ଇସଲାମାବାଦ: ଏକ ବଡ଼ ଉଦ୍ଦେଶ୍ୟ ହାସଲ କରିବା ପାଇଁ ଆମେରିକା ଇରାନର ନାଟାଞ୍ଜ, ଫୋର୍ଡୋ ଏବଂ ଇସଫାହାନ ପରମାଣୁ ସ୍ଥାନ ଉପରେ ବି-୨ ବୋମାବର୍ଷୀ ବିମାନରୁ ବିନାଶକାରୀ ବୋମା ପକାଇଥିଲା ଏବଂ ଏହି ଉଦ୍ଦେଶ୍ୟ ପାଇଁ ଇସ୍ରାଏଲ ଇରାନ ଉପରେ ଆକ୍ରମଣ କରିଥିଲା। ପାକିସ୍ତାନ ଏହି ଉଦ୍ଦେଶ୍ୟ ବିରୁଦ୍ଧରେ ଖୋଲାଖୋଲି ଭାବରେ ଏକ ବିବୃତ୍ତି ଦେଇଛି। ପାକିସ୍ତାନର ପ୍ରଧାନମନ୍ତ୍ରୀ ଶାହବାଜ ସରିଫ କହିଛନ୍ତି ଯେ ତାଙ୍କ ଦେଶ ଇରାନର ପରମାଣୁ ସ୍ୱପ୍ନକୁ ସମର୍ଥନ କରୁଛି। ଇରାନର ରାଷ୍ଟ୍ରପତି ମାସୁଦ ପେଜେଶକିୟାନ ପାକିସ୍ତାନ ଗସ୍ତରେ ଅଛନ୍ତି।

ପାକିସ୍ତାନରେ ପହଞ୍ଚିଥିବା ରାଷ୍ଟ୍ରପତି ମାସୁଦ ପେଜେଶକିୟାନଙ୍କୁ ଭବ୍ୟ ସ୍ୱାଗତ କରାଯାଇଥିଲା। ପ୍ରଧାନମନ୍ତ୍ରୀ ଶାହବାଜ ସରିଫ ଏବଂ ଉପ-ପ୍ରଧାନମନ୍ତ୍ରୀ ଇସାକ ଡାର ତାଙ୍କୁ ସ୍ୱାଗତ କରିବାକୁ ବିମାନବନ୍ଦରରେ ପହଞ୍ଚିଥିଲେ। ଏହି ଗସ୍ତରେ ଉଭୟ ଦେଶ ଆର୍ଥିକ ଏବଂ ସାଂସ୍କୃତିକ ସମ୍ପର୍କକୁ ମଜବୁତ କରିବାକୁ ପ୍ରତିଶ୍ରୁତି ଦେଇଥିଲେ।

ପାକିସ୍ତାନ ଏବଂ ଇରାନ ଦ୍ୱିପାକ୍ଷିକ ବାଣିଜ୍ୟକୁ ତିନି ଗୁଣରୁ ଅଧିକ ବୃଦ୍ଧି କରିବାକୁ ରାଜି ହୋଇଛନ୍ତି। ପାକିସ୍ତାନ ଏବଂ ଇରାନ ମଧ୍ୟରେ ବର୍ତ୍ତମାନ ଦ୍ୱିପାକ୍ଷିକ ବାଣିଜ୍ୟ ୩ ବିଲିୟନ ଡଲାର ଅଟେ। ଏବେ ଉଭୟ ଦେଶ ଏହାକୁ ୧୦ ବିଲିୟନ ଡଲାର କରିବାକୁ ଲକ୍ଷ୍ୟ ରଖିଛନ୍ତି। ଏହା ବ୍ୟତୀତ, ପ୍ରଧାନମନ୍ତ୍ରୀ ଶାହବାଜ ସରିଫ ଏବଂ ଇରାନ ରାଷ୍ଟ୍ରପତି ମାସୁଦ ପେଜେଶକିୟାନଙ୍କ ମଧ୍ୟରେ ଆଲୋଚନା ପରେ, ଉଭୟ ପକ୍ଷ 12 ଟି ଚୁକ୍ତି ଏବଂ ବୁଝାମଣାପତ୍ର ସ୍ୱାକ୍ଷର କରିଥିଲେ।

