ନୂଆଦିଲ୍ଲୀ: ଜମ୍ମୁ କଶ୍ମୀରର ଅନନ୍ତନାଗ ଜିଲ୍ଲା ପହଲଗାମରେ ଗତମାସ ୨୨ ତାରିଖ ଦିନ ଆତଙ୍କବାଦୀ ଆକ୍ରମଣ ଏବଂ ମେ’ ୭-୮ ତାରିଖ ରାତିରେ ଭାରତୀୟ ବାୟୁସେନାର କାର୍ଯ୍ୟାନୁଷ୍ଠାନ ପରେ ଭାରତ ଓ ପାକିସ୍ତାନ ମଧ୍ୟରେ ଉତ୍ତେଜନା ଦେଖା ଯାଇଛି। ପାକିସ୍ତାନ ସହିତ ବଢ଼ୁଥିବା ବିବାଦ ପରେ ଭାରତ ‘ଅପରେସନ୍‌ ସିନ୍ଦୂର’ ମାଧ୍ୟମରେ ପାକିସ୍ତାନକୁ କଡ଼ା ଜବାବ ଦେଉଛି। ଏନେଇ ବୈଦେଶିକ ଏବଂ ପ୍ରତିରକ୍ଷା ମନ୍ତ୍ରାଳୟ ଦ୍ୱାରା ଶନିବାର ପୂର୍ବାହ୍‌ଣରେ ଏକ ମିଳିତ ସାମ୍ବାଦିକ ସମ୍ମିଳନୀ ଆୟୋଜନ କରାଯାଇଛି। ଏହି ସମ୍ମିଳନୀରେ କର୍ଣ୍ଣେଲ ସୋଫିଆ କୁରେଶୀ କହିଛନ୍ତି ଯେ ପାକିସ୍ତାନ ଦ୍ୱାରା ୨୬ରୁ ଅଧିକ ସ୍ଥାନରେ ଆକ୍ରମଣ କରାଯାଇଛି।

କର୍ଣ୍ଣେଲ ସୋଫିଆ କୁରେଶୀ କହିଛନ୍ତି ଯେ ପାକିସ୍ତାନୀ ସେନା ସମଗ୍ର ପଶ୍ଚିମ ମୋର୍ଚ୍ଚାରେ ଆକ୍ରମଣାତ୍ମକ କାର୍ଯ୍ୟକଳାପ ଜାରି ରଖିଛି। ଯୁଦ୍ଧ ବିମାନ ବ୍ୟବହାର କରିଛି। ଜମ୍ମୁ କଶ୍ମୀରର ଉଧମପୁର ଠାରୁ ଆରମ୍ଭ କରି ଭୁଜ, ବଥିଣ୍ଡା, ପଠାନକୋଟ ସମେତ ୫ଟି ସ୍ଥାନରେ ଉପକରଣ କ୍ଷତିଗ୍ରସ୍ତ ହୋଇଛି। ଶ୍ରୀନଗର, ଅବନ୍ତିପୁରରେ ମେଡିକାଲ କମ୍ପ୍ଲେକ୍ସ ଏବଂ ସ୍କୁଲକୁ ଟାର୍ଗେଟ କରାଯାଇଛି। 

ସେନାର ପ୍ରେସ ବ୍ରିଫିଂରେ କୁହାଯାଇଛି, ପାକିସ୍ତାନକୁ ତା'ର ନିଜ ଭାଷାରେ ଜବାବ ଦିଆଯାଉଛି। କାରଣ ପାକିସ୍ତାନ ସାଧାରଣ ନାଗରିକଙ୍କୁ ଟାର୍ଗେଟ କରୁଛି। ଭାରତର ପ୍ରତିଶୋଧମୂଳକ କାର୍ଯ୍ୟାନୁଷ୍ଠାନ ପାକିସ୍ତାନକୁ ବହୁତ କ୍ଷତି ପହଞ୍ଚାଇଛି। 

