ନାଗର କୁର୍ଣ୍ଣୁଲ: ତେଲେଙ୍ଗାନାର ନାଗର କୁର୍ଣ୍ଣୁଲ ଜିଲ୍ଲାରେ ଶ୍ରୀଶୈଲମ ବାମ କୂଳ କେନାଲ (ଏସଏଲବିସି) ପ୍ରକଳ୍ପର ନିର୍ମାଣାଧୀନ ସୁଡ଼ଙ୍ଗରେ ଫସି ରହିଥିବା ୮ ଜଣଙ୍କୁ ୪ ଦିନ ପରେ ବି ସୁରକ୍ଷିତ ଭାବେ ଉଦ୍ଧାର କରିବାରେ କୌଣସି ସଫଳତା ମିଳିନାହିଁ। ଭାରତୀୟ ସେନା, ନୌସେନା, ଏନଡିଆରଏଫ, ଜିଏସଆଇ ଏବଂ ଅନ୍ୟାନ୍ୟ ଏଜେନ୍ସିର ବିଶେଷଜ୍ଞମାନେ କ୍ରମାଗତ ଭାବରେ ମାଟି ଓ ଜଳ ପ୍ରବାହ ଯୋଗୁଁ ଗୁରୁତର ସମସ୍ୟାର ସମ୍ମୁଖୀନ ହେଉଛନ୍ତି। ଟନେଲରେ ଜଳ ପ୍ରବାହ ଉଦ୍ଧାର କାର୍ଯ୍ୟକୁ ପ୍ରଭାବିତ କରୁଛି। ତେଣୁ ଉଦ୍ଧାର କାର୍ଯ୍ୟରେ ନିୟୋଜିତ ବ୍ୟକ୍ତିଙ୍କ ଜୀବନ ମଧ୍ୟ ବିପଦରେ ପଡ଼ିପାରେ। ତେଲେଙ୍ଗାନା ସରକାର ଲୋକଙ୍କୁ ବଞ୍ଚାଇବା ପାଇଁ ଉଦ୍ଧାର କାର୍ଯ୍ୟରେ ଜିଓଲୋଜିକାଲ ସର୍ଭେ ଅଫ୍ ଇଣ୍ଡିଆ (ଜିଏସଆଇ) ଏବଂ ନ୍ୟାସନାଲ ଜିଓଗ୍ରାଫିକାଲ ରିସର୍ଚ୍ଚ ଇନଷ୍ଟିଚ୍ୟୁଟ (ଏନଜିଆରଆଇ)ର ବିଶେଷଜ୍ଞଙ୍କୁ ସାମିଲ କରିଛନ୍ତି।

ଜଳସେଚନ ମନ୍ତ୍ରୀ ଉତ୍ତମ କୁମାର ରେଡ୍ଡୀ ଏହାକୁ ବିଶ୍ୱର ସବୁଠାରୁ ଜଟିଳ ଏବଂ କଷ୍ଟକର ଟନେଲ ଉଦ୍ଧାର ଅଭିଯାନ ବୋଲି ବର୍ଣ୍ଣନା କରିଛନ୍ତି। ନାଗରକୁର୍ନୁଲ ଜିଲ୍ଲାପାଳ ବି ସନ୍ତୋଷ କହିଛନ୍ତି, ଫସି ରହିଥିବା ଲୋକଙ୍କ ସହ ଯୋଗାଯୋଗ କରିବାରେ ଆମେ ଅସମର୍ଥ। ଆମେ ଜିଓଲୋଜିକାଲ ସର୍ଭେ ଅଫ୍ ଇଣ୍ଡିଆ ଏବଂ ଅନ୍ୟ କେତେକଙ୍କ ପରାମର୍ଶ ନେଉଛୁ। ବର୍ତ୍ତମାନ ଆମେ ପାଣି ପମ୍ପ କରି ଆଗକୁ ବଢ଼ୁଛୁ। ଫସି ରହିଥିବା ଲୋକ ଓ ଉଦ୍ଧାରକାରୀ ଦଳ ମଧ୍ୟରେ ଏବେ ବି ୪୦ ରୁ ୫୦ ମିଟର ଦୂରତା ରହିଛି। ଆମେ ଜିଏସଆଇ ଏବଂ ଏନଜିଆରଆଇର ପରାମର୍ଶ ମଧ୍ୟ ନେଉଛୁ। ଏଲ୍ ଆଣ୍ଡଟି ବିଶେଷଜ୍ଞମାନେ ମଧ୍ୟ ଏଠାକୁ ଆସିଛନ୍ତି। 

ଦୁର୍ଘଟଣାକୁ ନେଇ ରାଜନୈତିକ ବୟାନ ଜାରି ରହିଛି। ବିଆରଏସ କାର୍ଯ୍ୟକାରୀ ସଭାପତି କେ.ଟି ରାମାରାଓ ଘଟଣାର ବିଚାର ବିଭାଗୀୟ ତଦନ୍ତ ଦାବି କରିଛନ୍ତି। ଅନ୍ୟପକ୍ଷରେ କଂଗ୍ରେସ ଲୋକସଭା ସଦସ୍ୟ ଚମାଲା କିରଣ କୁମାର ରେଡ୍ଡୀ ଏହି ଦାବିକୁ ଖଣ୍ଡନ କରି କହିଛନ୍ତି ଯେ ଏହା ରାଜନୀତିର ସମୟ ନୁହେଁ ଏବଂ ସୁଡ଼ଙ୍ଗ ଭିତରେ ଫସି ରହିଥିବା ଲୋକଙ୍କୁ ଉଦ୍ଧାର କରିବା ଉପରେ ଧ୍ୟାନ ଦିଆଯିବା ଉଚିତ। ରେଡ୍ଡୀ କହିଛନ୍ତି ଯେ ଭାରତୀୟ ସେନା, ନୌସେନା ମେରାଇନ୍ କମାଣ୍ଡୋ ଫୋର୍ସ, ଏନଡିଆରଏଫ, ଏସଡିଆରଏଫ, ଜିଏସଆଇ, ରାଟ ମାଇନର୍ସ ଏବଂ ସିଙ୍ଗାରେନି କୋଲିୟରିଜ୍ କମ୍ପାନୀ ଲିମିଟେଡ ସମେତ ୧୧ଟି ଏଜେନ୍ସିର ବିଶେଷଜ୍ଞମାନେ ୮ ଜଣଙ୍କ ଜୀବନ ବଞ୍ଚାଇବା ପାଇଁ ଦିନରାତି କାମ କରୁଛନ୍ତି।

ଅଧିକ ପଢ଼ନ୍ତୁ: ସୁଦାନରେ ସାମରିକ ବିମାନ ଦୁର୍ଘଟଣାଗ୍ରସ୍ତ