ନୂଆଦିଲ୍ଲୀ: ବୈଦେଶିକ ମନ୍ତ୍ରୀ ଏସ୍‌ ଜୟଶଙ୍କର ଗୁରୁବାର ଆଫଗାନିସ୍ତାନର କାର୍ଯ୍ୟକାରୀ ବୈଦେଶିକ ମନ୍ତ୍ରୀ ମୱଲାୱି ଆମିର ଖାନ ମୁତାକିଙ୍କ ସହ ଫୋନରେ କଥା ହୋଇଛନ୍ତି। ଏହି ଆଲୋଚନାରେ ଭାରତ ଏବଂ ଆଫଗାନିସ୍ତାନ ମଧ୍ୟରେ ଅବିଶ୍ୱାସ ସୃଷ୍ଟି କରିବାର ପ୍ରୟାସ ବିଷୟରେ ମଧ୍ୟ ଉଲ୍ଲେଖ କରାଯାଇଥିଲା। ନିକଟରେ ପାକିସ୍ତାନୀ ସେନା ଦାବି କରିଥିଲା ଯେ ଭାରତ ମଧ୍ୟ ଆଫଗାନିସ୍ତାନକୁ କ୍ଷେପଣାସ୍ତ୍ର ସାହାଯ୍ୟରେ ଟାର୍ଗେଟ କରିଥିଲା। ଭାରତ ଏହାକୁ ସମ୍ପୂର୍ଣ୍ଣ ପ୍ରତ୍ୟାଖ୍ୟାନ କରିଥିଲା।  

ବୈଦେଶିକ ମନ୍ତ୍ରୀ କହିଛନ୍ତି ଯେ ମୁତାକିଙ୍କ ସହ ତାଙ୍କର ଭଲ ଆଲୋଚନା ହୋଇଛି। ଜୟଶଙ୍କର ଇନଷ୍ଟାଗ୍ରାମରେ ଲେଖିଛନ୍ତି ଯେ ସେ ପହଲଗାମ ଆତଙ୍କବାଦୀ ଆକ୍ରମଣର ନିନ୍ଦା କରିଥିବାରୁ ତାଙ୍କୁ ପ୍ରଶଂସା କରିଛନ୍ତି। ଭିତ୍ତିହୀନ ରିପୋର୍ଟ ମାଧ୍ୟମରେ ଦୁଇ ଦେଶ ମଧ୍ୟରେ ଅବିଶ୍ୱାସ ସୃଷ୍ଟି କରିବାର ପ୍ରୟାସକୁ ମୁତାକିଙ୍କ ପ୍ରତ୍ୟାଖ୍ୟାନକୁ ମଧ୍ୟ ସେ ସ୍ୱାଗତ କରିଥିଲେ। ଆଫଗାନ ଲୋକଙ୍କ ସହିତ ପାରମ୍ପରିକ ବନ୍ଧୁତାକୁ ରେଖାଙ୍କିତ କରାଯାଇଥିଲା।

ଏଥିସହିତ ଏହି ସହଯୋଗକୁ କିପରି ଆଗକୁ ନିଆଯାଇପାରିବ ସେ ବିଷୟରେ ମଧ୍ୟ ଆଲୋଚନା କରାଯାଇଥିଲା। ପୂର୍ବରୁ ବୈଦେଶିକ ସଚିବ ବିକ୍ରମ ମିସ୍ରି ଆଫଗାନିସ୍ତାନରେ ଭାରତୀୟ କ୍ଷେପଣାସ୍ତ୍ର ଆକ୍ରମଣ ସମ୍ପର୍କରେ ଏକ ବିବୃତ୍ତି ଦେଇଥିଲେ। ସେ କହିଥିଲେ ଯେ ସମସ୍ତେ ଜାଣନ୍ତି ଯେ ଗତ ଦେଢ଼ ବର୍ଷ ଧରି ଆଫଗାନିସ୍ତାନ ଉପରେ କିଏ ଆକ୍ରମଣ କରୁଛି।

ଗତମାସ ୨୮ ତାରିଖରେ ବୈଦେଶିକ ମନ୍ତ୍ରଣାଳୟର ଯୁଗ୍ମ ସଚିବ ଆନନ୍ଦ ପ୍ରକାଶ ମୁତ୍ତାକିଙ୍କୁ ଭେଟିଥିଲେ। ଭାରତ-ପାକିସ୍ତାନ ସମ୍ପର୍କରେ ଉତ୍ତେଜନା ମଧ୍ୟରେ, ଭାରତୀୟ ପ୍ରତିନିଧି ଦଳ କାବୁଲ ଯାଇଥିଲେ, ଯେଉଁଠାରେ ଦ୍ୱିପାକ୍ଷିକ ବାଣିଜ୍ୟ ଏବଂ ସହଯୋଗ ବିଷୟରେ ଆଲୋଚନା ହୋଇଥିଲା। ଜାନୁଆରୀରେ ବୈଦେଶିକ ସଚିବ ବିକ୍ରମ ମିସ୍ରି  ଏବଂ ମୁତ୍ତାକିଙ୍କ ମଧ୍ୟରେ ସାକ୍ଷାତ ହୋଇଥିଲା। କିଛି ସମୟ ଧରି, ଭାରତ ଆଫଗାନିସ୍ତାନରେ ତାଲିବାନ ସରକାରଙ୍କୁ ସ୍ୱୀକୃତି ନ ଦେଇ ତାଙ୍କ ସହିତ ସମ୍ପର୍କ ସ୍ଥାପନ କରିବାକୁ ଆଗକୁ ବଢ଼ୁଛି।

ଅଧିକ ପଢ଼ନ୍ତୁ: ଦାୟିତ୍ୱରେ ଅବହେଳା କଲେ ଦୃଢ଼ କାର୍ଯ୍ୟାନୁଷ୍ଠାନ