କର୍ଣ୍ଣେଲ ସୋଫିଆ କୁରେଶୀ କହିଛନ୍ତି, ପାକିସ୍ତାନ ଭାରତୀୟ ପ୍ରତିରକ୍ଷା ପ୍ରତିଷ୍ଠାନଗୁଡ଼ିକୁ ଟାର୍ଗେଟ କରୁଛି। ପାକିସ୍ତାନ ପଞ୍ଜାବରେ ହାଇସ୍ପିଡ୍ ମିସାଇଲ୍ ମାଡ଼ କରିଛି, ଯାହାର ଜବାବ ଦିଆଯାଉଛି। ଭାରତୀୟ ସଶସ୍ତ୍ର ବାହିନୀ ଜବାବ ଦେଇଥିଲେ, ପାକିସ୍ତାନୀ ସାମରିକ ଘାଟି ଉପରେ ନିୟନ୍ତ୍ରିତ ଆକ୍ରମଣ କରାଯାଇଥିଲା। ଭାରତୀୟ ସେନା ପାକିସ୍ତାନୀ ସେନାକୁ ବହୁତ କ୍ଷତି ପହଞ୍ଚାଇଛି। ଭାରତ ଉତ୍ତେଜନା ଚାହୁଁନାହିଁ। କିନ୍ତୁ ପାକିସ୍ତାନ ପକ୍ଷରୁ ଉତ୍ତେଜନାମୂଳକ କାର୍ଯ୍ୟ କରାଯାଉଛି।

ତ୍ୱରିତ ଏବଂ ସୁଚିନ୍ତିତ ଜବାବରେ ଭାରତୀୟ ସଶସ୍ତ୍ର ବାହିନୀ କେବଳ ଚିହ୍ନଟ ସାମରିକ ଲକ୍ଷ୍ୟସ୍ଥଳ ଉପରେ ସଠିକ ଆକ୍ରମଣ କରିଥିଲେ। ପାକିସ୍ତାନ ନିରନ୍ତର ଏକ କ୍ଷତିକାରକ ଭୁଲ ସୂଚନା ଅଭିଯାନ ଚଳାଇବାକୁ ଚେଷ୍ଟା କରିଛି। ଭାରତୀୟ ଏସ୍‌-୪୦୦ ସିଷ୍ଟମ, ସୁରତଗଡ଼ ଏବଂ ସିରସାରେ ବିମାନବନ୍ଦର ନଷ୍ଟ କରିବାର ଦାବି କରିଛି। ପାକିସ୍ତାନ ଦ୍ୱାରା ପ୍ରଚାରିତ ହେଉଥିବା ଏହି ମିଥ୍ୟା ଦାବିଗୁଡ଼ିକୁ ଭାରତ ସ୍ପଷ୍ଟ ଭାବରେ ପ୍ରତ୍ୟାଖ୍ୟାନ କରୁଛି।

-ବ୍ୟୋମିକା ସିଂହ, ୱିଙ୍ଗ କମାଣ୍ଡର, ଭାରତୀୟ ବାୟୁସେନା

ବୈଦେଶିକ ସଚିବ ବିକ୍ରମ ମିସ୍ରି କହିଛନ୍ତି, ପୂର୍ବରୁ ଆମେ କହିଛୁ ଯେ, ପାକିସ୍ତାନ ଦ୍ୱାରା ଉତ୍ତେଜନାମୂଳକ କାର୍ଯ୍ୟକଳାପ କରାଯାଉଛି, ଭାରତ ପାକିସ୍ତାନକୁ କଡ଼ା ଜବାବ ଦେଇଛି। ପାକିସ୍ତାନର କାର୍ଯ୍ୟକଳାପକୁ ଉତ୍ତେଜନାମୂଳକ ଭାବରେ ଦେଖାଯାଉଛି, ଯାହାର ଜବାବରେ ଭାରତ ଦାୟିତ୍ୱପୂର୍ଣ୍ଣ ଭାବରେ ଜବାବ ଦେଉଛି। ଭାରତରେ ପାକିସ୍ତାନର କାର୍ଯ୍ୟକଳାପ ବିଷୟରେ ପାକିସ୍ତାନର ଦାବି ମିଥ୍ୟା, ଭୁଲ ସୂଚନା ଏବଂ ପ୍ରଚାର ଉପରେ ଆଧାରିତ। 

ଅଧିକ ପଢ଼ନ୍ତୁ: ଅନେକ ଜିଲ୍ଲାରେ ରେଡ୍ ଆଲର୍ଟ ଜାରି