ୱାଶିଂଟନ: ଆମେରିକାର ନବନିର୍ବାଚିତ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଶୁକ୍ରବାର ନ୍ୟୁୟର୍କର ଏକ ଅଦାଲତରେ ତାଙ୍କ ଦଣ୍ଡାଦେଶ ଉପରେ ରୋକ ଲଗାଇବାକୁ ସୁପ୍ରିମ୍‌କୋର୍ଟଙ୍କୁ ଅନୁରୋଧ କରିଛନ୍ତି। ଜଜ୍ ଜୁଆନ୍ ଏମ୍ ମାର୍ଚନ୍ ନ୍ୟୁୟର୍କର ଏକ ଅଦାଲତରେ ଟ୍ରମ୍ପ୍‌ଙ୍କୁ ଦୋଷୀ ସାବ୍ୟସ୍ତ କରିବାକୁ ଯାଉଛନ୍ତି, ଯେଉଁଥିରେ ଷ୍ଟାର ଷ୍ଟୋର୍ମି ଡାନିଏଲ୍ସଙ୍କୁ ଚୁପ୍ ରହିବା ପାଇଁ ବେଆଇନ ଭାବେ ଦେୟ ଦେବା ଅଭିଯୋଗରେ ଦୋଷୀ ସାବ୍ୟସ୍ତ କରାଯିବ। 

ମଙ୍ଗଳବାର ଟ୍ରମ୍ପଙ୍କ ଓକିଲ ଆପିଲ କୋର୍ଟ ଜରିଆରେ ଦଣ୍ଡାଦେଶ ଉପରେ ରୋକ ଲଗାଇବାକୁ ଚେଷ୍ଟା କରିଥିଲେ ମଧ୍ୟ ସଫଳ ହୋଇନଥିଲେ। ୨୦୨୪ ମେ ମାସରେ ଏହି ମାମଲାରେ ବିଚାରପତି ମର୍ଚନ ଟ୍ରମ୍ପଙ୍କୁ ଦୋଷୀ ସାବ୍ୟସ୍ତ କରିଥିଲେ। ଚୁପ୍ ରହିବା ପାଇଁ ୨୦୧୬ ନିର୍ବାଚନ ପୂର୍ବରୁ ଏହି ଷ୍ଟାରଙ୍କୁ ୧୩୦,୦୦୦ ଡଲାର ଦିଆଯାଇଥିଲା। ଏହି ନିର୍ବାଚନରେ ଟ୍ରମ୍ପ ବିଜୟୀ ହୋଇଥିଲେ। ଡାନିଏଲ୍ସ କହିଛନ୍ତି ଯେ ୨୦୦୬ରେ ତାଙ୍କ ଏବଂ ଟ୍ରମ୍ପଙ୍କ ମଧ୍ୟରେ ସମ୍ପର୍କ ଥିଲା। ପୁନର୍ବାର ନିର୍ବାଚିତ ହେବା ପରେ ଟ୍ରମ୍ପ ଏବେ ଏହି ମାମଲାରେ ଦଣ୍ଡାଦେଶ ଘୋଷଣାକୁ ସ୍ଥଗିତ ରଖିବାକୁ ଚାହୁଁଛନ୍ତି। ଜାନୁଆରୀ ୨୦ରେ ଟ୍ରମ୍ପ ରାଷ୍ଟ୍ରପତି ଭାବେ ଶପଥ ନେବେ ଏବଂ ଏହା ପରେ ତାଙ୍କ ବିରୋଧରେ ଥିବା ମାମଲା ଆପେ ଆପେ ବନ୍ଦ ହୋଇଯିବ।

ଟ୍ରମ୍ପଙ୍କ ସଦ୍ୟତମ ଆବେଦନ ଉପରେ ସୁପ୍ରିମକୋର୍ଟ ନ୍ୟୁୟର୍କ କୋର୍ଟଙ୍କୁ ଜବାବ ମାଗିଛନ୍ତି। ଗୁରୁବାର ଏହି ମାମଲାର ଶୁଣାଣି ହେବାର ସମ୍ଭାବନା ରହିଛି। ସର୍ବୋଚ୍ଚ ନ୍ୟାୟାଳୟରେ ଦାୟର ଏକ ପିଟିସନରେ ଟ୍ରମ୍ପଙ୍କ ଓକିଲ ମାନେ ଏହି ବଡ଼ ଅନ୍ୟାୟକୁ ରୋକିବା ଏବଂ ରାଷ୍ଟ୍ରପତି ପଦର ମର୍ଯ୍ୟାଦାକୁ କ୍ଷତି ପହଞ୍ଚାଇବା ନିଷ୍ପତ୍ତିକୁ ତୁରନ୍ତ ବନ୍ଦ କରିବାକୁ ଦାବି କରିଛନ୍ତି। ଟ୍ରମ୍ପଙ୍କ ମୁଖପାତ୍ର ଷ୍ଟିଭେନ୍ ଚେଉଙ୍ଗ ଏହି ମାମଲାକୁ ରଦ୍ଦ କରିବାକୁ ଦାବି କରିଛନ୍ତି। ଏହି ସମୟରେ ବିଚାରପତି ମର୍ଚନ ସଙ୍କେତ ଦେଇଛନ୍ତି ଯେ ସେ ନିର୍ବାଚିତ ରାଷ୍ଟ୍ରପତିଙ୍କୁ ଜେଲ ଦଣ୍ଡ ଦେବେ ନାହିଁ କିମ୍ବା ଜରିମାନା କିମ୍ବା ଅନ୍ୟ କୌଣସି କଠିନ ଦଣ୍ଡ ଦେବେ ନାହିଁ।

ଅଧିକ ପଢ଼ନ୍ତୁ: ଲସ୍ ଆଞ୍ଜେଲସରେ ଭୟାବହ ଅଗ୍ନିକାଣ୍ଡ