ପୁଣେ: ରବିବାର (୧୫ ଜୁନ୍) ସନ୍ଧ୍ୟାରେ ମହାରାଷ୍ଟ୍ରର ପୁଣେରେ ଏକ ବଡ଼ ଦୁର୍ଘଟଣା ଘଟିଛି। ଇନ୍ଦ୍ରାୟଣୀ ନଦୀ ଉପରେ ନିର୍ମିତ ପୋଲର ଅଧା ଅଂଶ ଭାଙ୍ଗି ପଡ଼ିଛି। ପୋଲଟି ଭୁଷୁଡିବା ସମୟରେ ଉକ୍ତ ପୋଲ ଉପରେ ଅନେକ ଲୋକ ଉପସ୍ଥିତ ଥିଲେ । ଏପରି ପରିସ୍ଥିତିରେ, ପ୍ରାୟ ୨୫ ରୁ ୩୦ ଜଣ ଲୋକ ନଦୀରେ ଭାସି ଯାଇଥିବା ଆଶଙ୍କା କରାଯାଉଛି।

ସୂଚନା ଅନୁସାରେ, ପୁଣେର କୁଣ୍ଡମାଲାରେ ପୋଲ ଭୁଶୁଡ଼ି ପଡ଼ିବା ଯୋଗୁଁ କିଛି ପର୍ଯ୍ୟଟକ ବୁଡ଼ି ଯାଇଛନ୍ତି। କୁହାଯାଉଛି ଯେ ଏହି ଘଟଣା ଅପରାହ୍ନ ପ୍ରାୟ ୩.୪୦ ସମୟରେ ଘଟିଛି। ପଥର ଉପରେ ପଡ଼ିଥିବା ଲୋକମାନେ ଗୁରୁତର ଆହତ ହୋଇଛନ୍ତି। ସେହି ସମୟରେ ନଦୀ ସ୍ରୋତରେ ଅନେକ ଲୋକ ଭାସି ଯାଇଛନ୍ତି। ପିମ୍ପରି-ଚିଞ୍ଚୱାଡ ପୋଲିସ ଘଟଣାସ୍ଥଳକୁ ପହଞ୍ଚିଛି। କୁଣ୍ଡମାଲାରେ ଗୋଟିଏ ପାର୍ଶ୍ୱରୁ ଅନ୍ୟ ପାର୍ଶ୍ୱକୁ ଯିବା ପାଇଁ ଏକ ପୋଲ ଅଛି। ଏହି ପୋଲ ଭୁଶୁଡ଼ି ପଡ଼ିଛି। ରବିବାର ଥିବାରୁ ସେଠାରେ ବହୁ ସଂଖ୍ୟକ ପର୍ଯ୍ୟଟକ ଉପସ୍ଥିତ ଥିଲେ। କିଛି ଲୋକ ପୋଲ ଉପରେ ଠିଆ ହୋଇ ଫଟୋ ଉଠାଉଥିଲେ। ଏପର୍ଯ୍ୟନ୍ତ କେତେ ଲୋକ ବୁଡ଼ି ଯାଇଛନ୍ତି ତାହା ସ୍ପଷ୍ଟ ହୋଇନାହିଁ। ପ୍ରାଥମିକ ସୂଚନା ଅନୁଯାୟୀ, ପ୍ରାୟ ୨୦ରୁ ୨୫ ଜଣ ବୁଡ଼ି ଯାଇଛନ୍ତି। ପ୍ରାୟ ୨୦୦ ପର୍ଯ୍ୟଟକ ଘଟଣାସ୍ଥଳରେ ଉପସ୍ଥିତ ଥିଲେ। ଦୁର୍ଘଟଣା ପରେ ସମସ୍ତଙ୍କୁ ଘଟଣାସ୍ଥଳରୁ ହଟାଇ ଦିଆଯାଇଛି, ଯାହା ଫଳରେ ଉଦ୍ଧାର କାର୍ଯ୍ୟରେ କୌଣସି ଅସୁବିଧା ହେବନାହିଁ।

