ନାଗର କୁର୍ଣ୍ଣୁଲ: ତେଲେଙ୍ଗାନା ଟନେଲ ଦୁର୍ଘଟଣାରେ ଗତ ୯ ଦିନ ଧରି ଫସି ରହିଥିବା ୮ ଜଣଙ୍କୁ ସୁରକ୍ଷିତ ଭାବେ ଉଦ୍ଧାର କରିବା ଏପର୍ଯ୍ୟନ୍ତ ସମ୍ଭବ ହୋଇପାରିନାହିଁ। ଘଟଣାସ୍ଥଳରୁ ମାଟି ହଟାଇବା ପାଇଁ ଉଦ୍ୟମ ଜୋରଦାର କରାଯିବା ସହ ଉଦ୍ଧାରକର୍ମୀ ଓ ଯନ୍ତ୍ରପାତି ମୁତୟନ ବଢ଼ାଇ ଦିଆଯାଇଛି। ଉଦ୍ଧାର କାର୍ଯ୍ୟ ଚୂଡ଼ାନ୍ତ ପର୍ଯ୍ୟାୟରେ ଥିଲେ ହେଁ ଲଗାତାର ପାଣି ଲିକ୍ ଏକ ବଡ଼ ବାଧକ ସାଜିଛି। 

ମୁଖ୍ୟମନ୍ତ୍ରୀ ଏ. ରେବନ୍ତ ରେଡ୍ଡୀ କହିଛନ୍ତି ଯେ ସୁଡ଼ଙ୍ଗ ଭିତରେ ଫସି ରହିଥିବା ଲୋକମାନଙ୍କର ପ୍ରକୃତ ସ୍ଥାନ ବିଷୟରେ ଏପର୍ଯ୍ୟନ୍ତ କୌଣସି ସୂଚନା ନାହିଁ। ସରକାର ଉଦ୍ଧାର କାର୍ଯ୍ୟକୁ ତ୍ୱରାନ୍ୱିତ କରିବାକୁ ଚେଷ୍ଟା କରୁଛନ୍ତି। ରବିବାର ସେ ଦୁର୍ଘଟଣାସ୍ଥଳ ପରିଦର୍ଶନ କରିଥିଲେ। ପରେ ସେ ଗଣମାଧ୍ୟମକୁ କହିଛନ୍ତି ଯେ କ୍ଷତିଗ୍ରସ୍ତ କନଭେୟାର ବେଲ୍ଟ ମରାମତି ପରେ ଉଦ୍ଧାର କାର୍ଯ୍ୟ ତ୍ୱରାନ୍ୱିତ ହେବ। ମାଟି ହଟାଇବାରେ ସହାୟକ ହେଉଥିବା କନଭେୟାର ବେଲ୍ଟ ସୋମବାର ସୁଦ୍ଧା ଠିକ୍ ହୋଇଯିବ ବୋଲି ଆଶା କରାଯାଉଛି।

ସେ କହିଛନ୍ତି, ସୁଡ଼ଙ୍ଗ ଭିତରେ କେଉଁଠି ଲୋକ ଓ ମେସିନ୍ ଫସି ରହିଛି ତାହା ଉଦ୍ଧାରକାରୀ କର୍ମଚାରୀମାନେ ସମ୍ପୂର୍ଣ୍ଣ ଭାବେ ବୁଝିପାରିନାହାନ୍ତି। ସେମାନଙ୍କର ପ୍ରାରମ୍ଭିକ ଆକଳନ ଅଛି, କିନ୍ତୁ ଏହା ସମ୍ପୂର୍ଣ୍ଣ ଭାବେ ସ୍ପଷ୍ଟ ହୋଇନାହିଁ। ସରକାର ଉଦ୍ଧାର କାର୍ଯ୍ୟର ନେତୃତ୍ୱ ନେଉଥିବା ଅଧିକାରୀମାନଙ୍କୁ ପରାମର୍ଶ ଦେଇଛନ୍ତି ଯେ ଯଦି ଆବଶ୍ୟକ ହୁଏ, ତେବେ ଉଦ୍ଧାରକାରୀ କର୍ମଚାରୀଙ୍କୁ କୌଣସି ବିପଦରୁ ରକ୍ଷା କରିବା ପାଇଁ ସୁଡ଼ଙ୍ଗ ଭିତରେ ରୋବୋଟ୍ ବ୍ୟବହାର କରାଯାଉ। କ୍ଷତିଗ୍ରସ୍ତ ପରିବାରକୁ ସହାୟତା କରିବାକୁ ସରକାର ପ୍ରସ୍ତୁତ ଅଛନ୍ତି।

୭୦୦ କର୍ମଚାରୀ ଉଦ୍ଧାର କାର୍ଯ୍ୟରେ ନିୟୋଜିତ

• ରବିବାର ଦିନ ଜଣେ ଅଧିକାରୀ କହିଛନ୍ତି ଯେ ଟନେଲ ଭୁଶୁଡ଼ିବା ଦ୍ୱାରା କ୍ଷତିଗ୍ରସ୍ତ କନଭେୟାର ବେଲ୍ଟ ସୋମବାର ସୁଦ୍ଧା ମରାମତି ହେବ ବୋଲି ଆଶା କରାଯାଉଛି। ମରାମତି ହେଲେ ସୁଡ଼ଙ୍ଗରୁ କାଦୁଅ ଓ ଆବର୍ଜନା ବାହାର କରିବା ସହଜ ହେବ। 
• ଉଦ୍ଧାର କାର୍ଯ୍ୟରେ କେନ୍ଦ୍ର ଓ ରାଜ୍ୟ ସରକାରଙ୍କ ୧୮ଟି ଏଜେନ୍ସିର ପ୍ରାୟ ୭୦୦ କର୍ମଚାରୀ ନିୟୋଜିତ ହୋଇଛନ୍ତି। ପ୍ରତି ସିଫ୍ଟରେ ଅତି କମ୍ରେ ୧୨୦ ଜଣ କର୍ମଚାରୀ ଉଦ୍ଧାର କାର୍ଯ୍ୟରେ ନିୟୋଜିତ ଅଛନ୍ତି। 
• ବିଜେପି ବିଧାୟକ ମଧ୍ୟ ଘଟଣାସ୍ଥଳପରିଦର୍ଶନ କରି ସ୍ଥିତି ଅନୁଧ୍ୟାନ କରିଛନ୍ତି। ଦଳର ବିଧାୟକ ମହେଶ୍ୱର ରେଡ୍ଡୀ କହିଛନ୍ତି ଯେ ବର୍ତ୍ତମାନ ଏବଂ ପୂର୍ବ ରାଜ୍ୟ ସରକାରଙ୍କ ଅବ୍ୟବସ୍ଥା ଯୋଗୁଁ ଏହି ଦୁର୍ଘଟଣା ଘଟିଛି। ସେମାନଙ୍କ ଅବହେଳା ହିଁ ଏହି ବିପର୍ଯ୍ୟୟର କାରଣ ହୋଇଛି। ରାଜ୍ୟ ସରକାର ଅନେକ ପ୍ରସଙ୍ଗକୁ ଅଣଦେଖା କରିଛନ୍ତି, ଯାହା ଏବେ ୮ ଜଣ ଶ୍ରମିକଙ୍କ ଜୀବନକୁ ବାଜି ଲଗାଇ ଦେଇଛି।

ଅଧିକ ପଢ଼ନ୍ତୁ: 'କନ୍ କ୍ଲେଭ୍'କୁ ଶ୍ରେଷ୍ଠ ରୂପାନ୍ତରିତ ଚିତ୍ରନାଟ୍ୟ