ଲକ୍ଷ୍ନୌ: ହର୍ଦୋଇରେ ରାସ୍ତା ନିର୍ମାଣରେ ଦୁର୍ନୀତି ମାମଲାରେ ଜଣେ ଅଧୀକ୍ଷଣ ଯନ୍ତ୍ରୀ ଓ ୨ ଜଣ ନିର୍ବାହୀ ଯନ୍ତ୍ରୀଙ୍କ ସମେତ ୧୬ ଜଣ ଯନ୍ତ୍ରୀଙ୍କୁ ସରକାର ନିଲମ୍ବିତ କରିଛନ୍ତି। ସେମାନଙ୍କୁ ପୂର୍ତ୍ତ ବିଭାଗ ମୁଖ୍ୟାଳୟକୁ ସଂଯୋଗ କରି ବିଭାଗୀୟ ତଦନ୍ତ ମଧ୍ୟ ଆରମ୍ଭ ହୋଇଛି। ବିଭାଗୀୟ ମନ୍ତ୍ରୀ ହୋଇଥିବାରୁ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଅଭିଯୁକ୍ତ ଇଞ୍ଜିନିୟରମାନଙ୍କୁ ନିଲମ୍ବିତ କରିବାକୁ ନିର୍ଦ୍ଦେଶ ଦେଇଥିଲେ। ଗତ ମାସ ଅକ୍ଟୋବର ମାସରେ ମୁଖ୍ୟମନ୍ତ୍ରୀ ରାଜ୍ୟର ୧୦ଟି ଜିଲ୍ଲାରେ ନିର୍ମାଣ ହେଉଥିବା ରାସ୍ତାଗୁଡ଼ିକର ଯାଞ୍ଚ କରିବାକୁ ପୂର୍ତ୍ତ ବିଭାଗର ଅଧିକାରୀମାନଙ୍କୁ ନିର୍ଦ୍ଦେଶ ଦେଇଥିଲେ। ଏହାପରେ ତିନି ସପ୍ତାହ ତଳେ ପ୍ରମୁଖ ଶାସନ ସଚିବ ଅଜୟ ଚୌହାନଙ୍କ ଅଧ୍ୟକ୍ଷତାରେ ପୂର୍ତ୍ତ ବିଭାଗ ଉପଦେଷ୍ଟା ଭିକେ ସିଂହ ଓ ବିଭାଗୀୟ ମୁଖ୍ୟ ଯୋଗେଶ ପାୱାରଙ୍କୁ ନେଇ ଗଠିତ ଏକ କମିଟି ହରଦୋଇର ପାଲିଆ-ଲକ୍ଷ୍ନୌ ଜାତୀୟ ରାଜପଥରୁ ରାଦେପୁର, ସକତପୁର ସାଣ୍ଡି, ଶାହାବାଦ ରାସ୍ତାର ପ୍ରଶସ୍ତୀକରଣ କାର୍ଯ୍ୟର ତଦାରଖ କରିଥିଲେ।

ହରଦୋଇ ସାଣ୍ଡି ରାସ୍ତାର ମରାମତି, ବେହାଟ ମନସୁରନଗର ରାସ୍ତାର ପ୍ରଶସ୍ତୀକରଣ ଓ ମାଝିଲାରୁ ଖଟେଲି ଲିଙ୍କ୍ ରୋଡ୍ ର ସ୍ବତନ୍ତ୍ର ମରାମତି କାର୍ଯ୍ୟରେ ମାନଦଣ୍ଡ ଅନୁଯାୟୀ ସାମଗ୍ରୀ ବ୍ୟବହାର କରୁନଥିବାରୁ ଅଧୀକ୍ଷଣ ଯନ୍ତ୍ରୀ ସୁଭାଷ ଚନ୍ଦ୍ର, ନିର୍ବାହୀ ଯନ୍ତ୍ରୀ ସୁମନ୍ତ କୁମାର ଓ ଶରଦ କୁମାର ମିଶ୍ରଙ୍କୁ ନିଲମ୍ବିତ କରାଯାଇଛି।

କମିଟି ହରଦୋଇରେ ନବନିର୍ମିତ ୪ଟି ରାସ୍ତାର ନମୁନା ନେଇଥିଲା। ପୂର୍ତ୍ତ ବିଭାଗ ଦ୍ୱାରା କରାଯାଇଥିବା ପରୀକ୍ଷାଗାର ପରୀକ୍ଷାରେ ସମସ୍ତ ନମୁନା ଫେଲ୍ ହୋଇଥିବା ଜଣାପଡ଼ିଥିଲା। ତାରର ପରିମାଣ ଏତେ କମ୍ ଥିଲା ଯେ କିଛି ମାସ ମଧ୍ୟରେ ରାସ୍ତା ଭୁଶୁଡ଼ି ପଡ଼ିଥାନ୍ତା। ରାସ୍ତା ନିର୍ମାଣରେ ନିର୍ଦ୍ଧାରିତ ମାନକଠାରୁ କମ୍ ବ୍ୟବହୃତ ହେଉଥିଲା ବାଲି ସମେତ ଅନ୍ୟାନ୍ୟ ସାମଗ୍ରୀ। ତଦନ୍ତ ରିପୋର୍ଟ ଆସିବା ପରେ ବିଭାଗ ପକ୍ଷରୁ ଅଭିଯୁକ୍ତ ଇଞ୍ଜିନିୟରଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ଗତ ସପ୍ତାହରେ ସରକାରଙ୍କୁ ଚିଠି ଲେଖାଯାଇଥିଲା।

ଅଧିକ ପଢ଼ନ୍ତୁ: ଦିଲ୍ଲୀରେ ଏକ୍ୟୁଆଇ ଅତ୍ୟନ୍ତ ଗମ୍ଭୀର ଶ୍ରେଣୀରେ ପହଞ୍ଚିଲା