ତେବେ ଅନେକ ପିଲା ମଧ୍ୟ ଛୁଟି ପାଳନ କରିବା ପାଇଁ ପରିବାର ସହିତ ଏହି ସେତୁରେ ପହଞ୍ଚିଥିଲେ। ଏଠାରେ ଏକ ମନ୍ଦିର ମଧ୍ୟ ଅଛି, ଯେଉଁଠାରେ ବହୁ ସଂଖ୍ୟକ ଭକ୍ତ ଦର୍ଶନ କରିବାକୁ ଆସନ୍ତି। ବର୍ତ୍ତମାନ, NDRFର ଦୁଇଟି ଦଳ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟରେ ନିୟୋଜିତ ଅଛନ୍ତି। କୁହାଯାଉଛି ଯେ କିଛି ଲୋକ ବାଇକ୍ ନେଇ ଏହି ସେତୁରେ ପହଞ୍ଚିଥିଲେ, ଯାହାଫଳରେ ସେତୁଟି ଅଧିକ ଓଜନ ସହ୍ୟ କରି ନପାରି ଭାଙ୍ଗି ଯାଇଥିଲା। କହାଯାଉଛି ଯେ ଏହି ପୋଲର ସ୍ଥିତି ପୂର୍ବରୁ ଖରପ ଥିଲା ଯାହା ପ୍ରଶାସନ ନିକଟରେ ଅଭିଯୋଗ ମଧ୍ୟ ହୋଇଥିଲା । କିନ୍ତୁ ଏହା ଉପରେ କୌଣସି ଆକ୍ସନ ନିଆଯାଇ ନଥିଲା । ପୋଲ ଉପରେ ବହୁତ କଳଙ୍କ ଲାଗି ରହିଥିଲା। ସତର୍କତା ଅବଲମ୍ବନ ପାଇଁ ନିରନ୍ତର ଘୋଷଣା କରାଯାଉଥିଲା। ଗତ କିଛି ଦିନ ଧରି ପୁଣେରେ ଲଗାତାର ବର୍ଷା ହେଉଛି, ଯାହା ପାଇଁ ଇନ୍ଦ୍ରାୟଣୀ ନଦୀର ପ୍ରବାହ ଦ୍ରୁତ ଥିଲା।

ଘଟଣାସ୍ଥଳରେ ଉଦ୍ଧାର କାର୍ଯ୍ୟ ଦ୍ରୁତ ଗତିରେ ଆରମ୍ଭ ହୋଇଛି। ପର୍ଯ୍ୟଟକଙ୍କୁ ଉଦ୍ଧାର କରିବା ପାଇଁ ୨୦-୨୨ଟି ଆମ୍ବୁଲାନ୍ସ ଘଟଣାସ୍ଥଳରେ ପହଞ୍ଚିଛି। ସନ୍ଧ୍ୟା ସମୟ ହୋଇଥିବାରୁ, ଉଦ୍ଧାର କାର୍ଯ୍ୟ ତ୍ୱରାନ୍ୱିତ କରାଯାଉଛି, କାରଣ ଅନ୍ଧାର ପରେ ଉଦ୍ଧାର କାର୍ଯ୍ୟରେ ବାଧା ସୃଷ୍ଟି ହୋଇପାରେ। ଜିଲ୍ଲା ମୁଖ୍ୟାଳୟରୁ ଉଦ୍ଧାର କାର୍ଯ୍ୟ ପାଇଁ ଅନେକ ଦଳ ପଠାଯାଇଛି। ନଦୀ ପ୍ରବାହ ଦିଗରେ ଆଗକୁ ଥିବା ଗ୍ରାମଗୁଡ଼ିକରେ ଲୋକଙ୍କୁ ଉଦ୍ଧାର କରିବା ପାଇଁ ମଧ୍ୟ କାର୍ଯ୍ୟ ଚାଲିଛି। ଉଦ୍ଧାର ପାଇଁ ଉଦ୍ଧାର ଭ୍ୟାନ ଏବଂ ଅଗ୍ନିଶମ ଡଙ୍ଗା ଘଟଣାସ୍ଥଳରେ ପହଞ୍ଚିଛି।