ନୂଆଦିଲ୍ଲୀ: ଆଜିଠାରୁ ସଂସଦର ବଜେଟ୍ ଅଧିବେଶନ ଆରମ୍ଭ ହେବାକୁ ଯାଉଛି। ଏହି ଅଧିବେଶନ ପାଇଁ ଉଭୟ ଶାସକ ଓ ବିରୋଧୀ ଦଳ ନିଜନିଜସ୍ତରରେ ପ୍ରସ୍ତୁତ ହୋଇସାରିଛନ୍ତି। ବିଶେଷ କରି ବଜେଟ୍ ପରେ ଅଧିବେଶନ ବିଶୃଙ୍ଖଳିତ ହୋଇପାରେ। ଗୁରୁବାର ଡକାଯାଇଥିବା ସର୍ବଦଳୀୟ ବୈଠକରେ ଏହା ସ୍ପଷ୍ଟ ଭାବେ ଦର୍ଶାଯାଇଛି। କୁମ୍ଭମେଳା ନେଇ ବିରୋଧୀଙ୍କ ଆଭିମୁଖ୍ୟ ଉପରେ ସରକାର କହିଛନ୍ତି ଯେ ଏହା ବ୍ୟବସାୟ ପରାମର୍ଶଦାତା କମିଟି ଦ୍ୱାରା ନିର୍ଦ୍ଧାରଣ କରାଯିବ।

ବଜେଟ୍ ଅଧିବେଶନ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଅଭିଭାଷଣରୁ ଆରମ୍ଭ ହେବ। ଏହାପରେ ଅର୍ଥମନ୍ତ୍ରୀ ନିର୍ମଳା ସୀତାରମଣ ଉଭୟ ଗୃହରେ ଅର୍ଥନୈତିକ ସର୍ଭେ ୨୦୨୫ ଉପସ୍ଥାପନ କରିବେ। ଏହି ଗୁରୁତ୍ୱପୂର୍ଣ୍ଣ ଦସ୍ତାବିଜରେ ଦେଶର ଅର୍ଥନୀତିର ସ୍ଥିତି ଓ ଦିଗ ଦର୍ଶାଯାଇଛି।

ରାଷ୍ଟ୍ରପତିଙ୍କ ଅଭିଭାଷଣ ଏବଂ ଅର୍ଥନୈତିକ ସର୍ବେକ୍ଷଣରେ ଗୋଟିଏ ଦିନ ପରେ ଉପସ୍ଥାପିତ ହେବାକୁ ଥିବା ସାଧାରଣ ବଜେଟ ସମ୍ପର୍କରେ କିଛି ଗୁରୁତ୍ୱପୂର୍ଣ୍ଣ ସୂଚକ ମଧ୍ୟ ପ୍ରଦାନ କରାଯାଇଛି । ଶନିବାର ଅର୍ଥମନ୍ତ୍ରୀ ସୀତାରମଣ ୨୦୨୫-୨୬ ଆର୍ଥିକ ବର୍ଷ ପାଇଁ ସାଧାରଣ ବଜେଟ୍ ଉପସ୍ଥାପନ କରିବେ। ସାଧାରଣ ବଜେଟରେ ଦେଶର ଅର୍ଥନୀତିର ମାନ୍ଦାବସ୍ଥା ଦୂର କରିବା ସହ ଘରୋଇ ଅର୍ଥନୀତିରେ ଚାହିଦା ଓ ରୋଜଗାର ବୃଦ୍ଧି ଦିଗରେ ଗୁରୁତ୍ବ ଦିଆଯିବ ବୋଲି କୁହାଯାଉଛି। 

କିରଣ ରିଜିଜୁ ବିରୋଧୀ ଦଳମାନଙ୍କ ସହ ବୈଠକ କରିଥିଲେ। ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହଙ୍କ ନେତୃତ୍ୱରେ ଅନୁଷ୍ଠିତ ଏହି ସର୍ବଦଳୀୟ ବୈଠକରେ ସରକାର କହିଛନ୍ତି ଯେ ବଜେଟ ଅଧିବେଶନରେ ୱାକଫ୍ ଏବଂ ଇମିଗ୍ରେସନ୍ ସମ୍ବନ୍ଧୀୟ ବିଲ୍ ସମେତ ମୋଟ ୧୬ଟି ବିଲ୍ ଉପସ୍ଥାପନ କରାଯିବ। ଏହି ବୈଠକରେ ୩୬ଟି ରାଜନୈତିକ ଦଳର ପ୍ରାୟ ୫୨ ଜଣ ନେତା ଯୋଗ ଦେଇଥିଲେ। ସଂସଦୀୟ ବ୍ୟାପାର ମନ୍ତ୍ରୀ କିରଣ ରିଜିଜୁ ବିରୋଧୀ ଦଳମାନଙ୍କ ସହ ଏହି ବୈଠକକୁ ଗଠନମୂଳକ ବୋଲି ବର୍ଣ୍ଣନା କରିବା ସହ ଗୃହକୁ ସୁରୁଖୁରୁରେ ଚଳାଇବା ପାଇଁ ସମସ୍ତଙ୍କ ସହଯୋଗ ଲୋଡ଼ିଛନ୍ତି।