ରାଜକୋଟ: ଭାରତ ଏବଂ ନ୍ୟୁଜିଲାଣ୍ଡ ମଧ୍ୟରେ ତିନି ମ୍ୟାଚ୍ ବିଶିଷ୍ଟ ଦିନିକିଆ ସିରିଜର ଦ୍ୱିତୀୟ ମ୍ୟାଚ୍ ବୁଧବାର ରାଜକୋଟରେ ଖେଳାଯିବ। ପ୍ରଥମ ମ୍ୟାଚ୍ ଜିତିବା ପରେ ଭାରତ ସିରିଜରେ ୧-୦ରେ ଆଗୁଆ ରହିଛି ଏବଂ ଏବେ ଦ୍ୱିତୀୟ ମ୍ୟାଚ୍ ଜିତି ସିରିଜ୍ ହାତେଇବାକୁ ଚେଷ୍ଟା କରିବ। ନ୍ୟୁଜିଲାଣ୍ଡ ପାଇଁ, ଏହି ମ୍ୟାଚ୍ କର ବା ମର ପରି ହେବ। କାରଣ ପରାଜୟ ଫଳରେ ସିରିଜ୍ ହାରିବାକୁ ପଡ଼ିପାରେ।

ଭଦୋଦରାରେ ଖେଳାଯାଇଥିବା ପ୍ରଥମ ଦିନିକିଆରେ ଭାରତୀୟ ଦଳ ଚମତ୍କାର ପ୍ରଦର୍ଶନ କରିଥିଲା। ନ୍ୟୁଜିଲାଣ୍ଡ ପ୍ରଥମେ ବ୍ୟାଟିଂ କରି ୩୦୦ ରନ୍ କରିଥିଲା। କିନ୍ତୁ ଭାରତ ୪୯ ଓଭରରେ ୬ ୱିକେଟ୍ ହରାଇ ଲକ୍ଷ୍ୟ ହାସଲ କରିଥିଲା। ବିରାଟ କୋହଲି ଏହି ବିଜୟର ସବୁଠାରୁ ବଡ଼ ନାୟକ ଥିଲେ। ସେ ୯୩ ରନ୍ ର ଏକ ଚମତ୍କାର ଇନିଂସ ଖେଳିଥିଲେ ଏବଂ ପ୍ଲେୟାର ଅଫ୍ ଦି ମ୍ୟାଚ୍ ବିବେଚିତ ହୋଇଥିଲେ। କେଏଲ ରାହୁଲ ଶେଷରେ ସଂଯମତା ଦେଖାଇ ଦଳକୁ ବିଜୟୀ କରାଇଥିଲେ।

ଦ୍ୱିତୀୟ ଦିନିକିଆ ପୂର୍ବରୁ ଭାରତୀୟ ଦଳକୁ ଝଟକା ଲାଗିଛି। ଅଲରାଉଣ୍ଡର ୱାଶିଂଟନ ସୁନ୍ଦରଙ୍କୁ ସାଇଡ୍ ଷ୍ଟ୍ରେନ୍ ଯୋଗୁଁ ସମଗ୍ର ସିରିଜରୁ ବାହାର କରାଯାଇଛି। ତାଙ୍କ ସ୍ଥାନରେ ଦିଲ୍ଲୀର ଯୁବ ଖେଳାଳି ଆୟୁଷ ବାଡୋନିଙ୍କୁ ଦଳରେ ସାମିଲ କରାଯାଇଛି। ଏହା ବାଡୋନିଙ୍କ ପ୍ରଥମ ଅନ୍ତର୍ଜାତୀୟ ସୁଯୋଗ ହେବ। ତେଣୁ ସମସ୍ତଙ୍କ ନଜର ତାଙ୍କ ଉପରେ ରହିବ।