କିନ୍ତୁ ଏହି ଗସ୍ତର ଗୁରୁତ୍ୱପୂର୍ଣ୍ଣ କଥା ହେଉଛି ଇରାନର ପରମାଣୁ ଶକ୍ତି ହେବାର ସ୍ୱପ୍ନକୁ ପାକିସ୍ତାନର ସମର୍ଥନ। ଏହି ଘୋଷଣା ଏପରି ସମୟରେ ହୋଇଛି ଯେତେବେଳେ ଇରାନ ଏବଂ ଇସ୍ରାଏଲ/ଆମେରିକା ମଧ୍ୟରେ ଉତ୍ତେଜନା ଶୀର୍ଷରେ ଅଛି, ବିଶେଷକରି ୨୦୨୫ ଜୁନ୍‌ରେ ଇସ୍ରାଏଲ ଏବଂ ଆମେରିକା ଦ୍ୱାରା ଇରାନର ପରମାଣୁ ଘାଟି ଉପରେ ବିମାନ ଆକ୍ରମଣ ପରେ।

ପାକିସ୍ତାନର ଏହି ଘୋଷଣା କେବଳ ଆଞ୍ଚଳିକ ଶକ୍ତି ସନ୍ତୁଳନକୁ ପ୍ରଭାବିତ କରେ ନାହିଁ, ବରଂ ଏହା ଆମେରିକା ସହିତ ଏହାର ସମ୍ପର୍କ ଉପରେ ମଧ୍ୟ ପ୍ରଶ୍ନ ଉଠାଇଥାଏ। ଏହା ଉଲ୍ଲେଖନୀୟ ଯେ ପାକିସ୍ତାନ ବର୍ତ୍ତମାନ ଟ୍ରମ୍ପଙ୍କ ନୀତିରେ ଧ୍ୟାନରେ ଅଛି। ଟ୍ରମ୍ପ ପାକିସ୍ତାନକୁ ଶୁଳ୍କରେ ଏକ ଭଲ ରିହାତି ଦେଇଛନ୍ତି ଏବଂ ପାକିସ୍ତାନ ଉପରେ କେବଳ ୧୯ ପ୍ରତିଶତ ଶୁଳ୍କ ଲାଗୁ କରିଛନ୍ତି। ଗତ ଜୁନମାସରେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ସହିତ ପାକିସ୍ତାନୀ ସେନା ମୁଖ୍ୟ ଅସୀମ ମୁନିର ହ୍ବାଇଟ୍‌ହାଉସରେ ଭୋଜନ କରିଥିଲେ। ଏବେ ପାକିସ୍ତାନ ଓ ଆମେରିକା ଖୁବ ନିକଟତର ହୋଇଥିବା ବେଳେ ଇରାନ ରାଷ୍ଟ୍ରପତିଙ୍କ ଗସ୍ତ ଏହି ସଂପର୍କରେ ଫିକା ପକାଇପାରେ ବୋଲି ଅନୁମାନ କରାଯାଉଛି। 

ଟ୍ରମ୍ପ ପାକିସ୍ତାନରେ ତେଲ ବାହାର କରିବାର ନାରା ମଧ୍ୟ ଦେଇଛନ୍ତି। ଟ୍ରମ୍ପଙ୍କ ଏହି ଘୋଷଣାରେ ବାହ୍ୟ ଭାବରେ ପାକିସ୍ତାନୀ ନେତୃତ୍ୱ ଖୁସି। କିନ୍ତୁ ଇରାନର ପରମାଣୁ ସ୍ୱପ୍ନକୁ ସମର୍ଥନ କରି ପାକିସ୍ତାନ ଏକ ଡବଲ ଖେଳ ଖେଳିଛି। ପାକିସ୍ତାନର ପ୍ରଧାନମନ୍ତ୍ରୀ ଶାହବାଜ ସରିଫ କହିଛନ୍ତି ଯେ ଇରାନର ପରମାଣୁ ଶକ୍ତିର ଶାନ୍ତିପୂର୍ଣ୍ଣ ବ୍ୟବହାର କରିବାର ଅଧିକାର ଅଛି। ଇରାନର ଏହି ପ୍ରସଙ୍ଗ ହିଁ ଇସ୍ରାଏଲ ସହିତ ସମ୍ପ୍ରତି ହୋଇଥିବା ମୁକାବିଲାର କାରଣ ଥିଲା।

ଅଧିକ ପଢ଼ନ୍ତୁ: ଝାଡ଼ଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ ଶିବୁ ସୋରେନଙ୍କ ଦେହାନ୍ତ