ନୂଆଦିଲ୍ଲୀ: ଉତ୍ତର ପ୍ରଦେଶ ଗାଜିଆବାଦର ବୈଶାଳୀରେ ଏକ ବଡ଼ ସେକ୍ସ ରାକେଟର ପର୍ଦ୍ଦାଫାସ ହୋଇଛି । ଯେଉଁଥିରେ ୧୧ ଜଣ ଯୁବତୀ ଉଦ୍ଧାର ହୋଇଥିବାବେଳେ ୫୦୦ ରୁ ଉର୍ଦ୍ଧ୍ୱ ଯୁବତୀ ଏଥିରେ ସାମିଲ ଥିବା ପୋଲିସ ଜାଣିବାକୁ ପାଇଛି । ଏଥିରେ ସମ୍ପୃକ୍ତ ୩ ଜଣ ଦଲାଲଙ୍କୁ ଗିରଫ କରାଯାଇଛି  ଏବଂ ଆଉ କିଛି ଦଲାଲ ଫେରାର ଅଛନ୍ତି । । ଗିରଫଙ୍କ ମଧ୍ୟରେ ହୋଟେଲ ମ୍ୟାନେଜର ରାହୁଲ ଶର୍ମା (୪୬), ଯିଏ ଏହାର ମାଷ୍ଟରମାଇଣ୍ଡ ବୋଲି କୁହାଯାଉଛି। ୱେଟର ସୁନୀଲ ସିଂହ (୩୯) ଏବଂ ଅଙ୍କିତ ଚୌହାନ (୧୯)ଙ୍କୁ ମଧ୍ୟ ଗିରଫ କରାଯାଇଛି।

ଗାଜିଆବାଦର ମହାଗୁନ ସରୋବର ପୋର୍ଟିଗୋ ନାମକ ଏକ ହୋଟେଲରେ ସେକ୍ସ ରାକେଟ୍ ପରିଚାଳିତ ହେଉଥିଲା। ମ୍ୟାନେଜରଙ୍କ ଫୋନରେ 500 ଯୁବତୀଙ୍କ ଫଟୋ ମିଳିଛି । ଇନ୍ଦିରାପୁରମ ଏସିପି ଅଭିଷେକ ଶ୍ରୀବାସ୍ତବ କହିଛନ୍ତି ଯେ ପୋଲିସ ଟିମ୍ ବୈଶାଲୀର ସେକ୍ଟର ୩-ଏଫ୍ ସ୍ଥିତ ହୋଟେଲରେ ଗତକାଲି ଅପରାହ୍ନ ପ୍ରାୟ ୨ଟା ସମୟରେ ଚଢାଉ କରିଥିଲେ । ପୋଲିସ ହୋଟେଲରେ ପହଞ୍ଚିବା ମାତ୍ରେ ଗଣ୍ଡଗୋଳ ସୃଷ୍ଟି ହୋଇଥିଲା। ପୋଲିସ ହୋଟେଲର ବିଭିନ୍ନ କୋଠରୀରୁ ଦେହ ବ୍ୟବସାୟ ପାଇଁ ସେଠାକୁ ଅଣାଯାଇଥିବା ୧୧ ଜଣ ଯୁବତୀଙ୍କୁ ଉଦ୍ଧାର କରିଥିଲା। ଏହି ସମୟରେ କିଛି ଲୋକ ଖସି ପଳାଇ ମଧ୍ୟ ଯାଇଥିଲେ। ଉଦ୍ଧାର ଯୁବତୀମାନେ ବିଭିନ୍ନ ରାଜ୍ୟରୁ ଆସିଛନ୍ତି । ହୋଟେଲରୁ ଉଦ୍ଧାର ହୋଇଥିବା ଯୁବତୀମାନଙ୍କ ବୟସ ୨୧ ରୁ ୩୧ ବର୍ଷ ମଧ୍ୟରେ । ସେମାନେ ଗୁଜରାଟ, ଦିଲ୍ଲୀ, ପଶ୍ଚିମବଙ୍ଗ ଏବଂ ଓଡ଼ିଶାର।