ଭାରତ ବନାମ ନ୍ୟୁଜିଲାଣ୍ଡ ଦ୍ୱିତୀୟ ଦିନିକିଆ ବୁଧବାର, ଜାନୁଆରୀ ୧୪ ତାରିଖରେ ରାଜକୋଟର ନିରଞ୍ଜନ ଶାହ ଷ୍ଟାଡିୟମରେ ଖେଳାଯିବ। ମ୍ୟାଚ୍ ଅପରାହ୍ନ ୧ଟା ୩୦ରେ ଆରମ୍ଭ ହେବ। ଟସ୍ ଅପରାହ୍ନ ୧ଟାରେ ହେବ।

ଭାରତରେ ମ୍ୟାଚ୍ ଷ୍ଟାର ସ୍ପୋର୍ଟସ୍ ନେଟୱାର୍କରେ ସିଧା ପ୍ରସାରଣ କରାଯିବ। ଟିଭିରେ ମ୍ୟାଚ୍ ଦେଖିବା ସହିତ ଦର୍ଶକମାନେ ଅନଲାଇନରେ ମଧ୍ୟ ମ୍ୟାଚ୍ ଉପଭୋଗ କରିପାରିବେ। ଭାରତ ବନାମ ନ୍ୟୁଜିଲାଣ୍ଡ ଦ୍ୱିତୀୟ ଦିନିକିଆର ଲାଇଭ୍ ଷ୍ଟ୍ରିମିଂ ଜିଓ ହଟଷ୍ଟାର ଆପ୍ ଏବଂ ୱେବସାଇଟରେ ଉପଲବ୍ଧ ହେବ। ପ୍ରଶଂସକମାନେ ଯେକୌଣସି ସ୍ଥାନରୁ, ମୋବାଇଲ୍, ଟାବଲେଟ୍ କିମ୍ବା ଲାପଟପ୍ ରେ ମ୍ୟାଚ୍ ଦେଖିପାରିବେ।

ଭାରତୀୟ ଦଳ: ଶୁଭମନ ଗିଲ (ଅଧିନାୟକ), ରୋହିତ ଶର୍ମା, ବିରାଟ କୋହଲି, କେଏଲ ରାହୁଲ (ୱିକେଟକିପର), ଶ୍ରେୟସ ଆୟର (ଉପଅଧିନାୟକ), ରବୀନ୍ଦ୍ର ଜାଡେଜା, ମହମ୍ମଦ ସିରାଜ, ହର୍ଷିତ ରାଣା, ପ୍ରସିଦ୍ଧ କୃଷ୍ଣ, କୁଲଦୀପ ଯାଦବ, ନୀତିଶ କୁମାର ରେଡ୍ଡୀ, ଅର୍ଶଦୀପ ସିଂହ, ଯଶସ୍ୱୀ ଜୟସୱାଲ, ଧ୍ରୁବ ଜୁରେଲ (ୱିକେଟକିପର), ଆୟୁଷ ବାଡୋନି।

ନ୍ୟୁଜିଲାଣ୍ଡ ଦଳ: ମାଇକେଲ ବ୍ରେସୱେଲ (ଅଧିନାୟକ), ମିଚେଲ ହେ (ୱିକେଟକିପର), ନିକ୍ କେଲି, ହେନରୀ ନିକୋଲ୍ସ, ୱିଲ୍ ୟଙ୍ଗ, ଜୋଶ କ୍ଲାର୍କସନ, ଗ୍ଲେନ୍ ଫିଲିପ୍ସ, ଆଦିତ୍ୟ ଅଶୋକ, କ୍ରିଶ୍ଚିଆନ କ୍ଲାର୍କ, ଜ୍ୟାକ୍ ଫଲ୍କ୍ସ, ଡାରିଲ୍ ମିଚେଲ, କାଇଲ୍ ଜାମିସନ, ଡେଭନ୍ କନୱେ (ୱିକେଟକିପର), ଜାଡେନ୍ ଲେନକ୍ସ, ମାଇକେଲ ରେ।

ଅଧିକ ପଢ଼ନ୍ତୁ: ତେଜ ପ୍ରତାପଙ୍କ ଦହି-ଚୂଡ଼ା ପାର୍ଟି: ନୀତିଶ, ଲାଲୁ