ବେଙ୍ଗାଲୁରୁ: ହିନ୍ଦୁସ୍ତାନ ଏରୋନଟିକ୍ସ ଲିମିଟେଡ୍ (ହାଲ୍‌) ଭାରତୀୟ ବାୟୁସେନାକୁ ବହୁ ପ୍ରତୀକ୍ଷିତ HTT-40 ମୌଳିକ ତାଲିମ ବିମାନର ପ୍ରଥମ ଦଫା ପ୍ରଦାନ କରିବାକୁ ପ୍ରସ୍ତୁତ। ଅଧିକାରୀମାନେ ରବିବାର କହିଛନ୍ତି ଯେ ଏହି ନୂତନ ବିମାନ ଯୋଗ ହେବା ଦ୍ୱାରା ବାୟୁସେନାର ପାଇଲଟମାନଙ୍କ ତାଲିମ ବୃଦ୍ଧି କରିବାରେ ଯଥେଷ୍ଟ ସହାୟକ ହେବ।

ନାମ ଗୋପନ ରଖିବା ସର୍ତ୍ତରେ ଅଧିକାରୀମାନେ କହିଛନ୍ତି ଯେ ତିନୋଟି HTT-40 (ହିନ୍ଦୁସ୍ତାନ ଟର୍ବୋ ଟ୍ରେନର-୪୦) ବିମାନ ବିତରଣ ପାଇଁ ପ୍ରସ୍ତୁତ। ସେମାନଙ୍କ ମଧ୍ୟରୁ ଦୁଇଟି ବେଙ୍ଗାଲୁରୁରେ ଏବଂ ଗୋଟିଏ ନାସିକରେ ନିର୍ମିତ ହୋଇଥିଲା।

ଭାରତୀୟ ବାୟୁସେନା ତାର ନୂତନ ପାଇଲଟମାନଙ୍କୁ ତାଲିମ ଦେବା ପାଇଁ ତିନି ବର୍ଷ ପୂର୍ବେ ୬,୮୮୩୮ କୋଟି ମୂଲ୍ୟରେ ୭୦ଟି ମୌଳିକ ତାଲିମ ବିମାନ ଅର୍ଡର କରିଥିଲା। ଚୁକ୍ତି ଅନୁଯାୟୀ ଗତ ଆର୍ଥିକ ବର୍ଷରେ ବାୟୁସେନାକୁ ୧୨ଟି ତାଲିମ ବିମାନ ଯୋଗାଇବାକୁ ଥିଲା। କିନ୍ତୁ ଇଞ୍ଜିନର ଅଭାବ ଯୋଗୁଁ ଏହା ଗୋଟିଏ ମଧ୍ୟ ବିମାନ ଯୋଗାଇ ପାରିଲା ନାହିଁ।

ଏବେ ଆମେରିକୀୟ କମ୍ପାନୀ ହନିୱେଲ୍ ଯୋଗାଣ ଶୃଙ୍ଖଳ ପ୍ରତିବନ୍ଧକକୁ ଦୂର କରି କିଛି ମାସ ପୂର୍ବରୁ TPE331-12B ଟର୍ବୋପ୍ରପ୍ ଇଞ୍ଜିନର ପ୍ରଥମ ବ୍ୟାଚ୍ ପ୍ରଦାନ କରିଛି। କମ୍ପାନୀ ଭବିଷ୍ୟତରେ ମଧ୍ୟ ରାଷ୍ଟ୍ରାୟତ୍ତ ହାଲ୍‌କୁ ସମୟାନୁସାରେ ଇଞ୍ଜିନ ଯୋଗାଣର ପ୍ରତିଶ୍ରୁତି ଦେଇଛି। 

ଅଧିକ ପଢ଼ନ୍ତୁ: ଘୃଣା ନୁହେଁ, ଶୁଦ୍ଧ ଆଧ୍ୟାତ୍ମିକ ପ୍ରେମ ଆମ କାର୍ଯ୍ୟର ମୂଳଦୁଆ: ମୋହନ ଭାଗବତ