ଏସିପି କହିଛନ୍ତି ଯେ ଟିମ୍ ହୋଟେଲ ମ୍ୟାନେଜର ରାହୁଲ ଶର୍ମା, ଆଲିଗଡ଼ ଜିଲ୍ଲାର ଜାୱା ଥାନା ଅନ୍ତର୍ଗତ କାସିମପୁର ପାୱାର ହାଉସର ବାସିନ୍ଦା ଅଙ୍କିତ ଚୌହାନ ଏବଂ ଆଲିଗଡ଼ ଜିଲ୍ଲାର ଆକ୍ରବାଦ ଥାନା ଅନ୍ତର୍ଗତ ଡାବି ଗ୍ରାମର ବାସିନ୍ଦା ସୁନୀଲଙ୍କୁ ଗିରଫ କରିଛି। ରାକେଟ୍‌ରେ ସାମିଲ ଥିବା ଉତ୍ତରାଖଣ୍ଡର କୋଟଦ୍ୱାରର ବାସିନ୍ଦା ସୁମିତ ରାୱତ, ରାହୁଲ, ନିର୍ଦୋଷ ଏବଂ ଅଫଜଲ ଫେରାର୍ ଅଛନ୍ତି । ପୋଲିସ ସେମାନଙ୍କୁ ଖୋଜୁଛି। ନିର୍ଦୋଷ ନାମକ ବ୍ୟକ୍ତି ଏକ ରାଜନୈତିକ ଦଳ ସହିତ ଜଡିତ ବୋଲି ମଧ୍ୟ କୁହାଯାଉଛି।" 

ପଚରାଉଚରା ସମୟରେ ଯୁବତୀମାନେ ପ୍ରକାଶ କରିଛନ୍ତି ଯେ ରାହୁଲ ସେମାନଙ୍କୁ ଚାକିରି ବାହାନାରେ ହୋଟେଲକୁ ଆଣି ଅବୈଧ ବ୍ୟବସାୟରେ ସାମିଲ ହେବାକୁ ବାଧ୍ୟ କରିଥିଲା । ଗ୍ରାହକମାନଙ୍କଠାରୁ ୧୫,୦୦୦ ରୁ ୨୦,୦୦୦ ଟଙ୍କା ଆଦାୟ କରାଯାଉଥିଲା । କିନ୍ତୁ ସେମାନଙ୍କୁ ପ୍ରତି ରାତି ପାଇଁ ମାତ୍ର ୫,୦୦୦ ଟଙ୍କା ଦିଆଯାଉଥିଲା। କିଛି ମହିଳା ଏହା ମଧ୍ୟ ପ୍ରକାଶ କରିଛନ୍ତି ଯେ ବିଦେଶୀ ଝିଅମାନେ ମଧ୍ୟ ହୋଟେଲକୁ ଯୌନ କର୍ମୀ ଭାବରେ ଆସୁଥିଲେ । 

ରାହୁଲ ପ୍ରକାଶ କରିଛି ଯେ ସେ ହ୍ୱାଟସଆପରେ ଗ୍ରାହକମାନଙ୍କୁ ଝିଅମାନଙ୍କ ଫଟୋ ପଠାଉଥିଲେ, ତା'ପରେ ସେମାନେ ହୋଟେଲକୁ ଆସୁଥିଲେ। ଏହା ବ୍ୟତୀତ, ଗ୍ରାହକମାନଙ୍କ ସହିତ ଝିଅମାନଙ୍କୁ ଅନ୍ୟ ହୋଟେଲକୁ ମଧ୍ୟ ପଠାଯାଉଥିଲା। ସେମାନଙ୍କ ପାଇଁ ଅନଲାଇନରେ ରୁମ୍ ବୁକ୍ କରାଯାଇଥିଲା। ସୂଚନା ରହିଛି ଯେ ପୋଲିସ ମ୍ୟାନେଜରଙ୍କ ଫୋନ୍ ରୁ ୫୦୦ ରୁ ଅଧିକ ଝିଅଙ୍କ ଫଟୋ ଏବଂ ୧୦୦ ରୁ ଅଧିକ ଗ୍ରାହକଙ୍କ ଫୋନ୍ ନମ୍ବର ପାଇଛି।