ହାଇଦ୍ରାବାଦ୍‌: ଦକ୍ଷିଣ ଭାରତୀୟ ସିନେମାର ଲୋକପ୍ରିୟ ଅଭିନେତା ଅଲ୍ଲୁ ଅର୍ଜୁନଙ୍କ ଘର ବାହାରେ ବିକ୍ଷୋଭ ପ୍ରଦର୍ଶନ କରିଥିବା ଅଭିଯୁକ୍ତମାନଙ୍କୁ ଜାମିନ ମିଳିଛି। ସୋମବାର କୋର୍ଟ ସମସ୍ତ ଅଭିଯୁକ୍ତଙ୍କୁ ଜାମିନ ପ୍ରଦାନ କରିଛନ୍ତି। ପୁଲିସ ଅଲ୍ଲୁ ଅର୍ଜୁନଙ୍କ ଘର ବାହାରୁ ୬ ଜଣଙ୍କୁ ଅଟକ ରଖି ସେମାନଙ୍କ ବିରୋଧରେ ବିଏନ୍ଏସ୍ ଆଇନର ଧାରା ୩୩୧(୫), ୧୯୦, ୧୯୧(୨), ୩୨୪(୨), ୨୯୨, ୧୨୬(୨), ୧୩୧ ରେ ମାମଲା ରୁଜୁ କରିଥିଲା। ସୋମବାର ସମସ୍ତଙ୍କୁ ମାଜିଷ୍ଟ୍ରେଟଙ୍କ ନିକଟରେ ହାଜର କରାଯାଇଥିଲା। ଅଦାଲତ ପୁଲିସ ରିମାଣ୍ଡକୁ ଖାରଜ କରି ସମସ୍ତଙ୍କୁ ୧୦ ହଜାର ଟଙ୍କାର ବଣ୍ଡରେ ଜାମିନରେ ମୁକ୍ତ କରିଛନ୍ତି।

ରିପୋର୍ଟ ଅନୁଯାୟୀ, ରବିବାର ହାଇଦ୍ରାବାଦର ଜୁବିଲି ହିଲ୍ସରେ ଅଭିନେତା ଅଲ୍ଲୁ ଅର୍ଜୁନଙ୍କ ଘର ବାହାରେ ବିକ୍ଷୋଭ କରିବାକୁ ଓସ୍ମାନିଆ ବିଶ୍ୱବିଦ୍ୟାଳୟର ଛାତ୍ରମାନେ ପହଞ୍ଚିଥିଲେ। ଏହି ସମୟରେ ସେମାନେ ଅଲ୍ଲୁ ଅର୍ଜୁନଙ୍କ ବିରୋଧରେ ସ୍ଲୋଗାନ ଦେବା ସହ ଦଣ୍ଡ ସହ ପୀଡ଼ିତାଙ୍କ ପରିବାରକୁ ଅଧିକ କ୍ଷତିପୂରଣ ଦେବାକୁ ଦାବି କରିଥିଲେ।

ସୁରକ୍ଷାକର୍ମୀମାନେ ବିକ୍ଷୋଭକାରୀଙ୍କୁ ଅଟକାଇବାକୁ ଚେଷ୍ଟା କରିବାରୁ ସେମାନେ ଅଭିନେତାଙ୍କ ଘର ଭିତରକୁ ଟମାଟୋ ଫିଙ୍ଗି ଥିଲେ ଏବଂ ତାଙ୍କ ବାହାରେ ଥିବା ଜିନିଷପତ୍ର ଭାଙ୍ଗି ଦେଇଥିଲେ। କିଛି ସୁରକ୍ଷାକର୍ମୀଙ୍କ ସହ ମଧ୍ୟ ଆକ୍ରମଣ ହୋଇଥିବା ଖବର ମିଳିଛି। 'ପୁଷ୍ପା-୨'ର ପ୍ରିମିୟର ସମୟରେ ସଂଧ୍ୟା ଥିଏଟରରେ ଦଙ୍ଗାରେ ପ୍ରାଣ ହରାଇଥିବା ମହିଳାଙ୍କ ପରିବାରକୁ ୧ କୋଟି ଟଙ୍କା କ୍ଷତିପୂରଣ ଦେବାକୁ ଛାତ୍ରୀମାନେ ଦାବି କରିଥିଲେ। 

ସୂଚନାଯୋଗ୍ୟ, ଗତ ୪ ତାରିଖରେ ଅଲ୍ଲୁ ଅର୍ଜୁନ ତାଙ୍କ ଟିମ୍ ସହ ଫିଲ୍ମ ପୁଷ୍ପା-୨ର ସ୍କ୍ରିନିଂ ପାଇଁ ସନ୍ଧ୍ୟା ଥିଏଟରରେ ପହଞ୍ଚିଥିଲେ। ଏହି ସମୟରେ ଅର୍ଜୁନଙ୍କୁ ଦେଖିବା ପାଇଁ ଭିଡ଼ ମଧ୍ୟ ଜମିଥିଲା। ଅର୍ଜୁନ ଭିତରେ ଫିଲ୍ମ ଦେଖୁଥିବା ବେଳେ ଏକ ଧସ୍ତାଧସ୍ତି ହୋଇଥିଲା ଏବଂ ଜଣେ ମହିଳାଙ୍କ ମୃତ୍ୟୁ ଘଟିଥିଲା ଏବଂ ତାଙ୍କ ୮ ବର୍ଷର ପୁଅ ଗୁରୁତର ଆହତ ହୋଇଥିଲେ। ସେବେଠାରୁ ଅନେକ ଲୋକ ଅଲ୍ଲୁ ଅର୍ଜୁନଙ୍କ ବିରୋଧରେ ବିକ୍ଷୋଭ ପ୍ରଦର୍ଶନ କରିବା ସହ କାର୍ଯ୍ୟାନୁଷ୍ଠାନ ଦାବି କରି ଆସୁଛନ୍ତି। ଅଲ୍ଲୁ ଅର୍ଜୁନ ଏବେ ଜାମିନରେ ଅଛନ୍ତି।

ଅଧିକ ପଢ଼ନ୍ତୁ: ମଦ୍ୟପଙ୍କ ସହ କଳି କରିବା ହେଲା ମହଙ୍ଗା