ନୂଆଦିଲ୍ଲୀ: ଉତ୍ତର-ପଶ୍ଚିମ ଏବଂ ମଧ୍ୟ ଭାରତର ଅନେକ ସ୍ଥାନରେ ଗ୍ରୀଷ୍ମ ଲହରୀ ଜାରି ରହିଛି। ଦେଶର ୨୨ଟି ସ୍ଥାନରେ ଶୁକ୍ରବାର ଦିନ ସର୍ବାଧିକ ତାପମାତ୍ରା ୪୪ ଡିଗ୍ରୀ ସେଲସିୟସ୍ କିମ୍ବା ତା’ଠାରୁ ଅଧିକ ରେକର୍ଡ କରାଯାଇଛି। ଚଳିତ ଋତୁରେ ରାଜସ୍ଥାନର ଗଙ୍ଗାନଗରରେ ସର୍ବାଧିକ ତାପମାତ୍ରା ୪୯.୪ ଡିଗ୍ରୀ ସେଲସିୟସ୍ ରେକର୍ଡ କରାଯାଇଛି, ଯାହା ସ୍ୱାଭାବିକଠାରୁ ଆଠ ଡିଗ୍ରୀ ଅଧିକ। ଆର୍ଦ୍ରତା ଏବଂ ଗରମ ଯୋଗୁଁ ବହୁ ସଂଖ୍ୟକ ଲୋକ ଅସୁସ୍ଥ ହୋଇଛନ୍ତି।

ପ୍ରବଳ ଗରମ ଯୋଗୁଁ ଉତ୍ତର ପ୍ରଦେଶରେ ୧୭ ଜଣ ଏବଂ ପଞ୍ଜାବରେ ଦୁଇଜଣଙ୍କର ମୃତ୍ୟୁ ହୋଇଛି। କିଛି ସ୍ଥାନରେ ପାଗ ପରିବର୍ତ୍ତନ ହେବା ସହିତ ବର୍ଷା ଏବଂ ବଜ୍ରପାତ ମଧ୍ୟ ଘଟିଛି। ଏଥିରେ ଉତ୍ତର ପ୍ରଦେଶରେ ୩ ଜଣ ଏବଂ ଉତ୍ତରାଖଣ୍ଡରେ ଦୁଇଜଣଙ୍କର ମୃତ୍ୟୁ ହୋଇଛି। ଆଇଏମଡି ଅନୁଯାୟୀ, ଗରମ ସ୍ଥିତି ଅତି କମରେ ଆଉ ଦୁଇ ଦିନ ଜାରି ରହିବ। 

ପଞ୍ଜାବରେ ଗ୍ରୀଷ୍ମ ଲହରୀ ଯୋଗୁଁ ଆଉ ଦୁଇଜଣଙ୍କ ମୃତ୍ୟୁ ହୋଇଛି। ଅନେକ ଜିଲ୍ଲାରେ ପ୍ରବଳ ପବନ ଏବଂ ହାଲୁକା ବର୍ଷା ହୋଇଥିଲା, ଯାହା ଗରମରୁ ଆଶ୍ୱସ୍ତି ଆଣିଥିଲା। ଭତିଣ୍ଡାରେ ଦିନର ତାପମାତ୍ରା ୪୬ ଡିଗ୍ରୀ ସେଲସିୟସ୍ ରେକର୍ଡ କରାଯାଇଥିଲା। ହରିୟାଣାର ସିରସାରେ ତାପମାତ୍ରା ୪୭.୬ ଡିଗ୍ରୀ ସେଲସିୟସ୍ ପହଞ୍ଚିଥିଲା।

ଉତ୍ତର ପ୍ରଦେଶର ଆଗ୍ରାରେ ଶୁକ୍ରବାର ଦିନ ତାପମାତ୍ରା ୪୫ ଡିଗ୍ରୀ ସେଲସିୟସରେ ପହଞ୍ଚିଥିବା ବେଳେ ଝାନ୍ସୀରେ ୪୪.୯, ବାନ୍ଦାରେ ୪୪.୬, ହମିରପୁରରେ ୪୪.୨ ଏବଂ ଲକ୍ଷ୍ନୌରେ ୪୪ ଡିଗ୍ରୀ ସେଲସିୟସ ରେକର୍ଡ କରାଯାଇଛି।

ମଧ୍ୟ ପ୍ରଦେଶରେ ମଧ୍ୟ ଅଧିକ ତାପମାତ୍ରା ଦେଖିବାକୁ ମିଳିଥିଲା। ଖଜୁରାହୋରେ ୪୫.୦ ଡିଗ୍ରୀ ସେଲସିୟସ୍, ନର୍ମଦାପୁରମରେ ୪୪.୪ ଡିଗ୍ରୀ ସେଲସିୟସ୍ ଏବଂ ଗ୍ୱାଲିୟରରେ ୪୪.୫ ଡିଗ୍ରୀ ସେଲସିୟସ୍ ରେକର୍ଡ କରାଯାଇଥିଲା। ଜାତୀୟ ରାଜଧାନୀ ଦିଲ୍ଲୀରେ ତାପମାତ୍ରା ୩୬ ରୁ ୪୨ ଡିଗ୍ରୀ ସେଲସିୟସ୍ ମଧ୍ୟରେ ଥିଲା କିନ୍ତୁ ପ୍ରବଳ ଗରମ ୫୦.୩ ଡିଗ୍ରୀ ସେଲସିୟସ୍ ପହଞ୍ଚିଥିଲା।

ଅଧିକ ପଢ଼ନ୍ତୁ: ଇରାନ ଯଦି ଆକ୍ରମଣ ଜାରି ରଖେ ତାକୁ ପରିଣାମ ଭୋଗିବାକୁ ପଡ଼ିବ