଅତିକ୍ରମ କରିଛି।

ଏଥର ରାଜଧାନୀ ଦିଲ୍ଲୀରେ ଦୀପାବଳିରେ ସରକାର ବାଣ ଫୁଟାଇବା ଉପରେ କଟକଣା ଜାରି କରିଥିଲେ। କିନ୍ତୁ ଗୁରୁବାର ସନ୍ଧ୍ୟା ହେବା ମାତ୍ରେ ଲୋକେ ବାଣ ଫୁଟାଇବା ଆରମ୍ଭ କରିଥିଲେ। ନୂଆଦିଲ୍ଲୀ ଅଞ୍ଚଳରେ ଲୋକମାନେ ବାଣ ଫୁଟାଇଥିଲେ। ଫଳରେ ଦିଲ୍ଲୀ-ଏନସିଆରର ବାୟୁ 'ଗମ୍ଭୀର' ସ୍ତରରେ ପହଞ୍ଚିଛି। ଆନନ୍ଦ ବିହାର ଓ ସରିତା ବିହାରରେ ଏକ୍ୟୁଆଇ ସ୍ତର ୩୦୦ ଅତିକ୍ରମ କରିଛି। ଲୋକଙ୍କ ଆଖିରେ ଜଳାପୋଡ଼ା ଅନୁଭବ ହେଉଛି।

ଦୀପାବଳିରେ ବାଣ ଫୁଟାଇବା କାରଣରୁ ଚେନ୍ନାଇ ଏବଂ ଆଖପାଖ ଜିଲ୍ଲାରେ ବାୟୁ ପ୍ରଦୂଷଣର ମାତ୍ରା ଯଥେଷ୍ଟ ବୃଦ୍ଧି ପାଇଛି। ବାୟୁର ଗୁଣବତ୍ତାରେ ଏହି ହ୍ରାସ ଶ୍ୱାସକ୍ରିୟା ଜନିତ ସମସ୍ୟା ଥିବା ଲୋକଙ୍କ ପାଇଁ ସମସ୍ୟା ସୃଷ୍ଟି କରିଛି। ତାମିଲନାଡୁ ପ୍ରଦୂଷଣ ନିୟନ୍ତ୍ରଣ ବୋର୍ଡସୂତ୍ରରୁ ମିଳିଥିବା ସୂଚନା ଅନୁଯାୟୀ, ଚେନ୍ନାଇର ତିନୋଟି ଅଞ୍ଚଳରେ ବାୟୁ ଗୁଣବତ୍ତା ସୂଚକାଙ୍କ (ଏକ୍ୟୁଆଇ) ଖରାପ ହେବା ସହ ମନାଲିରେ ଜଳସ୍ତର ୨୫୪, ଅରୁମ୍ବାକ୍କମରେ ୨୧୦ ଏବଂ ପେରୁଙ୍ଗୁଡିରେ ୨୦୧ରେ ପହଞ୍ଚିଛି। 

ତାମିଲନାଡୁ ପ୍ରଦୂଷଣ ନିୟନ୍ତ୍ରଣ ବୋର୍ଡ ୨୦୧-୩୦୦ ମଧ୍ୟରେ ଏକ୍ୟୁଆଇକୁ "ଖରାପ" ଭାବରେ ଶ୍ରେଣୀଭୁକ୍ତ କରିଛି, ଯାହା ଶ୍ୱାସକ୍ରିୟାରେ ଅସୁବିଧା ସୃଷ୍ଟି କରିପାରେ; ୩୦୧-୪୦୦ ମଧ୍ୟରେ ଥିବା ସ୍ତରକୁ "ଅତ୍ୟନ୍ତ ଖରାପ" ଭାବରେ ବର୍ଗୀକୃତ କରାଯାଇଥିବା ବେଳେ ୪୦୧-୫୦୦ ମଧ୍ୟରେ ସ୍ତରକୁ ଗୁରୁତର ବୋଲି ବିବେଚନା କରାଯାଏ । ପ୍ରଦୂଷଣ କମାଇବା ପାଇଁ ପର୍ବ ସମୟରେ ବାଣ ବ୍ୟବହାର ସୀମିତ ରଖିବାକୁ ଡାକ୍ତରମାନେ ଅନୁରୋଧ କରିଛନ୍ତି।

ଦୀପାବଳି ଦିନ ରାଜସ୍ଥାନର ବିଭିନ୍ନ ସହରରେ ଜୋରଦାର ବାଣ ଫୁଟାଯାଇଥିଲା। ଜୟପୁରର ବାୟୁ ଏହି ସମୟରେ ସବୁଠାରୁ ବିଷାକ୍ତ କାରଣ ଏଠାରେ ଏକ୍ୟୁଆଇ ୩୫୦ ଅତିକ୍ରମ କରିଛି। ଜୟପୁର ବ୍ୟତୀତ ରାଜସ୍ଥାନର ଅନ୍ୟ ଅନେକ ଜିଲ୍ଲାରେ ବାୟୁ ଗୁରୁତର ଶ୍ରେଣୀରେ ରହିଛି। ରାଜସମନ୍ଦରେ ଏକ୍ୟୁଆଇ ୩୩୭, ଭିୱାଡି ୨୯୧, ବିକାନେର ୨୮୩, ଭରତପୁରରେ ୨୫୭, ଚୁରୁରେ ୨୪୭, ସିକରରେ ୨୩୭, ହନୁମାନଗଡ଼ରେ ୨୩୫, ଧୋଲପୁରରେ ୨୧୬ ରେକର୍ଡ କରାଯାଇଛି।

କୋଲକାତାର ବାୟୁ ଗୁଣବତ୍ତା ସୂଚକାଙ୍କ (ଏକ୍ୟୁଆଇ) ବୁଧବାର ସନ୍ଧ୍ୟାଠାରୁ ଖରାପ ରହିଛି ଏବଂ ଗୁରୁବାର ରାତିରେ ପ୍ରଦୂଷଣ ସ୍ତର ବିପଜ୍ଜନକ ସ୍ତରରେ ପହଞ୍ଚିଛି। ଦୀପାବଳି ଅବସରରେ ଲୋକମାନେ ବାଣ ଫୁଟାଇଛନ୍ତି। ବୁଧବାର ସନ୍ଧ୍ୟାରେ କୋଲକାତାରେ ଏକ୍ୟୁଆଇ ସ୍ତର ୧୦୦ ଅତିକ୍ରମ କରିଛି, ଯାହା ଅସୁରକ୍ଷିତ ଗୋଷ୍ଠୀ, ବିଶେଷକରି ବୟସ୍କ ନାଗରିକମାନଙ୍କ ପାଇଁ ଅସ୍ୱାସ୍ଥ୍ୟକର ବୋଲି ବିବେଚନା କରାଯାଏ। କୋଲକାତା ଏବଂ ଏହାର ସଂଲଗ୍ନ ହାୱଡା ଜିଲ୍ଲାର ବିଭିନ୍ନ ସ୍ଥାନରେ ଏକ୍ୟୁଆଇ ସ୍ତରରେ ସମାନ ହ୍ରାସ ଦେଖିବାକୁ ମିଳିଛି।