ନୂଆଦିଲ୍ଲୀ: ଯୁକ୍ତରାଷ୍ଟ୍ର ଆମେରିକା ପରେ ୟୁକ୍ରେନର ରାଷ୍ଟ୍ରପତି ଭୋଲୋଦିମିର ଜେଲେନସ୍କି ୟୁରୋପ ଗସ୍ତ କରିଥିଲେ ଏବଂ ୟୁରୋପରେ ବୈଠକ ପରେ ଆମେରିକା ପ୍ରତି ଜେଲେନସ୍କିଙ୍କ ଆଭିମୁଖ୍ୟ ନରମ ହେବାରେ ଲାଗିଛି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସହ ସମ୍ପର୍କ ସୁଧାରିବାକୁ ସେ ଇଚ୍ଛୁକ ବୋଲି ରବିବାର କହିଛନ୍ତି। ଟ୍ରମ୍ପଙ୍କ ସହ ସମ୍ପର୍କ ସୁଧାରିବାକୁ ସେ ପ୍ରସ୍ତୁତ ଅଛନ୍ତି, କିନ୍ତୁ ବନ୍ଦ ଦ୍ୱାରରେ ଆଲୋଚନା ଜାରି ରଖିବାର ଆବଶ୍ୟକତା ରହିଛି ବୋଲି ଜେଲେନସ୍କି କହିଛନ୍ତି। ଯଦି ସୁରକ୍ଷା ଗ୍ୟାରେଣ୍ଟି ପ୍ରଦାନ କରାଯାଏ ଏବଂ ୟୁକ୍ରେନ୍ ନାଟୋ ସଦସ୍ୟତା ପାଏ, ତେବେ ସେ ମଧ୍ୟ ଇସ୍ତଫା ଦେବାକୁ ପ୍ରସ୍ତୁତ ଅଛନ୍ତି।

ଋଷ ସହ ହୋଇଥିବା ଶାନ୍ତି ଚୁକ୍ତିରେ ୟୁକ୍ରେନ ନିଜ ଅଞ୍ଚଳ ଛାଡିବ ନାହିଁ ବୋଲି ମଧ୍ୟ ସେ ସ୍ପଷ୍ଟ କରିଛନ୍ତି। ଏଥିସହିତ ସେ ଆମେରିକା ସହ ମିନେରାଲ ଡିଲ୍ କରିବାକୁ ମଧ୍ୟ ପ୍ରସ୍ତୁତ ଥିଲେ। ରବିବାର ଦିନ ସେ ବ୍ରିଟେନ ଗଣମାଧ୍ୟମକୁ ଏହି ସୂଚନା ଦେଇଛନ୍ତି ଏବଂ ସେ ଏକ ସୋସିଆଲ ମିଡିଆ ପୋଷ୍ଟରେ ଏହାକୁ ଦୋହରାଇଛନ୍ତି।

ଜେଲେନସ୍କି ଏକ୍ସରେ ଲେଖିଛନ୍ତି, ଆମେ ଖଣିଜ ଚୁକ୍ତି ସ୍ୱାକ୍ଷର କରିବାକୁ ପ୍ରସ୍ତୁତ ଏବଂ ସୁରକ୍ଷା ଗ୍ୟାରେଣ୍ଟି ଦିଗରେ ଏହା ପ୍ରଥମ ପଦକ୍ଷେପ ହେବ। ତେବେ ଏହା ଯଥେଷ୍ଟ ନୁହେଁ ଏବଂ ଆମକୁ ଆହୁରି ବହୁତ କିଛି ଦରକାର। ବିନା ସୁରକ୍ଷା ଗ୍ୟାରେଣ୍ଟିରେ ଅସ୍ତ୍ରବିରତି ୟୁକ୍ରେନ ପାଇଁ ବିପଜ୍ଜନକ। ଆମେ ତିନି ବର୍ଷ ଧରି ଲଢୁଛୁ ଏବଂ ୟୁକ୍ରେନର ଲୋକମାନେ ଜାଣିବା ଦରକାର ଯେ ଆମେରିକା ଆମ ପକ୍ଷରେ ଅଛି।

ଶୁକ୍ରବାର ଦିନ ୟୁକ୍ରେନର ରାଷ୍ଟ୍ରପତି ଭୋଲୋଦିମିର ଜେଲେନସ୍କି ହ୍ୱାଇଟ ହାଉସରେ ପହଞ୍ଚି ଖଣିଜ ଚୁକ୍ତି ସ୍ୱାକ୍ଷର କରିଛନ୍ତି। ଏହି ସମୟରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏବଂ ଜେଲେନସ୍କିଙ୍କ ମଧ୍ୟରେ ତୀବ୍ର ବିତର୍କ ହୋଇଥିଲା ଏବଂ ଟ୍ରମ୍ପ ଜେଲେନସ୍କିଙ୍କୁ କଡ଼ା ସମାଲୋଚନା କରିଥିଲେ ଏବଂ କହିଥିଲେ ଯେ ତିନି ବର୍ଷର ଯୁଦ୍ଧ ସମୟରେ ସେ ଅଧିକ କୃତଜ୍ଞ ହେବା ଉଚିତ୍।

ଅଧିକ ପଢ଼ନ୍ତୁ: ଉଦ୍ଧାର ହୋଇବାରୁ ନାହାନ୍ତି ଶ୍ରମିକ